San Lucas 24:27-51

²⁷Ijkuakó Jesús opé kinmajsikamatiltia itlajkuilol n Moisés iwa n profetas kan tlapoah de Ye.

²⁸Ijkuak okalakitoh Emaús, Jesús omochi kemi ok oyaya okachi tlayakapa.

²⁹Pero yejwah okitlatlautijkeh mamokawa, iwa okilijkeh: —Ximokawa towah, yopé tleyua. Ijkuakó Jesús okalak itech non altepetl iwa omoka inwah.

³⁰Iwa ijkuak yoewatoka inwah kan motlamajsewiskiah, okónanki n paj, omotlasojkama inawak Dios, iwa okinmajmák makimomajsewikah.

³¹Ijkuakó okimachilijkeh kemi owalmoixtlajtlapojkeh, iwa okiyekixmatkeh Ye n Jesús, pero Ye san owalpoliwik.

³²Iwa yejwah opé kimoliah: —Satlawel otiyoltlatlayah keman otechtlapowijtiwalaya itech ojtli, noiwa kemi otechilijtiwalaya tlan kijtosneki itlajkuilol Dios.

³³Ijkuakó, owalmokeketskeh okonankeh ojtli iwa omokopkeh Jerusalén; ompa okinmajsitoh n májtlaktli iwa n se itlamachtijkawah iwa n oksikimeh non ompa okatkah,

³⁴iwa yejwah okimilijkeh: —Milák, n Toteko Jesús yomoyoliti, iwa n Simón yokitak.

³⁵Satepa yejwah ome okinmatiltijkeh tlan omochijkeh itech ojtli, iwa okimilijkeh kenijki okiyekixmatkeh n Jesús ijkuak okitlajkotlápanki n paj.

³⁶Itlamachtijkawah okimolijtokah tlan omochijkah, ijkuakó Jesús owalmonexti intlajko.

³⁷Yejwah saikpanoa omomojtijkeh iwa okiyejyekoliayah chamo okitlajtlatokah se espíritu.

³⁸Pero Jesús okinmili: —¿Tleka nonmotlajtlachialtiah? ¿Amo nonkineltokah kox Ne?

³⁹Xikinmitakah nomawah iwa nokxiwah. Techtelkokah iwa techitakah; porke se espíritu amo kipia inakayo nion iomiowah kemi Ne nikimpia.

⁴⁰Ijkuak Jesús ijkó okinmili, okimititih imawah iwa ikxiwah.

⁴¹Pero ken opakmiktokah iwa ok omotlajtlachialtijtokah, amo okiyekneltokayah kox Ye n Jesús, yika Jesús okinmili: —¿Nonkipiah itla tlan se kimomajsewis?

⁴²Ijkuakó okonmakakeh tlajko michi tléwaki,

⁴³iwa Ye okiseli iwa okimomajsewi inmixpah.

⁴⁴Otlanki Jesús okinmili: —Tlan yonimochi ye tlan onomechilijka ijkuak onikatka nomowah. Onomechili nochi tlan ijkuilitok itech itlanawatil Moisés iwa itech intlajkuilolwah n profetas iwa itech salmos, ye tlan nimochiwaskia.

⁴⁵Ijkuakó n Jesús okinmajsikamatilti tlan okijtoaya itlajkuilol Dios,

⁴⁶iwa okinmili: —Nochi ni ijkuilitok iwa ijkó Ne onimochi, porke saman nimikiskia, iwa ipan eyi tonati nimoyolitiskia.

⁴⁷Itech Notoka xikimilikah kenijki moyolpatlaskeh inawak Dios iwa kenijki kintlapojpolwiliskeh de intlajtlakolwah. Xipewakah nika Jerusalén iwa satepa itech nochteh tlalmeh de nin tlaltíkpaktli.

⁴⁸Nomejwah ononkitakeh tlan onipanok.

⁴⁹Techkakikah, Ne nomechaltitlanilis tlan Notajtsi onomechkakiti. Pero xiyetokah nika Jerusalén, asta ijkuak nonkiseliskeh n weletílistli non wits de ilwikak.

⁵⁰Satepa, Jesús okinwík itlamachtijkawah asta Betania. Ompa okinmajkok imawah iwa okintiochi.

⁵¹Iwa ijkuak okintiochijtoka, omoixkoyanti iwa okiwikakeh ilwikak.