Luku 1:11-77

¹¹Ŋɔi ɑmɑlekɑi Ilɑɑɔ̃ ɡɔ í nɑɑ siɛ, wɑ leekĩ si ɑwɔ njɛi bi ku jo tulɑreu.

¹²Iyi Zɑkɑri í yɔɔ ŋɔi ziɡiɛ í dɑ, nɔ njo í muu hee í cɑɑ.

¹³Ammɑ ɑmɑlekɑu í sɔ̃ɔ í ni, mɑɑ̀ jɔ̀ njo ku muɛ, Zɑkɑri. Ilɑɑɔ̃ í ɡbɔ kutɔɔɛ. Elizɑbɛti ɑboɛ ɑ́ bíɛ ɑmɑ inɛmɔkɔ nɔ i sɔɔ Zɑ̃ɑ.

¹⁴Aɑ nɛ inɔ didɔ̃ nlɑ nlɑ nɔ inɛ nkpɔ ɑ́ wɛɛ do inɔ didɔ̃ nɑ kubiɛ,

¹⁵si nɑ iyi í jɔ̀ inɛ nlɑi ɑ́ jɛ si wɑjui Aɔ̃ Lɑfɛ̃ɛ. Kɑɑ mɔ vɛ̃ɛ, hee mɑ́ jɛ ɑtɛ̃ kulele mmu ɡɔ. Nɔ ɑ́ kɔ̃ò Hundei Ilɑɑɔ̃ hɑi inɔi iyeɛ.

¹⁶Á jɔ̀ inɛi Izirɛli nkpɔ ku kpɑɑsi idɔ nɔ ɑ nyi wɑ bi Aɔ̃ Lɑfɛ̃ɛ nŋɑ.

¹⁷Nŋui ɑ́ cuɑɑ Ilɑɑɔ̃ nɔ ku yɛ bɛi Elii wɑlii nlɑi tɑkou. Gbuɡbɑ̃ɛ mɔ ɑ́ yɛi bɛi ti Elii. Á jɔ̀ bɑɑ do ɑmɑ nŋɑ ŋɑ ɑ ɡbɔsi njɛ, nɔ ɑ́ jɔ̀ hɑi ɡbɔ ide ŋɑ mɔ ɑ ce lɑsɑbu bɛi inɛ dee dee ŋɑ.

¹⁸Ammɑ Zɑkɑri í sɔ̃ ɑmɑlekɑu í ni, ɑmu wee ǹ ɡbo tɑ̃ nɔ ɑbom mɔ í ce inɛ nɡbo. To, bɛirei ɑn ce n mɑ̀ iyi ideu ɑ́ ce.

¹⁹Ŋɔi ɑmɑlekɑu í jɛɑɑ í ni, ɑmui Gɑbiɛli. Amui ǹ yɑ n wɑ bi Ilɑɑɔ̃ n mɑɑ n ceɑɑ icɛ. Nŋui í bɛm wɑ n nɑ n bɑɛ ide ku fɔ nɔ n sisiɛ lɑɑbɑɑu jiidɑu ihɛ̃.

²⁰Ammɑ i kù dɑsi idem nɔu nɑɑnɛ bɑɑ do iyi ɑ́ nɑ ku ce bii wɑɑtiɛ í to. Nɑ nŋu, ɑɑ dekĩ, i kɑɑ yɔkɔ i fɔ ide mɑ́ í ɡbe ɑjɔ iyi ideu í cei.

²¹Wee inɛ ŋɑ ɑ̀ wɑɑ deɡbe Zɑkɑri, nɔ ɑ̀ biti do iyi wɑ kpɛ inɔ kpɑsɛ̃i Ilɑɑɔ̃ bɛ.

²²Iyi í fitɑ wɑ, kù yɔkɔ ku bɑ ŋɑ ide ku fɔ mɑ́, ŋɔi ɑ̀ mɑ̀ iyi í ce kuyɛ ɡɔi si inɔ ileu bɛ. Wɑ bɑ ŋɑ ide ku fɔ do ɑwɔ ku nyisi iyi ntɔi, ɑmmɑ kù yɔkɔ ku fɔ ide do ɡɛlɛ.

²³Si ɑnyii kuyɛu, Zɑkɑri í mɔsi icɛɛ mɑ́ hee í koo í to ɑjɔ iyi icɛɛ í kpɑ iri inɔ kpɑsɛ̃ bɛ. Ŋɔi í nyi ideɛ.

