SAN LUCAS 24:27-51

²⁷Liꞌ nguxana Jesús nguluꞌu yu chaꞌ jiꞌi̱ nguꞌ, ñaꞌa̱ chaꞌ nu cua nscua lo quityi cusuꞌ chaꞌ jiꞌi̱ ycuiꞌ yu. Nguxana nguꞌ loꞌo quityi nu nguscua jyoꞌo Moisés, loꞌo liꞌ nchcuiꞌ nguꞌ lo lcaa quityi nu nguscua nguꞌ nu ngua tuꞌba jiꞌi̱ ycuiꞌ Ndyosi nu ngua saꞌni.

²⁸Cua tyalaa ti nguꞌ ca quichi̱ su tsaa nguꞌ, liꞌ nguaꞌni Jesús ñiꞌya̱ si na tya tsaa la yu tyucui̱i̱ tyijyuꞌ la.

²⁹Pana ndatsaa tsa nguꞌ jiꞌi̱ yu chaꞌ tyanu yu slo nguꞌ. Nacui̱ nguꞌ jiꞌi̱ yu: ―Tyanu nuꞌu̱ loꞌo cua chaꞌ cua ngusi̱i̱ tsa juani, cua ca talya ti. Liꞌ ndyatí̱ Jesús ndyaa niꞌi̱ chaꞌ tyanu yu loꞌo nguꞌ.

³⁰Pana nu loꞌo cua ngaꞌa̱ yu loꞌo nguꞌ toꞌ mesa, liꞌ ngusñi yu sca xlyá, ndya yu xlyaꞌbe jiꞌi̱ ycuiꞌ Ndyosi; loꞌo liꞌ ngusaꞌbe yu xlyá biꞌ, chaꞌ ta yu jiꞌi̱ nguꞌ.

³¹Biꞌ hora laca nu ndyaala cloo nguꞌ, chaꞌ ndyuloo tsoꞌo nguꞌ jiꞌi̱ yu. Liꞌ nguliji yuꞌu yu slo nguꞌ, ngaꞌaa naꞌa̱ nguꞌ jiꞌi̱ yu liꞌ.

³²Hora ti nacui̱ tsaca jiꞌi̱ tyaꞌa: ―¿Ha ná chañi chaꞌ tsoꞌo tsa ngua tiꞌ na? ―nacui̱―. Ti̱ ti ngutiꞌi̱ cresiya jiꞌna loꞌo lijya̱ ycuiꞌ nchcuiꞌ loꞌo na tyucui̱i̱, nu loꞌo nda yu chaꞌ loꞌo na, ñiꞌya̱ nu nchcuiꞌ quityi cusuꞌ ―nacui̱ jiꞌi̱ tyaꞌa.

³³Liꞌ xtyiꞌi ti ndyanu nguꞌ, hora ti ngusñi nguꞌ tyucui̱i̱ nguxtyu̱u̱ nguꞌ ñaa nguꞌ nde Jerusalén chaca quiyaꞌ. Ca biꞌ ndyalaa nguꞌ ca su ndyuꞌu tiꞌi̱ nu tii chaca tyaꞌa nguꞌ nu ngua tsaꞌa̱ jiꞌi̱ Jesús biꞌ, loꞌo xi xaꞌ la tyaꞌa ndyaꞌa̱ nguꞌ ndiꞌi̱ nguꞌ biꞌ.

³⁴Hora ti nchcuiꞌ nguꞌ nu ngaꞌa̱ niꞌi̱ biꞌ loꞌo nguꞌ nu ndyalaa ca ti liꞌ: ―Chañi chaꞌ cua ndyuꞌú Jesús chaca quiyaꞌ ―nacui̱ nguꞌ―. Cua naꞌa̱ Simón jiꞌi̱ yu.

³⁵Loꞌo nu nguꞌ nu ndyaa nde Emaús ni, nda nguꞌ chaꞌ loꞌo tyaꞌa nguꞌ ñiꞌya̱ nu ngua jiꞌi̱ nguꞌ tyucui̱i̱; nacui̱ nguꞌ ñiꞌya̱ ngua chaꞌ ndyuloo nguꞌ jiꞌi̱ ycuiꞌ Jesús nu loꞌo ngulacua̱ yu jiꞌi̱ xlyá biꞌ.

³⁶Tya nchcuiꞌ ti nguꞌ jiꞌi̱ chaꞌ biꞌ loꞌo tyaꞌa nguꞌ, loꞌo liꞌ ñaa ycuiꞌ Jesús. Ndatu̱ yu claꞌbe laja nguꞌ chaꞌ chcuiꞌ yu loꞌo nguꞌ: ―Ti̱ ti tyiꞌi̱ tyiquee ma̱ ―nacui̱ yu jiꞌi̱ nguꞌ biꞌ liꞌ.

³⁷Ntsi̱i̱ tya nguꞌ ndiꞌi̱ nguꞌ liꞌ, nclyacua tsa tiꞌ nguꞌ, chaꞌ sca cuiꞌi̱ ti naꞌa̱ nguꞌ, ntiꞌ nguꞌ.

³⁸Liꞌ nchcuiꞌ Jesús loꞌo nguꞌ biꞌ: ―¿Ni chaꞌ laca ntsi̱i̱ ma̱ ndiꞌi̱ ma̱? ―nacui̱―. ¿Ni chaꞌ laca nclyacua tsa tiꞌ ma̱? ―nacui̱ yu jiꞌi̱ nguꞌ―.

