Makna Yesusmoa. 6:4-14

⁴Wo Yesusva hena moamba nonora, doa hem olhmona ishunna, os mongova Sesoana moashulnindriniva oklamba garava, wo Sesoana moam dim ishomana vinvra no okla kembelnindm, himba os umnivav, nonorangas lohv, moamoa hillimni. Doa no moashulnindrini henga hevindamba prorava, wo Sesoana moamba ora owalmba ishunda, no owalva os umnivav, ombandhana olohv, plohvra.

⁵Wo nonamba Yesusva os tungundthoawolalm vevna no deuvnindmba hevna owalmba, heva os owai, himba Yesusmba undnahonam lovahthamnavnamoa, wo noinda es eva tungundthoawol vevav ombamba, owai. Uvavulnindm eskand ambo himba hevna englava huhlinvna, wo os momongo wolapho vevna. Himba nengvna, kamba undnahonam lovahthamnavmoa. Wo Nasaretnindva owalva os vina, wo Yesus hev mongona kembella mongona kembella os lohmana vevna, Sesoana nemelmom ishollohmana vinvna.

⁷Doa himba hevna hellelnindm 12pelaram unna, hom kuso, wo kusonamba, unna, yem ka poauothowol vei, wo noinda yimba angarava, yimba si os tihsongova indhanaminiva wolapho vaomana vinvav, yem ka poauothowol vei.

⁸Innemba manam yimba iangavav, innemba, innewondava, diva mindnam.

⁹Spatuangas vewol viu, kayen vethowol viu mongasal, wo ala pepavu.

¹⁰Henoi samblindhana engavra, henoi samblindhana engavra, os ango. Anguwul verava, mongona kembellava yimba nomba ephovrava, di mongawaduvra dawonam wohihillohvm, inne enevm, verava, henga yimba mongona kembellamba engavrava.

¹¹Wo mongona kembelnindva yemba sehmonamba holvorombol owai ovitava, doa nominioa engavra, wo monara pethaslehol spaturini bumb vewol eveo no indhanana novra, osm himba ningvra, kava sahonam viv, hona Sesoana moamba kava aongpa viv.

¹²Doa no 12pelara hellelnindva himba anguwul vena, no kembellam no kembellam anguwul vena, wo kembelnindm woneuvmona vevna, Sesoana nemelmoa besal ishuvmona vinvna. Os ishuvmona vinvna, yeoa sahoklamoa wuleihu.

¹³Doa himba tihsongova mindnam indhanana nihmerini wolapho vewuvmona vevna, wo uvavulmungilva himba welna selvowol vaomana vinvna, wo lesvhoawol vi.

¹⁴Yesusna hellelnindva os mendekliandra vivna, wo indkumbi hillivna, os uvna, Yesusva os vev. Monglava uvna, Yesusva Yon Baptais, ten doara dahanam, no pokamarini phona hevna nihna, noinda osva mendekliandrava vewol vev.