Lukas 24:27-51

²⁷A ap kotin kawewe ong ira kisin likau kan duen pein i, tapiada ni Moses kokodo lel saukop akan.

²⁸Irail ap koren iong kanim, me irail koko ong. I ari kasongesong ira, dene a pan kotin daulul.

²⁹Ira ap ngidingidiki i potoan ong: Kom kotikoteta re at, pwe a pan wasa pongier o ran wet koren iong imwisokela. A ap kotilong ong nan im o, pwen mimieta re ra.

³⁰Kadekadeo ni a kotin iang ira ni tepel o, a kotin limada prot, laolaoki, a lao pilitiki pena, a kotiki ong ira.

³¹Mas ara ap pad pasanger, ira ap asa i. A ap kotin soredi sang mo ’ra.

³²Ira ap inda nan pung ara: Mongiong ata sota mokimokid ni a kotin mamasani ong kita pon al o, ni a kotin kawewe ong kita kisin likau kan?

³³Ira ari uda ni auer ota o purelang Ierusalem, o diarada ekamen ko, o me iang ir, kot pena wasa takis,

³⁴Katitiki: Nan melel Kaun o kotin iasadar o pwara dong Simon,

³⁵Ira ap kasokasoi, me wiauier nani al o, o duen ara asaki i a pilitiki pasang prot.

³⁶A ni ar masan pena mepukat, pein Iesus ap kotin pwara dong nan pung arail masani ong ir: Komail popol!

³⁷Irail ari masapwekadar o wapondar, o re kiki ong, me ani men, me re udial.

³⁸A kotin masani ong irail: Da me komail masak ki? O menda lamelam pukat mi nan mongiong omail?

³⁹Komail kilang pa i kat o na i kat, pwe pein ngai ta. Doke ia o kilang, pwe ani sota kin uduk o ti, duen omail kilang ia.

⁴⁰A lao masani mepukat, ap kasale ong irail lim a o aluwilu a kan.

⁴¹A ni ar sota non kamelele pweki ar peren o puriamuiki, ap kotin masani ong irail: Sota kan omail met?

⁴²Rap ki ong i kisan mam inin o onik.

⁴³I ari konot mo ’rail.

⁴⁴A kotin masani ong irail: I masan akan, me I ki ong komail er, ni ai mimieta re omail, pwe karos en pwaida, me intingidier duen ngai nan kapung en Moses, o saukop akan, o psalm akan.

⁴⁵I ap kotin kalolikongi irail, pwe ren dedeki kisin likau kai.

⁴⁶O kotin masani ong irail iduen a intingidier, o iduen udan kalokolok en Kristus, ap maureda sang ren me melar akan ni ran kasilu,

⁴⁷O padapadaki ong wei karos ni mar a, ren kalula, pwe dip akan en lapwada, a pan tapida nan Ierusalem.

⁴⁸A komail me saunkadede en mepukat.

⁴⁹A kilang, I pan kadara dong komail, me Sam ai inaukidar. A komail pan mimieta nan kanim o, komail lao audaudekier manaman sang poa.

⁵⁰A kotin kalua ir alang Petanien, kotikida lim a, kapai irail ada.

⁵¹Kadekadeo ni a kotin kapal ir ada, a kotiwei sang irail, kotidala nanlang.