1Nayan, simakay si Jesus te belangay, aw minolì doton te lonsod tinikedowan din.
2Wedà kenamay, dimateng se otaw neningga te otaw kenà egpekeiwal. Pegkità i Jesus te ontò dan simalig diyà kandin, minikagi sikandin diyà te otaw kenà egpekeiwal, “Elew, peseligi se pedowan no, so pigwedad den se salà nikaw.”
3Nayan, doen menge menenoladà te punù mig-aneng-aneng te migtompuyus si Jesus te Timanem pineokit te kagi din sìyan.
4Meneng netegahan i Jesus aw eden se aneng-aneng dan, aw minikagi sikandin, “Nengà lay eg-aneng-aneng kaw te medaet?
5Mola megpelingo-lingo se otaw megwedad te salà. Meneng eked pekebatog se otaw megpegolì te otaw kenà egpekeiwal singed aw doen tolos te Timanem diyà kandin.
6Meneng so Timanem a Migpekeotaw, ipekità ko den kenyo te mekebatog a megwedad te salà te otaw dini lanto te tanà.” Penga niyan, minikagi si Jesus diyà te otaw kenà egpekeiwal, “Enaw ka. Loloni se inibatan no, aw olì ka den.”
7Yan minenaw sikandin aw minolì.
8Pegkità te doma otaw kenyan, ontò dan nelemitan, aw dimuyun dan te Timanem so insogò din si Jesus amon megwedad te salà te otaw.
9Nayan, pegkesayo i Jesus lekat kidoen, kinità din se iskribinti nenenoo kidoen te opisina din, ngadan din si Mateo. Minikagi si Jesus, “Taking ka kanak.” Yan timindeg si Mateo aw timaking sikandin ki Jesus.
10Penga niyan, kimaen si Jesus doton te balay i Mateo, aw medita heman se menge iskribinti aw doma otaw nelegeb te salà kimaen doma i Jesus aw menge tinoledaan din.
11Meneng pegkità te menge Parisiyo kenyan, minikagi dan diyà te menge tinoledaan i Jesus, “Medaet iyan, so egpengaen se pengolo niyo doma te medaet otaw, menge iskribinti aw doma otaw nelegeb te salà.”
12Meneng pegdineg i Jesus te inikagi dan, minikagi sikandin, “Kenà otaw wedad mesakit se bolongen te doktor, meneng otaw doen mesakit se bolongen din.
13Keilangan eneng-enengen niyo aw eden se kedegdagan te kagi te Timanem seini, ‘Pengkey measeb kaw egpemegay te bowang diyà kanak, meneng labi a pa meluba aw megpeidoway kaw.’ Insogò a dini kenà amon tewalen ko se otaw eg-aneng-aneng te metòlid se eg-inangen dan, meneng insogò a dini amon tewalen ko se otaw mekesesalà.”
14Nayan, dimoton se menge tinoledaan i Juan Memonyagay ki Jesus, aw mig-insà dan, “Melikit kay egpowasa onawa te eg-inangen te menge Parisiyo. Nengà lay kenà egpowasa se kamno menge tinoledaan?”
15Minikagi si Jesus, “Aw doen peipid, eked kepuluk se menge sigalak te meama peipiden dalem te kidoen pa sikandin. Meneng doen aldaw domateng aw meabat lekat kandan se meama peipiden, aw yan se aldaw megpowasa dan so mepuluk dan.”
16Mig-indan heman si Jesus te tegdeyanan tepad te kaling toladà din, kagi din, “Eked kepakay aw tompalan se tapay penenaktun te kaling tila wedà pa bugsaki, so komotot se itompal, aw labi pa dakel se lisì te saol.
17Aw meg-inang heman se otaw te bino, eked din soli se temek te paras diyà te solanan ininang lekat te kindal te kambing tapay linanit, so aw megbohak se temek, megbeto se solanan tapay linanit, aw lomowà se bino aw kebàtan heman se solanan niyan. Meneng keilangan isawol se temek inangen bino diyà te solanan kaling linanit amon wedad kebàtan.”
