Mak 5:20-36

²⁰Mewö jiiga mosöta anda Jisösnöŋ aŋgöletot ketaŋi ketaŋi ak waŋgiyöhi, miaŋgö keuŋi könahiba Ten-taon distrik uruŋe jim sehiiga körekŋan welipköget. Mewö.

²¹Jisösnöŋ waŋgenöŋ öŋgöba liliŋgöba aŋgö kutuba likepŋe kaiga ambazip kambu gwötpukŋan yaŋgöreŋ kaba tokogetka aŋgö jitŋe kinget.

²²Kingetka köuluk mirigö keu galöm kun qetŋi Jairus yaŋön kaba Jisös eka wösöŋe geba simin köl waŋgiyök.

²³Simin köl waŋgiba kapaŋ köla köuluköba kewö jiyök, “Böratni moröŋan mönö kömumamgö akza. Mönö kaba börögi qakŋe alnöŋga ölöwaka toroqeba malma.”

²⁴Mewö jiba Jisös waŋgiriga mohotŋe anohotka ambazip kambulelembe yeŋön andöŋire anda ölöqölököba liliköm etkiba anget. Mewö.

²⁵Angetka miaŋgöreŋ sutŋine ambi kun malök. Yaŋön (yara) yambu 12:gö dop köiŋnöŋ ehiga nalö dop kawöl yöhöiga malök.

²⁶Mewö mala sihimbölö gwötpuk möriga sile galöm gwötpukŋan yaŋgö nup megetka baukbauk kun kude miwikŋaiba malök. Yaŋön sile galöm ambazip yeŋgö töwaŋinaŋgöra moneŋ inapŋi körek gila malökmö, kawölŋi miaŋön mönö mem bölim waŋgiiga malök.

²⁷Mewö mala Jisösgö buzupŋi möta kewö jiyök, “Nöŋön i oseimamgö möt lömböriba malukuŋeyök borom kun misiribileŋak ewö, mönö ölöp ölöwakŋam.” Mewö jiba ambazip kambu sutŋine Jisösgö andöŋe anda malukuŋe misiriyök.

²⁹Misiriiga sepŋi miaŋgöreŋök jöpköiga qemjem-mamjeŋan qahöwahiga sileŋan ölöwahiga mörök.

³⁰Ölöwahiga Jisösnöŋ miaŋgöreök ösumŋi kun kutuba anöhi mi möta ambazip kambu sutŋine liliŋgöba jiyök, “Daŋön malukuni misiriza?”

³¹Mewö jiiga gwarekurupŋan kewö jiget mörök, “Ambazip kambunöŋ ölököba liliköm gihiba goseize. Mi eka denöwö ‘Daŋön nömisiriza?’ jizan?”

³²Mewö jigetmö, Jisösnöŋ kunbuk “Daŋön mi akza?” jiba mi miwikŋaimamgöra liliŋgöba uba eŋgehök.

³³Eŋgehiga ambi sileŋe angöletot asuhuyöhi, yaŋön mi möta miaŋgöra keŋgötŋi möta jönömŋi unduiga kaba Jisösgö wösöŋe geba simin köla könaŋi pakpak jiiga mörök.

³⁴Jisösnöŋ mi möta kewö jii mörök, “Böratni, mötnaripkan mönö mem ölöwak gihiza. Qemjem-mamjeŋgan mönö qahöwahiga ölöp urubönjöŋnöŋ anman.” Mewö.

³⁵Keu mewö jiba kiniga köuluk mirigö keu galömŋaŋgö mireyök kunŋan welen kaba Jairusgöra jiyök, “Böratki kömuza! Miaŋgöra böhigö qakŋe lömböt toroqeba kude alman.”

³⁶Jiiga Jisösnöŋ keu miaŋgö nönöŋgan aka köuluk mirigö keu galömŋi kewö jii mörök, “Keŋgötki kude mötnöŋ! Mönö ni möt narim niŋginöŋ.”