²⁴Si ɑnyiɛ, Elizɑbɛti ɑboɛ í bɑ ɑsĩ, nɔ wɑ sinɡɑ ɑrɑɛ zɑkɑi cukpɑ miu, í ni ,

²⁵cɔ mii iyi Ilɑɑɔ̃ í ceem. Í cɔm do iju jiidɑ nɔ í nyɑɑm ɑnyɔ si wɑjui ɑmɑnɛ ŋɑ.

²⁶Iyi ɑsĩi Elizɑbɛti í bɑ cukpɑ mɛɛfɑ, ŋɔi Ilɑɑɔ̃ í bɛ ɑmɑlekɑ Gɑbiɛli Nɑzɑrɛti si ilɛi Gɑlilee.

²⁷Í bɔɔi bi mudɛ̃ɛ ɡɔ iyi kù mɑ̀ mɔkɔ, ɑmmɑ ɑ̀ muɑ ɑwɑɑsũ ɡɔ iyi ɑ̀ yɑ kpe Zozɛfu, si dimii ilɑɑlu Dɑvidi. Irii mudɛ̃ɛui í jɛ Mɑɑri.

²⁸Amɑlekɑu í lɔ bi tɛɛ í sɔ̃ɔ í ni, ǹ wɑ n ceɛ fɔɔ, ɑwɔ iyi Ilɑɑɔ̃ í ceɑ didɔ̃. Aɔ̃ Lɑfɛ̃ɛ í wɛɛ do ɑwɔ.

²⁹Ŋɔi Mɑɑri í biti do ideu nɔ wɑ bee ɑrɑɛ ide wɑ ni, yoomɑi í jɛ yɑɑsei fɔɔu ihɛ̃.

³⁰Ŋɔi ɑmɑlekɑu í sɔ̃ɔ í ni, mɑɑ̀ jɔ̀ njo ku muɛ Mɑɑri. Ilɑɑɔ̃ í ceeɛ didɔ̃.

³¹Aɑ bɑ ɑsĩ i bí ɑmɑ inɛmɔkɔ nɔ i sɔɔ Jesu.

³²Á nɑ ku jɛ inɛ nlɑ. Amɑi Ilɑɑɔ̃i ɑɑ yɑ kpoo, nŋu iyi kù nɛ sɑɑ. Aɔ̃ Lɑfɛ̃ɛ ɑ́ coo ilɑɑlu, ɑ́ nɑ́ɑ bommɑi Dɑvidi bɑlɑɛ.

³³Nŋui ɑ́ jɛ bommɑ si dimii Zɑkɔbu do ɑjɔ fei. Bommɑɛ kɑɑ nɛ kɔɔ .

³⁴Ŋɔi Mɑɑri í bee ɑmɑlekɑu í ni, bɛirei ɑ́ ce ku ce, si bɛi n kù mɑ̀ mɔkɔ.

³⁵Ŋɔi ɑmɑlekɑu í jɛɑɑ í ni, Hundei Ilɑɑɔ̃i ɑ́ nɑɑ siɛ, nɔ ɡbuɡbɑ̃ɛ ku biiɛ bɛi jĩjĩ. Nŋui í jɔ̀ ɑɑ kpe ɑmɑ kumɑ́ iyi ɑɑ nɑ i biu Amɑi Ilɑɑɔ̃.

³⁶Elizɑbɛti nyɑɑnzeɛu mɔ iyi ɑ̀ yɑ mɑɑ kpe ɡbɛndɑu, do si ɑɡboɛu fei, í nɛ ɑsĩi ɑmɑ inɛmɔkɔ. Í wɛɛ si cukpɑ mɛɛfɑsiɑɛ nsɛi.

³⁷Mɑɑri, jɔ̀ i mɑ̀ iyi nkɑ̃mɑ kù wɛɛ iyi Ilɑɑɔ̃ í mɔnɡɔ.

³⁸Ŋɔi Mɑɑri í ni, ɑmu woo ce icɛi Aɔ̃ Lɑfɛ̃ɛi. Fei ndɛɛ ku ceem bɛi ì sɔ̃m nɔu. Ŋɔi ɑmɑlekɑu í nɛ.

³⁹Si ɑnyii nŋu, ŋɔi Mɑɑri í dede do sɑɑsɑ í dɑsi kpɑ̃ɑ wɑ nɛ ikpɑ ɡeete ŋɑ, í bɔ ilu ɡɔ si ilɛi Zudee.

