Luk 24:27-51

²⁷Eme iy asehek nyala lakou mari udu bolo sahou ta Kindrei i turu aleu labai, udu ndra kabatana Moses hawe tarou tiri propet, ano i turu.

²⁸Ya eme oro adek ame mirihik ta kon nane oro anya ka aliy badeh, Jises edek ales ili.

²⁹Arile, uru anya, “Ei, ou anya a heh? Ou amadin hawe aru na ben dan op, mirihik kon eben ai.” Eme iy eme hamon hawe uru.

³⁰Eme Jises manyah hawe uru udu andri ndrahu nyamon badeh, andrei jabi ramen ma edeu wurah i ta aliy. Ano iy boso-ei ma edeu i nuru.

³¹Eme mada uru aleu, ma uru baraseleyani iy ai. Arile, bwe adeh, iy ndramai ta mada uru ai.

³²Eme uru asehek i turu ari ari anya, “Sahou tan doh mene adeh, mesekei aru abadok ma sekesek adeh! Na len mene, iy edek san hawe talu asehek sahou mari badu bolo sahou ta Kindrei aleu eme ta talu.”

³³Eme uru suri uru suwi suwi ala Jerusalem. Eme uru ala badeh, ndruni oro lau ma ronoh ari ta Jises hawe lau rayah are hawe oro atukum.

³⁴Eme oro anya, “Handru! Handru! Laban badeh, ndramak handru, iy badeh, asahan hawe Saimon.”

³⁵Ano, uru asehek nyala oro ta lakou mene asahan san hawe uru, ma hawe asehek ta uru seleyani iy badeh, udu ta iy abo-os jabi ramen.

³⁶Ya oro asehek nyala lakou doh, kahis le badeh, Jises amwenen asahan alih toro ma tiye anya, “Mondrei kudu hawe ado.”

³⁷Eme oro anya oro atou nyam, ma oro toroyani oro.

³⁸Eme iy tiye i toro anya, “Ado anoh ta sasah? I buku sah ado lomondra i buku badeh, udu ndrine ado?

³⁹Ado kanyolom minek hawe katik se. Idah jo amwenen! Ado ndranyolom ai, nyam badeh, salin bwe, hawe iy ndruwin le, arile jo badeh, salik udu aliy.”

⁴⁰Eme iy tiye sahou ano badeh, iy leheya minen hawe katin i toro.

⁴¹Eme ya oro sekesek tinan labai, arile budon toro androndro kahis le. Eme iy ndremenya oro anya, “Ado ari nyamon udu aliy deh bwe?”

⁴²Eme oro atehei ni sese ame-er i minen,

⁴³eme iy aimon udu mada oro mari atou.

⁴⁴Eme iy tiye i toro, “Lakou mene jo udu ndra hawe ado asehek anya: Lakou mari mene ndratorowenei ta nyalak udu bolo tarou malen ta Moses, hawe udu bolo sahou tiri propet, ma hawe udu bolo buk Wari badeh, ndrasahan handru na dah.”

⁴⁵Ano, iy amekes budon toro aleu na sahou ta Kindrei.

⁴⁶Eme iy asehek i toro anya, “Sahou mene ndratorowenei asah i buku doh: Krais badeh, bwese maha ma iy imek, ya na len taloh ja kameh iy amak ja.

⁴⁷Ma sahou ta nyalan winiyan tubuni ndrine iri, ma winiyan sikine karei ma lomondra ndra-in tiri iu, na boto-on ta nyaran. Ya sahou doh badeh, kudu Jerusalem bwena, ano katiye kili bolo kon munyak tinan mari.

⁴⁸Ya ado dah badeh, kasehek nyala lakou mari ado ndratou dah.

⁴⁹Ma jo kameh suni lakou mene tama mene tandrakan ta aliy badeh kameh, ewek tado. Arile, ado badeh, kado kon tinan dah kado, winiya ado le barakohok boto-on badu loken.”

⁵⁰Ano iy kuhi oro ame len ta kon tinan ame loboho Betani, ano iy suruni minen i loke ma iy edeu nyosowan i la-u oro.

⁵¹Eme iy edeu nyosowan i la-u oro le badeh, ma Kindrei andrei iy iu i loken bolo kandrah.