Luka 24:27-51

²⁷Motong la Yesu tani in ya taunu iwete nin betanga tina le imot yo tiwodo lo ye Rau ke Maro ye nga, ngan pang di. Ngan le imadit ye betanga yo iken ye rau ke Mose nga, le ilo ye rau yo ke di Maro koonoo nga le imot.

²⁸Ngan iye di tipa be iwetewete pang di le tidu potai pang ye malala tani in, le nga Yesu iyei tomonai ben be ipa le ikenen leu pang dama.

²⁹Bong ngan di galiunu ru tina, ngan tilele a tiwete panga nen, “Ai, nga ole amyong tayepe ngan, yesoo rrai a nga be bong.” Motong la ilo a lo iye di tiyepe nga.

³⁰Ye kene tani in lo tiyepe, le nga tiye Yesu la tiwur ye kookoowoo ke kaningi so, motong la ikaua porong atu a iwete lo ponana ki pang Maro ye, inbe itepala a be ikauu pang di yaru.

³¹Motong la se yaru matadi galanga, inbe tikilala Yesu. Bong ngan pattu leu be pilikbe mulu le ke be tikamata tiap.

³²Le nga yaru di tapdi tiwetewete nen, “Ona tiap! Yesu moolmool sa! Ngan nen le taye tapa dada a tasi, inbe iwete nin betanga yo iken ye Rau ke Maro ngan punu paidi nga, ngan la le tayetai ben ei ikan a ilolo lodo nga sa.”

³³Motong la palbe leu be yaru timadit tina ngan le timulu a tilo pang Yerusalem. Tilo a lo tipuske di aposol ke Yesu tina yo sangaul be atu nga, ngan tiye di tooltool kapala yo tiye di tiyepe nga. Le nga tigaua,

³⁴motong la di diedi tina ngan tikaua bingi pang di yaru. Tiyei ne, “Moolmool sa! Tool Mai imadit mulu oo, le ya taunu pombe pang Simon.”

³⁵Motong la di galiunu ru tina ngan tikaua bingi pang di lapau ye so yo titoo dada a tidu ngan pombe pang ye di i. Inbe tiwete pang di ye Yesu yo tikilla tiap le lo tiye tiwur a itepala porong be tikani, motong tikilla i.

³⁶Di galiunu tina ru ngan tiwetewete go, inbe palbe leu be Yesu ya taunu pombe le lo ikodo kataunu kidi, inbe iyei ne, “Lo silene ke Maro iken yang.”

³⁷Ngan tina pombe pang ye di nen nga, le nga titattadai welewele a titangarur, yesoo tiyeisa o tikamata markiaua.

³⁸Bong ngan Yesu iyei ne, “Ai, nga katattadai au yesoo? E nga yelei be lomim rru yau nen nga?

³⁹Oo, kakamata baek le kek, nga too. I au tani naii! Inbe man katokau a kakamatau, too. Ngan markiaua i, in medana le turana moolmool dawa ben au i tiap.”

⁴⁰Ngan Yesu tani in iwete pang di nen, motong la ipatnai baene le kene pang di a tikamata.

⁴¹Di tooltool tina tikamata ngan le lodi ponana kaiye, bong lodi rru go le titara lodi medana moolmool tiap. Motong la Yesu itor di nen, “Ang nga kamim so sa ke kaningi lapau?”

⁴²Motong la tikap i mene pattu panga.

⁴³Le nga ikap a matadi ikenen ye, inbe ikan.

⁴⁴Motong la iwete pang di aposol ki tina ngan nen, “Lomim tut ye kene yo ayang tayepe muku nga, ngan awete pang nen. Betanga le imot yo iken ye ger ke Maro yo iwete pang Mose a iwodo nga, inbe ye rau ke di Maro koonoo, inbe ye Rau ke Woungu nga, ngan ole kanono pombe yau le imot.”

⁴⁵Motong la Yesu ipamadit lodi ye betanga yo iken ye Rau ke Maro nga, le taun lodi galanga.

⁴⁶Le nga Yesu iwete pang di nen, “Betanga tina yo tiwodo ngan nen: Kirisi ole isolo masngana mai a imata, lo ngan be iken ye ke ru, le ye ke tol ki nga, ngan ole imadit mulu ye ni ke matenge.

⁴⁷Inbe tiwodo betanga nen, be di tooltool ole tila be la tiwetewete bingi dook mata ki pang di tooltool kapala. Bong kulkulunu ngan ole timadit nanga la Yerusalem nga, muku ngan, lo ngan be ole tipa a tila ye tana maimai nga le imot, inbe tiwetewete bingi tani pang di tooltool ye au ek. Le ole tiwete pang di nen, ‘Kumata be kaportak lomim ye dada dook tiap kiang yo kayei nga, ngan ole Maro igiri noonoo kiang.’

⁴⁸Ngan so le imot yo pombe a kakamata koot nga, ngan ang nga la be la kawetewete pang di tooltool ye nga.

⁴⁹Mukot yege ni nga, ngan Tamak ipamede betanga medana nen, be ole ikaua Amunu Silene pang. Le nga au i ole alo, lo ngan be ayawari a isi pang yang. E ang nga kayege Yerusalem be, kayepe nanga le lo Maro Amunu Silene tani in ipa ye malala ke Maro a isi ikaua gurana mai pang ngan.”

⁵⁰Motong la Yesu ikap di galiunu tina a tipa le tidu potai pang Betani. Motong la Yesu iyiti baene, inbe ipamede di ye betanga dook mata, a be nen ngan Maro iyei urata dook mata pang di.

⁵¹Ye kene tani in itoro Maro be ipamede di galiunu tina nga, ngan le iwetewete nen go, inbe Maro ikauu a iyege di, inbe ilo pang ye malala ke Maro.