Luta 1

1

2

3

4

¹Beyabeyana, Isalaela hola hige edi kin mate, tau fafadudulai edi fuya ita watanidi yai, nuꞌuna mate guliyam laꞌilaꞌi. Yo fede, taumoho hesa hesana Elimileka, in Sulu Efalata mate Betelehem yai sa miyamiya Diudeya Nuꞌuna ganahewana yai. Ma lahuna Naomi yo nanatudi luwaga, Malon yo Kiliyon, sa aulaha sa lau sa miya Mowabi Nuꞌuna yai. Fuyana amainiya sa miyamiya,

³Elimileka ya peꞌi. Lahuna Naomi ma nanatuna luwaga ya peꞌi afuledi.

⁴Yo fede, Mowabi wawahindi Opa yo Luta sa faidi. Bolima safuhudohudoꞌi sa ofi, mulina yai,

⁵Malon yo Kiliyon hinaga sa peꞌi. Yo fede, Naomi hige lahuna yo nanatuna.

⁶Boliman fisa sa ofi, mulina yai Naomi ya atahiyen mate, Guyau haꞌa ena dodoga ena loholoho ya feledi, be sa mahula. Yo fede, ya nonoha na, ma afa lawana Mowabi Nuꞌuna sa lau afulen.

⁷Sa fatubu, sa aulaha sa lau Diudeya na edaꞌedana yai

⁸ya libalau lebedi, iye, Au fuyo, be afa tinamiu ma afa haidamiu au miya! Haba Guyau ya loholoho lisimiu yai, doha ami loholoho lisigu yai yo tau peꞌi lisidi yai hinaga.

⁹Haba Guyau ya saguhimiu be emi nahi ya famahatadi, na ami nahi fuyo, be emi luma ami fatubu bodaidi. Habahim, Naomi ya falafudi, na sa fatubu sa tan. Sa libalau, tiyen, Higeꞌe! Haba ꞌe lau watanim, be te lau haidam lisidi.

¹¹Naomi alinadi ya fafiyo iyen, Nanatugu, au fuyo! Paꞌana somo be ami lau watanigu? Ami nuwatuhui bena haba E fanatu fuyo, be nanatugu tatau, na haba ami faidi?

¹²Au fuyo emi nuꞌu! Paꞌana yau mate E tinalaꞌi, be hige gonowana ya nahi fuyo. E nuwatuhui, egu fuya ya ofi. Na ibe iꞌipa te E nahi, na nanatugu tatau,

¹³Haba tabu au nahi na ami bagibagiyedi ee–, sa hewali? Nanatugu, higeꞌe! Ami sibai mate hige gonowana. Yaubada ya taꞌai mulimuliyegu, be nuwagu ya heyayaꞌemiu.

¹⁴Yo fede, hinaga sa tan fuyo. Habahim, Opa lawana ya falafu, be ya fuyo, na Luta ya toha didini.

¹⁵Be Naomi ya libalau lisina iyen, Luta, falem nahi ya fuyo afa efana yo ena yaubada lisidi. Maꞌem au fuyo emi nuꞌu.

¹⁶Luta iye, Tabu u fatamali fafuyogu! Wa lau somo: yau maꞌem, yo somo yai wa miya: yau maꞌem, Haidam: haidagu, Em Yaubada: egu Yaubada.

¹⁷Ai somo wa peꞌi: haba ainiya E peꞌi hinaga, yo haba ainiya sa boꞌusaigu. Haba Yaubada ya kaumananaegu, yena somo E ginauli faheyaya. Ibe hige somo hesa i hinelida. Na peꞌi moho haba ya hinelida.

¹⁸Yo fede, Naomi ya nuwatuhui mate Luta ya dudu wananaha, be hige somo hesa i libaen.

¹⁹Sa lau ee–, sa mahano Betelehem yai. Dodoga mahudoꞌidi nuwadi sa amna, na wawahin sa fatiꞌo fuyoꞌidi, tiyen Itete moꞌisa, Naomi?

²⁰Naomi, alinadi ya fafuyo, iyen, Tabu au atahigu Naomi, Au atahigu Kalapi, paꞌana Yaubada ya fanuwa heyayagu.

²¹Amateꞌi E aulaha mate, egu ginauli boludi. Na Yaubada ya fafuyoguma te, hige egu ginauli. Tabu au atahigu Naomi, paꞌana Yaubada, Tau Gigibwali, ya kaumananaegu na heyaheyaya ya felegu.

²²Itete sidohana Naomi ma lawana Luta, Mowabi Nuꞌuna yai, sa fuyoma. Fuyanna sa mahano mate, mahula ya fatubu Betelehem yai. Kalahe hudoꞌi hesana bali, nenena doha laisi, ena fuya anaho.