Lucas 24:27-51

²⁷Cuejatibunecuare tujatu ecatse dutya tuque eque huenetanacuareque Yusuja quisaratiju. Moisésra huenecuare eque tujatu ecatse cuejatibunecuare. Cuejaajecuaretu Yusu equeque quisarati cuejaqui cuanara huenecuare cuanaque. Jadya tsehue tujatu ecatse adebamerecuare yuneri cuitadya Yusura eje bucha judadiya jadya acuare eque cuitadya judadichineque.

²⁸Tuna cuayaque epuju junatitsutu Jesús cuaya jiudya jutidya jucuare.

²⁹Tatse tatse canerecaticuare tuhuadya tuque tatse tsehuedya junatishacara aatsu. —Rehuadya anicue yatse tsehue. Amenari chinehua. Apunayari amena, —jadya tatsejatu acuare. Jadya juatsutu Jesús nubidirucuare tatse tsehue.

³⁰Mesaju tuna anibutecuare araara ishu. Ara ishu tujatu pan inacuare. Pan inatsutu Jesúsra Yusu acuare: —Yusurupai mique aya, Tata, mira ecuana jeeque earaqui tyahua tibu. Yusurupai jadya aatsu tujatu ecatse tyacuare cuesitsu, cuesitsu.

³¹Jesúsra pan cuesitsu tyayaju tatse chamacama Yusura adebamerecuare tuque Jesúsque. Jadya juatsutu aputacuare tatse tsehueque.

³²Cacuejaticuare tatse: —Pusha ama cuitadya yatse jida cabatihua. Anajacata ishu tuque yatse ahua, tura Yusuja quisarati pana cueja abeabeyaju, —jadya tatse cacuejaticuare.

³³Jadya juatsu tatse mesa juque yume netitsura juatsu dirunucacuare Jerusalénju. Judirunucatsu tatse yume barediru cuitadya jucuare peya cuana peadya tunca peadya earacana Jesúsra mepehua cuana queja, tumebaedya peya cuana Jesús queja catyatihua cuana queja.

³⁴Tatse tuhua nubidiruhuaju tatse tuhua jucuare cuanara jadya atsacuare: —Pusha amadyatu Ecuana Cuatsashaquique netitsuranucahua. Chacha tuque. Pedro quejatu cabameretihua, —jadya tunajatu ecatse atsacuare.

³⁵Jadya atsayajudya tatsejatu cuejacuare tatse Emaúsju cuayaque eje bucha juhuaque. Jadya tatse cacuejaticuare: —Jesúsra pan cuesiya baatsu tuque yatse chamacama adebahua.

³⁶Tuna quisaratiya jarijutu Jesús cuitadya cabamereticuare tuhua tuna queja. —Netsapeume inime, —jadya tujatu ecana acuare isarayaque.

³⁷Tuna bacue dyaque ejecutana cuita, bajida jadya jucuare. Yatanana cuana baya bucha tunajatu inime tupucuare.

³⁸—¿Eje bucha juatsu micuana dyaque cuita ejecutana? ¿Eje bucha juatsu micuanara ique ama bucha baya? ¿Eje bucha juatsu micuana cabacaduratiya “¿Airi riyaque?”, ique ejuuque adebaya ama bucha.

³⁹Nepetacue ecue emetucu, ecue ehuachi jadya. Idya cuitadya ique. Nejabacue. Nepetacue ique. Yatananajatu aijama erami ni etsau micuanara ecue baya bucha, —jadya tuna Jesúsra acuare.

⁴⁰Jadya cuejatsu tujatu ecana bamerecuare emetucu, ehuachi jadya.

⁴¹Jadya bacatsu tuna anajacatacuare. Pureama ecana jucuare. Pana cueyane ama jari tunajatu acuare tuque Jesúsque. Pana caadebamereti juishu tujatu ecana jadya acuare: —¿Aniya micuanaja rehua ai ara ishuque? —jadya tujatu ecana bacaduracuare.

⁴²Jadya juyaju tunajatu tyacuare peadya cuesi jae ecuahuique, huaja jadya.

⁴³Tyayaju tujatu inatsacuare. Inatsu tujatu aracuare.

⁴⁴Jadya juatsu tujatu ecana acuare: —Ique iyetama jariju, ique micuana tsehue jariju, micuana cuejachine: “Yusura tuja quisaratiju cuejacuare bae cuitadya ique judadiya, Moisés eque, Yusu equeque quisarati cuejaqui cuana eque, Salmos cuana huenequi jucuare cuana eque jadya”. Riya cuita eje bucha juchine cuanaquetu dutya era micuana jadyatu judadiya jadya achine equedya juchine, —jadya tuna Jesúsra acuare.

⁴⁵Jadya juatsu tujatu ecana huecashacuare Yusuja quisarati ehueneque.

⁴⁶—Riyaquedya tu Yusura jadyatu judadiya jadya acuareque. Riyaquedya tu jadya ehueneque: “Mesías tu canerecati, maju jadya ishuque. Quimisha huecaca emajuquetu chacha netitsuranucabuque.

⁴⁷Mesiasja ebacaniju tuna cuabuque dutya queja quisarati cuejara. ‘Mesías queja catyatitsu necacuareticue inime, Yusura micuanaja jucha cuana tilla ishu’ jadya tuna cuejamerebuque. Cuejatibunebuque tunajatu Jerusalén eque. Tuequedya tuna dutya queja cuadishabuque”. Riyaquedya tu Yusura jadyatu judadiya jadya acuareque.

⁴⁸“Micuanaratu bahuadya ique eje bucha juhuaque. Jutaquiju peya cuana necuejacue dutya micuanara bachineque, bacachineque jadya.

⁴⁹Eratu cuadishaya micuana queja Ecue Etatara micuanaja cuadisha ana ahuaque. Neanicue jari rehuadya Jerusalénju ebarucueque Micuana Casaturaquique juetiya tupu, —jadya tujatu ecana acuare.

⁵⁰Jadya juatsu tuna Jesúsra dujucuare epu ebari juque, peya queja amaca Betania piji dyane. Emetucu tujatu tuna dyaque huesacuare. Jadya aatsu tujatu ecana acuare: —Yusuja casa micuana tsehue paju. Yusura necasaturacue.

⁵¹Jadya quisarati aatsutu dirucuare tuna quejaque. Barepajutu dujutanacuare.