Maleko 6:4-14

⁴Na Yesu ye hededelau udiyedi ye wane, “Magai maudoidi peloweta se hekasisiyei, na yona magai tamowaidi yo kana bogao yo kehanao nige se hekasisiyei.”

⁵Ede magai wa unai nige gonowana laulau gigibwalina hesau ye ginauli, na nimana ye tolesae tamowai kasikasiyebwadi hisa mo udiyedi na se namwanamwa.

^6aYesu ye nokokalili, matawuwuna ede yona magai tamowaidi nige se sunumaei.

^6bNa Yesu ye lau magai gagilidi udiyedi tamowai ye hekatadi.

⁷Na kabo Saudoudoi-labui wa ye yoganeidi bena labui labui ye hetamalidi. Iya yona gigibwali ye moseidi na unai kabo yaluwa yabayababadi se hededehepesadi.

⁸Na kabo ye guguyaidi ye wane, “Tabu ginauli hesau kwa laubahei yomi kabalau ne unai, na tuke mo. Tabu kami kai, yomi tobwa yo moni kwa bahebaheidi.

⁹Na gonowana mo buti kwa likwadi, na tabu kami kwama hagahagadi kwa baheidi.”

¹⁰Na ye hededeꞌuyo ye wane, “Kaiteya numa unai se yoganeigomiu na kwa mwalaesae, meta unai kwa miya ye lau ee magai me kwa laugabaei.

¹¹Ena kaiteya magai nige se yogaisinigomiu, yo yomi hedehedede nige se lapuidi, meta kwa laugabaei na kaemiu nagalidi mo kwa koinihinihiyedi. Temeta ye hemala magai ne yodi hekihekinoi.”

¹²Yesu yona hekahekatao wa se pesa se lau, se lauguguya bena tamowai nuwadi se buidi.

¹³Yaluwa yabayababadi gwaudi se hededehepesadi, na bunama unai taukasikasiyebwa gwaudi se heyausidi yo se henamwanamwadi.

¹⁴Heloda wasawasa Yesu wasana ye lapui, matawuwuna Yesu hesana wa tamowai maudoidi kabina se kata. Hekadi se wane, “Nuwana Yowane Babatiso iya boita unai ye toloꞌuyoma, unai ede paisowa gigigigibwalidi ye hemasalahadi.”