Lukas 24:27-51

²⁷A sangaw pake nepasikkal na tekid ya ngamin nesurat nig mina Moses ikid na aglavun kiden ta palungu na araw, a netuldu na tekid ya uhohug na aglavun kiden, te dana linavun da ya ngamin dumatang tentu ta awena en para la pakeanak.

²⁸A sangaw nakaabikan kid na ta babali kiden nga datangan na duwa kiden, a kuman na magtalib mina i Hesus,

²⁹ammi ginamman na duwa kiden. “Magyan ka la bit tekami te furab na, magge hiklam na,” kunda tentu, ammi aweda para la amu ta intu. A gafu ta kumanen a sakā nehulun hapa tekid ta nagdulotan da en.

³⁰A tekiden nagaatubang ta pamurab da a nangalap i Hesus ta pan kapye na nepakimallak, a sangaw ginadgadwa na hapa ta duwa kiden.

³¹A ta nepangigawat na ta pan tekid a nagdakar ya mata da, a amu dan ta intu, ammi ta nepakaita da tentu a limitap hapa, a awedan naita.

³²“Anggem ta kuman na naglampaw ya nonot ta tentu en naguhohug tekita ta dalanen ta nepagsaned na ta surat kiden,” kunda.

³³A gafu ta kumanen a imikkat kid ta namuraban da en, a nagtugut kid, te manoli kid na ta ili na Herusalem. A ta datang da ten a nadatangan da nagaammung ya mafulu takday ituldu ni Hesus ikid na kadwan kiden nedagga tekid.

³⁴A tekiden simarok ta agyan na kahulun da kiden nagaammung a “O, matolay kad i Afu, a nakipaita kan te Simonin,” kun na nagaammung kiden tekid.

³⁵A yen hapa ya nepangibida na duwa kiden ta naita dan hapa ta dalanen; “A tentu en nanggadwa ta panen a naita min ta intu,” kunda.

³⁶A tekid para la nagbabida a ka-ma la nakipaita i Hesus ta tātangngan da a nakikumusta hapa tekid,

³⁷ammi sa nakagtut kid ta talaw da tentu te pahig da ta datay.

³⁸“Anu haman ta magtalaw kam? Kuman na awemuy ikayat mangurug ta matolayak.

³⁹Itan muy haman ya kamat ku kidin ikid na takkik kidin awa iyaken hala yan. Maski si-gedan dak petta amu muy, te awan haman ta bilsag ikid na tulang na datay ta kuman na barikin,” kunna tekid.

⁴⁰A pake nepaita na ya gafan na lansa kiden ta kamat na kiden ikid na takki na kiden.

⁴¹A matalak kid mina ta matolay, ammi intu nonotan da am had kunna matolay, a yen ta aweda para la pake kurugan. A gafu ta kumanen a nagadang i Hesus ta kanan na tekid; “Awan hud ta kanan muy sin? te manganak mina,” kunna.

⁴²A inatadan da mantu ta bilsag na ikan nga inasal da,

⁴³a kinan na hapa ta nagaatubangan da.

⁴⁴A sangaw nagbida ha tekid, “Dana nebar ku haman tekamuy ta magdulot hala sangaw teyak ya ngamin kiden nabida da ta lebru na kansyon kiden ikid na surat kiden ni Moses ikid na aglavun kiden,” kunna.

⁴⁵A pake netuldu na ya surat kiden tekid, petta maawatan da.

⁴⁶“Kumanen ya nesurat ta palungu araw petta amu muy mina ta mazigatan ikid na mapapasi ya Mangikerutanen tekamuy, kapye na matolay ta mekatallu na araw.

⁴⁷Yaga nesurat da hapa ta mepadangag mina ya ngagan na en ta ngamin tolay, petta magbabawi kid mina ta liwat da, a pakoman na kid hapa na Namaratu. A mappya mantu ta yen ya ipadangag muy ta ili na Herusalem, kapye muy ipadangag ta ngamin kiden lugar abat ta ngamin paglelehutin.

⁴⁸A ikamuy hapa ya makkamu mangipasikkal ta isin na damag,

⁴⁹te doban ku hala sangaw ya Kahalwa na Namaratu tekamuy ta kuman na nekari ni Damaken tekamuy, petta mapasinapān kam ta kasikan na Kahalwa na en. Ammi mappya ta magyan kam la bit ta ili in yan nga magindag ta iange na,” kunna tekid.

⁵⁰A ta nekabalin na en a pinohet na kid bit ni Hesus ta ili en. A tekid nakadatang ta ili na Betanya a neta-gay na ya kamat na kiden, a pinasinapan na kid.

⁵¹A tentu en nabalin nangpasinap tekid a yen hapa ya nepagtugut na en tekid, te timullu ta langit,