SAN LUCAS 24:27-51

²⁷Oncan opehualoc quinnonotzalo ica in Tlahcuilolten tlen oquihtohque ica Yehhuatzin. Omopehualtic ica in iamahuan in Moisés huan ijcon omochiu ica nochin inon tlayolchicaucamen.

²⁸Ihcuac oahsitayahque ipan in altepetl canin oyahyaya, in Jesús omochiu quen san opanolotaya.

²⁹Huan yehhuan otetlatlautihque: ―Mamocahualo tohuan, tleca yitiotlac. Yitlapoyaucan. Oncan in Jesús inuan ocalacohuac huan omocahualoc.

³⁰Huan ihcuac omotlaliloc iixpa in mesa inuan, Yehhuatzin omoan in pantzin huan omotiochiu huan omoxehxeluihque.

³¹Ic inon tlen omochiu inixpa, ijcon oteixmatque Yehhuatzin in Jesús. Oncan Yehhuatzin san tlama oteixpolohque.

³²Huan yehhuan omoluihque se huan oc seya: ―Tel, ¿ahmo nele hasta otechyolpacti ihcuac otechualnonotzalotaya in Itlahcuiloltzin ipan in ohtli?

³³Oncan yehhuan ahmo ocachi omochixque. Niman omocuepque Jerusalén. Huan oquinahsitohque canin omosentlalihtoyahque in mahtlactli huan se tetiotlatitlaniluan ihuan oc sequinten.

³⁴In tetiotlatitlaniluan oquiniluihque in inehuan: ―Ic nele in Totecohtzin oihxohuac den mijcamen, huan Simón oteitac.

³⁵Oncan inon inehuan oquinnonotzque quen opanoc ipan in ohtli, huan quen oteixmatque in Jesús ihcuac omoxehxelo in pantzin.

³⁶Huan ihcuac teca otlahtohticatcahque in Jesús, Yehhuatzin omonextiloc inepanco yehhuan. Oquintlahpaloloc huan oquiniluiloc: ―Xiyetocan cuali namehhuan.

³⁷Yehhuan tequin omomoutihque huan oquinehnehuilihque oquitzticatcahque se yehyecatl.

³⁸Huan Jesús oquiniluiloc: ―Tel, ¿tleca nanmomoutiyahque, huan tleca ijcon nanquiyolnehnehuiliyahque?

³⁹Xiquitacan nomahuan huan nocxihuan. Yiyeh nehhuatl. Xinechmachilican huan xinechitacan. Se yehyecatl ahmo quipiya itlacayo quen namehhuan nanquitahque nicpiya.

⁴⁰Huan ic oquiniluiloc inin, oquinnextililoc in teman huan tecxihuan.

⁴¹Huan quen opactoyahque, ayamo oquineltocaque huan quen tel oquimatque. In Jesús oquiniluiloc: ―Tel, ¿nanquipiyahque tlen nanquicuasque?

⁴²Oncan otemacaque se pedazo michi tlapohpoxoli ihuan chihton nectli.

⁴³Huan Yehhuatzin omocuilihque huan omocua inixpa.

⁴⁴Huan niman oquiniluiloc: ―In tlen onechpanoc, yehhua in tlen onamechiluic ihcuac oc namohuan onicatca. Oquipiyaya tlen tzonquisas ica nehhua quen ca itlanahuatil Moisés huan ipan iamahuan in tlayolchicaucamen huan ihtech in salmos.

⁴⁵Oncan oquinmatiltiloc ica in Itlahcuiloltzin.

⁴⁶Huan oquiniluiloc: ―Ijcon ca tlahcuiloli quen in Cristo quipiya tlen micohuas huan ipan yiyi tonali mopiya tlen ihxohuas den mijcamen.

⁴⁷Huan tlanonotzasque ica Tetocahtzin nohuiyan ipan in tlalticpactli. Pehuasque de Jerusalén quiniluisque quen mamoyolcuepacan huan ijcon quintlapohpoluilos intlahtlacol.

⁴⁸Namehhuan in nantlachipahuanimen ica inin tlahtolten.

⁴⁹Xicmatican, namechtitlanis ica tlen Nohueyitahtzin otechcaquiltiloc. Ic inon ximocahuacan nican Jerusalén hasta ic nanquiselisque techicahualis tlen hualuilohuas den huehcapa.

⁵⁰Oncan Jesús oquinuicaloc huehca den altepetl hasta Betania, huan omasohualoc ic oquintiochihualoc.

⁵¹Huan ic otlan quintiochihualo, omoxeloloc de yehhuanten huan otehuicaque neluicac.