Ruth 1

1

2

3

4

¹Di muna, di landè fa harì i dad to di banwe Israél mkel i bong kbitil. Na nun satu lagi dnagit ku Élimélék mdà di lumbuk dnagit Éfrata mnè di banwe Bétléhém glam di banwe Dyuda. Élimélék na yaanan na lwe ngàla lagi dnagit ku Malon na Kilyon mili flo di banwe Moab, du mdà di kbitil. Na klola mnè déén,

³baling mati Élimélék, na gtagak i yaanan Naomi na i lwe ngaan lagi.

⁴Na kafnge én, mwè i lwe ngaan lagi yaan mdà di Moab, na dagitla Orfa na Ruth. Di fan fnge i sfalò fali knèla déén,

⁵mati Malon na Kilyon, na alò satu Naomi gtagak, talandè yaanan na dad ngaan.

⁶Na di kaklinge Naomi nun tabeng Dwata i Amu i dad ton di Israél fagu di kablén kafye ulê di dad fulela. Taman fatlagadan i kdaan di Moab gagin i dad tewen libun du mulê di banwe Bétléhém.

⁷Na tagakla i gumnèla déén na salngan ale mdà, du samfulê di banwe Dyuda, bay déén di dalan,

⁸man Naomi di dad tewen, manan, “Fye fa baling ku mulê gamu di dad tuayu. Na fye ku Dwata i Amu malas gamu kafye salngad i kafafyeyu deg na i dad yaanyu tamati.

⁹Na fye ku Dwata i Amu tamlas i yaanyu, du fye nun fye knèyu.” Na di kmanan ani, nalakan ale na tatì ale sakwak,

¹⁰na manla di ku Naomi, manla, “Là, du kayèmi magin ge mulê di dad tom.”

¹¹Kabay man Naomi, “Dad ngàgu, fye fa ku samfulê gamu di dademeyu. Tan i duenyu mayè magin deg, du landè sa dademe ngàgu lagi i tlasgu yaanyu.

¹²Dad ngàgu, mulê gamu, du too agu tua nan, na là fakay ku lêman agu mwè yaan. Na balù fa ku fakay agu mwè yaan kadang butang ani na nun dad ngàmi lagi,

¹³gamfatan gamu fa kè kel di kbongla na là gamu baling mayè i dademe? Ken là gamu gamfatan. Tay, fanlayam agu Dwata i Amu, na mlidù agu du gagin gamu di kaflayamgu.”

¹⁴Kaklingela i man Naomi lêman ale sakwak. Kafnge én, nalak Orfa i tewen libun na mulê, bay Ruth lkafan Naomi du too mayè magin kenen.

¹⁵Taman man Naomi di kenen, “E tingàgu, neyem i lwayam tamulê di dad ton na di dwatan, fye ku magin ge kenen.”

¹⁶Kabay baling tmimel Ruth, manan, “Nangam agu ftagak ge. Faloham agu magin, du kayègu magin ge balù tanè i gusalum, na mnè balù tanè i gumneam. I dad tom mgimò kadang i dad togu, na Dwatam mgimò kadang i Dwatagu.

¹⁷Na balù tanè gumatim, déén kayègu gumati, na déén gulambang deg. Fye ku Dwata i Amu, toon agu fanlayam ku tnagakta ge di là fa fati i samkah gite.”

¹⁸Na di kdilè Naomi too mdà di nawa Ruth magin, laan kenen nleges mulê.

¹⁹Taman fadlug i lwe ani salu di Bétléhém. Na di kakella déén, dee gusalu nawa i dad to, du tikeng ale di kagkah Naomi du landè yaanan na dad ngaan. Na sasalek i dad libun, manla, “Naomi kè ani?”

²⁰Na man Naomi di dale, manan, “Nangyu agu dnagit ku Naomi, i to lehew, bay balingyu agu dnagit Marah, i to mlidù, du too féét i gnagugu i kfagu deg Dwata Too Mtulus.

²¹Du di kdàgu dini di muna fa, too nun gebegu, bay di kafasfulê Dwata i Amu deg landè gebegu. Taman nangyu agu dnagit i to lehew, du knagol agu Dwata i Amu Too Mtulus, na fanlayaman agu.”

²²Na ani kagkah i kulê Naomi mdà di banwe Moab gagin i tewen Ruth fdu di Moab. Na di kasfulêla di banwe Bétléhém tabang i kaktu satu fla dnagit barli.