³⁹Ñaꞌa̱ ma̱ yaꞌ naꞌ, ñaꞌa̱ ma̱ quiyaꞌ naꞌ; la cuiꞌ ti naꞌ laca̱. Calaꞌ ma̱ ꞌna, chaꞌ taca jlya tiꞌ ma̱ chaꞌ naꞌ laca̱. Sca cuiꞌi̱ ti ni, ná ntsuꞌu cuañaꞌ jiꞌi̱, loꞌo juaꞌa̱ tyijya̱ ná ntsuꞌu jiꞌi̱; pana cua naꞌa̱ ma̱ chaꞌ ntsuꞌu cuañaꞌ ꞌna ―nacui̱ Jesús jiꞌi̱ nguꞌ.

⁴⁰Liꞌ nguluꞌu yaꞌ ycuiꞌ yu, nguluꞌu quiyaꞌ yu jiꞌi̱ nguꞌ.

⁴¹Ná ngua tyuloo tsoꞌo nguꞌ jiꞌi̱ yu xquiꞌya chaꞌ chaa tsa tiꞌ nguꞌ ngua, chaꞌ ndube tsa tiꞌ nguꞌ ñaꞌa̱ nguꞌ jiꞌi̱ yu. Biꞌ chaꞌ nacui̱ Jesús jiꞌi̱ nguꞌ: ―¿Ha ntsuꞌu na cacu naꞌ jiꞌi̱ ma̱?

⁴²Liꞌ nda nguꞌ sa yuꞌbe cualya ngüiꞌi jiꞌi̱ yu, loꞌo sa yuꞌbe jbleꞌ cuiñaaꞌ cuityu̱.

⁴³―Tsoꞌo ―nacui̱ Jesús liꞌ. Ngusñi yu jiꞌi̱ na biꞌ, ndyacu yu jiꞌi̱ nde slo nguꞌ liꞌ.

⁴⁴Loꞌo ti nchcuiꞌ yu loꞌo nguꞌ liꞌ: ―Chaꞌ nu ngua ca ti ꞌna, biꞌ laca chaꞌ nu cua ndachaꞌ naꞌ jiꞌi̱ ma̱ loꞌo tya ndiꞌi̱ naꞌ loꞌo cuꞌma̱ tya tsubiꞌ la ―nacui̱ yu―. Cua nacui̱ naꞌ jiꞌi̱ ma̱ chaꞌ ngaꞌa̱ chaꞌ caca ꞌna lcaa chaꞌ nu cua nscua cuentya ꞌna lo quityi nu nguscua jyoꞌo Moisés, loꞌo juaꞌa̱ lo quityi nu nguscua jyoꞌo nguꞌ nu ngua tuꞌba jiꞌi̱ ycuiꞌ Ndyosi nu ngua saꞌni, loꞌo juaꞌa̱ lo quityi Salmos nscua chaꞌ biꞌ.

⁴⁵Liꞌ nguluꞌu Jesús jiꞌi̱ nguꞌ ñaꞌa̱ chaꞌ nu nchcuiꞌ quityi cusuꞌ biꞌ.

⁴⁶Nacui̱ yu jiꞌi̱ nguꞌ: ―Cua saꞌni nscua chaꞌ cajaa ycuiꞌ naꞌ nu laca naꞌ nu Cristo biꞌ, loꞌo tsa̱ nchca tyuna loꞌo cua ngujuii naꞌ, liꞌ nscua chaꞌ tyuꞌú naꞌ chaca quiyaꞌ.

⁴⁷Liꞌ ntsuꞌu chaꞌ ta nguꞌ chaꞌ jiꞌi̱ ycuiꞌ naꞌ loꞌo ñati̱ tyucui ñaꞌa̱ chalyuu. Nde Jerusalén xana ma̱ cachaꞌ ma̱ chaꞌ biꞌ jiꞌi̱ nguꞌ clyo. Ngaꞌa̱ chaꞌ chcuiꞌ ma̱ loꞌo ñati̱ chaꞌ ca tyujuꞌu tiꞌ nguꞌ jiꞌi̱ chaꞌ cuxi nu ntsuꞌu tyiquee nguꞌ, chaꞌ xtyanu nguꞌ jiꞌi̱ chaꞌ cuxi nu nduꞌni nguꞌ; liꞌ cuaꞌni clyu tiꞌ ycuiꞌ Ndyosi jiꞌi̱ lcaa quiꞌya nu ntsuꞌu jiꞌi̱ nguꞌ.

⁴⁸Loꞌo cuꞌma̱ ni, taca chcuiꞌ ma̱ cuentya jnaꞌ, chaꞌ jlo tiꞌ ma̱ lcaa ñaꞌa̱ nu cua ngua ꞌna.

⁴⁹Loꞌo juaꞌa̱ ta naꞌ Xtyiꞌi ycuiꞌ naꞌ jiꞌi̱ ma̱, chaꞌ cua nchcuiꞌ Sti naꞌ chaꞌ ta Ni Xtyiꞌi ycuiꞌ Ni jiꞌi̱ ma̱; biꞌ chaꞌ tyanu ma̱ nde Jerusalén re, ñaꞌa̱ cuayáꞌ nu caja juersa jiꞌi̱ Xtyiꞌi ycuiꞌ Ndyosi jiꞌi̱ ma̱. Tyuꞌu biꞌ nde cua̱ chaꞌ ca̱a̱ tyanu neꞌ cresiya jiꞌi̱ ma̱.

⁵⁰Liꞌ nduꞌu Jesús quichi̱ Jerusalén biꞌ, ndyaa loꞌo yu jiꞌi̱ nguꞌ ca toꞌ quichi̱ Betania biꞌ. Nde biꞌ ngusicua̱ yaꞌ Jesús chaꞌ culacua̱ yu jiꞌi̱ nguꞌ.

⁵¹Laja loꞌo nclyacua̱ yu jiꞌi̱ nguꞌ, hora ti nduꞌu yu ndyaa yu nde cua̱ liꞌ.