Luku 24:27-51

²⁷Huteno anante agafa huno, Mosesinteti vuno maka kasnampa vahe'mozama, Agrikuma huza krentenaza kea znasamime vu'ne.

²⁸Hagi znagrama vunaku'ma hu'na'a kumate unehnatizageno, Jisasi'a ana kumara agatereno vaniaza hu'ne.

²⁹Hianagi hanavetike agaterenka ovugahane huke znagra nehuke, hanihuza nehianki masetenka vnane hu'ne kazigazi hakeno, ana nompi znagrane umreri'ne.

³⁰Jisasima nezama nenaku aza tununte tratema umanineno breti erino, Anumzamofo susu hunteteno, tamanasino agafa huno neznamigeno,

³¹zanavurgamo hari higeke Jisasi'e huke ke ankenerakeno, Jisasi'a ru fnane hu'ne.

³²Znagra znagra anage hu'na'e, kantegama neokenoma keagama nerasamino, Anumzamofo avontafepinti kema eriama nehigeno'a, tagu'amo'a otianagi, keta antahita osu'no'e.

³³Znagra anage nehuke, ame huke rukrehe huke Jerusale kumate vuna'e. Jisasima amagema nentaza 11ni'a disaipol nagamozane, mago'a naga'moza'nena eri atru hu'nage'za ome nezmagake'za,

³⁴Zamagra anage hu'naze, tamage Ramo'a otino, Saimoninte ufore hu'ne! Huza nehazageno,

³⁵ana amagema nenta'a disaipol netremoke kantega fore hu'neazane, breti erino tamanasino znamigeke, Jisasina ke ankerena'a agenke huama hu'na'e.

³⁶Anazanku'ma naneke nehazageno'a, Jisasi'a amu'no zimifi efore huno otineno anage hu'ne, tamarimpa frune maniho.

³⁷Hianagi zamagra havi avamu negone hu'za zamagesa nentahi'za, antri hu'za koro hu'naze.

³⁸Ana nehzageno Jisasi'a anage huno zmasamine. Nahigeta korera nehuta, tare tamagutmagesa nentahize?

³⁹Ama Nagrani'a mni'noanki nagane, nazanena navako hutma keho. Na'ankure Nagrima hu'neaza huno, hankromofona avufgane zaferinanena omnene.

⁴⁰Anagema huteno'a, agane, azane anamokizmi zameri hu'ne.

⁴¹Na'ankure zamagra tusi muse nehu'za, antri nehu'za zamentinti nosazageno, Jisasi'a anage hu'ne, tamagra mago'a nezana antenazafi?

⁴²Zamagra kre hagege huntenea nozame eri amizageno,

⁴³anamokizmi zamure erino nenege'za ke'naze.

⁴⁴Jisasi'a anage huno zamasmi'ne, Nagra tamagrane mani'nena, anage huno'e, maka kema Nagriku hu'za Mosese kasegefine, kasnampa vahe'mo'za krenaza kefine, zgame avontafepima krentenea zamo'a nena'a fore hugahie.

⁴⁵Anante Jisasi'a zamaza huno antahintahizmia zmazeri ama hige'za, maka Anumzamofo avontafepima krente'nea kea antahini hu'naze.

⁴⁶Agra anage huno zmasami'ne, avontafepina amanage huno krentene, Kraisina ahesageno ata erino friteno, tagufa knare otigahie.

⁴⁷Vahe'mo'za Agri agifi, zamagu'a rukrahe hanageno, Anumzamo'a kefozazimi eritrezamantesia kea, Jerusale kumate erigafa hute'za, mika kokankoka vahete vugahaze.

⁴⁸Tamagra Nagritema fore higetma kenaza zana huama hugahaze.

⁴⁹Hanki antahiho, Nfa'nimo huvempa huno tamigahue hu'nemofona, huntesugeno tamagrite egahie. Hu'neanagi tamagra (Jerusale) rankumapi manineta monafinti hanavea eriteta vuta eta hiho.

⁵⁰Jisasi'a anage huteno zamavreno Betani vuno azana erisaga hunagamuteno, asomu ke huzmantene.

⁵¹Anama hunezmantegeno, Anumzamo'a avregeno zmatreno monafi mareri'ne.