18Nayan, dalem te pegtoladà i Jesus, dimateng se sebad obanen te simbahan te Judiyo. Limongken sikandin diyà ki Jesus, aw minikagi, “Kaling pa nematay se batà ko bayi. Peg-ayas ka bag, aw pemàdi sikandin amon meantay.”
19Penga niyan, timindeg si Jesus aw timaking kandin sipat menge tinoledaan din.
20Nayan, doen heman sebad bayi pigdipenogan te sempolò teg dowa se omay. Migpedapag sikandin diyà te getan i Jesus aw nemaed olò te toktok te saol din,
21so tapay sikandin mig-aneng-aneng te megolì se mesakit din aw pemàdan din olò se saol i Jesus.
22Penga niyan, miniling si Jesus, aw kinità din se bayi sìyan. Minikagi sikandin, “Atà, peseligi se pedowan nikaw. Negolian ka so simalig ka diyà kanak.” Pegketà, negolì se mesakit din.
23Pegdateng i Jesus doton te balay te obanen, kinità din se menge otaw mig-edop te seluli tandà te lano dan, aw medita heman se doma otaw netipon migkelag.
24Migpunù si Jesus, kagi din, “Lowà kaw den, so wedà kematay se batà. Olò sikandin timedogi.” Meneng nebebeyatan dan si Jesus.
25Pegkeobos te otaw netipon, minawop si Jesus diyà te tambì, aw pinemàdan din se belad te batà, aw minenaw se batà.
26Nedengeg se peg-antay i Jesus kandin kidoen te kedepagan te ogpeanan sìyan.
27Nayan, pegkesayo i Jesus lekat kidoen, doen dowa otaw bota timaking kandin. Timawal dan, “Bowad-bowad te selotan tadon gebii si David, keidowi kay bag.”
28Pegdateng din doton te balay, migpedapag se otaw bota diyà kandin. Minikagi si Jesus, “Nemenal kaw lay te mekebatog a megpegolì kenyo?” Timaba dan, “Ee, Sir. Nemenal kay.”
29Penga niyan, pinemàdan i Jesus se mata dan, aw minikagi sikandin, “Metoman iyan meinang diyà kenyo tandà te pegsalig niyo diyà kanak.”
30Pegketà, kimità dan. Penga niyan, ontò migpunù si Jesus, “Keilangan wedad palos otaw indanan niyo.”
31Meneng pegkesayo dan, wedà dan tolò kandin, aw yan se doun te labi pa nedengeg si Jesus doton te kebelad te probinsya sìyan.
32Nayan, pegkesayo te didowa otaw pinegolian te mata, doen otaw neomo inibing doton ki Jesus, so dinetengan sikandin te bosaw.
33Penga te pegpelowà i Jesus te bosaw lekat te otaw sìyan, nekeikagi den sikandin. Ontò nepela se kedita te otaw kimità kandin, aw minikagi dan, “Wedad palos kinità tadon iling kenyan dini kenitadon menge bowad-bowad i Israel.”
34Meneng minikagi se menge Parisiyo, “Doen tolos imbegay diyà kandin lekat te pengolo te bosaw si Satanas, aw yan se doun te egpelowà sikandin te bosaw lekat te otaw.”
35Nayan, miglegeb si Jesus doton te kedita te lonsod aw doma ogpeanan, aw migtoladà kidoen te menge simbahan te Judiyo. Migtoladà sikandin te Mèpiya Indan tepad te peglowan te Timanem, aw migpegolì te kedita te otaw doen mesakit.
36Pegkità din te medita otaw netipon diyà kandin, ontò din dan neidowan, so ontò dan nelimahan aw wedad egtabang kandan. Iling dan te menge ayam-ayam karniro megketading te eked kenamay aw wedad megdiyaga kandan.
37Penga niyan, minikagi si Jesus te tegdeyanan diyà te menge tinoledaan din, “Ontò dakel se geniyenen, aw pilabok se otaw meglegani.
38Timanem se tig-apò te pawà, aw keilangan megtawal-tawal kaw diyà kandin amon isogò din se menge doma otaw meglegani.”
