San Lucas 24:27-51

²⁷Chiyru guzulo caguixteeny lodeb xi zelo irate ni zéed lo xquiits Dios pur laany. Guzulony cun de librɨ xte Moisés ax güelaatecny cun irate de librɨ ni bcuaa de profet.

²⁸Chi bdzɨndeb guɨdx rut zédeb, Jesús baanny zec ni chalaaru chiany.

²⁹Per laadeb baandeb juers laany par yáanny, raipdebny: —Biannébiu dunnɨ, te agudxini, ne ayiiu guxinni. Chiyru biiu Jesús par yannény laadeb.

³⁰Ne chi zubnény laadeb lo mɨlly ax cuáany guechtily, chiy chi gulull bdeedny gracy Dios ax bllullny guechtilqui par bdeedny laadeb.

³¹Hóracqui gucdeb zec ni teste bllal bsloni ax bambeedeb laany. Per chiy gunitlogacny,

³²ax raipy tubybɨ stubybɨ: —¡Niycazaquɨy quesentiandquɨza zacru xquel bziiennɨ chi ziopnénny nez, chi caniiny dunnɨ xi zelo ni rnii lo xquiits Dios!

³³Chiy quɨtru guleztideb, biunezgacdeb ax biecquideb par Jerusalén, rut dxasaa tsɨbtuby xpɨny Jesús cunru de xcumpnierdeb.

³⁴Chiy raipdeb de bnietqui: —Didxldícpacquɨy dec agubány Xtadnɨ Jesús, ne abliulony lo Simóny.

³⁵Chiyru laadeb beedeb diidx xa xquel guc chi zédeb nez, ne xquel ni bambeedeb Jesús chi bllullny guechtily.

³⁶Zeczi cayueedeb diidx xte de cosqui, chi bliulo Jesús glaytideb ax bguaapnydios laadeb guniiny: —Dios iguaadny laat guelnaldiulaaz.

³⁷Laadeb quesentiand bdxalodeb ne bdxibzadeb, pur ni baandeb xgab dec tuby spírit bɨngutiy gunádeb.

³⁸Per Jesús raipy laadeb: —¿Xínii rdxibtɨ? ¿Xínii runtioplaaztɨ?

³⁹Gulguiaa de naa ne de niia. Lagac narenɨng. Gulguaald ne gulguiaa nare, te pur tuby spírit quɨt nátini de dzɨt ne de beel zec ni rianlot nare.

⁴⁰Chi guniiny ziy ax bliuuny de naany ne de niiny.

⁴¹Per laadeb zeczi quɨt reldilaaztidebny ne de tant ni rzaclaazdeb ne rdxalodeb, ax raipny laadeb: —¿Ta nuu xi naptɨ iquiinia?

⁴²Chiyru bdeeddeb tuby ldaa beld biguii cun tuby ldaa dzɨny,

⁴³ax cuánny de cosqui bquiiny nez lodeb.

⁴⁴Chiyru raipny laadeb: —Ni agudeda niy ná irate ni guniia laat chi zeczi zuguaníaa laat: dec ná par gac irate de cos ni cá lo librɨ pur naa, zeclɨ lo librɨ xte Moisés cun lo de librɨ xte de profet, ne lo librɨ xte salmos.

⁴⁵Chiy hóracqui bxalny xquelriendeb par gucbeedeb ni rnii lo xquiits Dios,

⁴⁶ax raipny laadeb: —Lo xquiits Dios rnii dec Crist ná par teedny guelzii, ne ni rion dxi, sbíi ibánny stuby.

⁴⁷Chiy desdɨ Jerusalén sulo irɨɨch diidx axtquɨ iduibte lo guɨchliu, dec nuu perdón par irate de bniety ni yialaaz pur de xtuldni ne chaldilaazdeb nare.

⁴⁸Laat nát testigu xte irate de cosquɨ.

⁴⁹Ne nare sxiaalda par laat ni agunii Xtada. Per gulsuguaazic láani guɨdx Jerusalénquɨ axtisy icáat guelrnabee ni gueed desde llayabaa.

⁵⁰Chiyru bdiané Jesús laadeb láani guɨdx Jerusalén, güenény laadeb nez Betania, ax bldiasny de naany banldeeny quiadeb.

⁵¹Ne lalzi ni cayunldeeny quiadeb, ax guasny zégacny yabaa.