⁴⁰Iyi í to bɛ ŋɔi í lɔ kpɑsɛ̃i Zɑkɑri nɔ í ce Elizɑbɛti fɔɔ.

⁴¹Wɑɑti iyi Elizɑbɛti í ɡbɔ fɔɔi Mɑɑriu, ŋɔi ɑmɑu í yɑɡɑ si inɔɛ, nɔ Elizɑbɛti í kɔ̃ò Hundei Ilɑɑɔ̃.

⁴²Nɔ í dɔ̃ ɑnu hee lele í ni, Ilɑɑɔ̃ í weeɛ í re inɑɑbo fei, nɔ kuweeu ɑ́ sɔ si ɑmɑ iyi ɑɑ nɑ i bíu.

⁴³Yooi ǹ jɛ hee iyei Lɑfɛ̃ɛm í nɑɑ bi tom.

⁴⁴Wɑɑti iyi ǹ ɡbɔ fɔɔɛu bɛ, ɑmɑ iyi í wɑ inɔm í yɑɡɑ do inɔ didɔ̃.

⁴⁵Ilu inɔ didɔ̃i ɑwɔ iyi ì dɑsi nɑɑnɛ iyi mii iyi Ilɑɑɔ̃ í sɔ̃ɛ ɑ́ nɑ ku ce.

⁴⁶Nɔ Mɑɑri í ni, Idɔm wɑ sɑɑbu Aɔ̃ Lɑfɛ̃ɛ.

⁴⁷Nɔ ǹ wɛɛò inɔ didɔ̃ nɑ irii Ilɑɑɔ̃ Woo fɑɑbɑm,

⁴⁸Si nɑ iyi í jɔ̀ í kɑ̃sim iju jiidɑɛ, ɑmu woo ce icɛɛ iyi n kù jɛ nɡɔɡɔ. Nɔ hɑi nsɛi inɛi ɑndunyɑ ŋɑ fei ɑɑ mɑɑ ni ɑmuu ilu inɔ didɔ̃i,

⁴⁹Domi Ilɑɑɔ̃, ilu ɡbuɡbɑ̃ fei í ceem mii nlɑ nlɑ. Iriɛ í mɑ́.

⁵⁰Í yɑ ce ɑrɑɑrei inɛ ŋɑ iyi ɑ̀ wɑɑ jirimɑɛ hee do ɑjɔ fei.

⁵¹Í ce icɛ ɡbuɡbɑ̃ ŋɑ do ɡbuɡbɑ̃i ɑwɔɛ Nɔ í fɑnɡɑɑ inɛ ŋɑ iyi lɑsɑbui idɔ nŋɑ í nɛ fɑɑo.

⁵²Í kɛkɛ ilɑɑlu ŋɑ si bɑtɑi bommɑ nŋɑ ŋɑ, Nɔ í so ilu ɑre ŋɑ lele.

⁵³Í jɔ̀ inɛ ŋɑ iyi ɑri wɑ kpɑ ɑ̀ jɛ mii jiidɑ ŋɑ ɑ̀ yo, Ammɑ í lele ilu fiɑ ŋɑ ɑwɔ nɡbɛ.

⁵⁴Í sobi inɛi Izirɛli woo ce icɛɛ ŋɑ, Í ce ɑrɑɑre nŋɑ hee do ɑjɔ fei Bɛi í tɑko í sɔ̃ Aburɑhɑmu do tɔkuɛ ŋɑ Aŋɑ iyi ɑ̀ jɛ bɑlɑ nwɑ ŋɑ.

⁵⁶Iri iyi Mɑɑri í kɔ̃u mbɛ. Si ɑnyiɛ nɔ í bubɑ bi Elizɑbɛti bɛ zɑkɑi cukpɑ mɛɛtɑ, í bɛi í nyi ideɛ.

⁵⁷Awɑɑti í to bii Elizɑbɛti ɑ́ bí ɑmɑɛ, nɔ í bí ɑmɑ inɛmɔkɔ.

⁵⁸Kpɑɑsiɛ ŋɑ do nyɑɑnzeɛ ŋɑ ɑ̀ ɡbɔ iyi Aɔ̃ Lɑfɛ̃ɛ í ce ɑrɑɑreɛ ntɔ ntɔ, nɔ ɑŋɑò ŋɑ ɑ̀ wɛɛò inɔ didɔ̃ ɑjɔ.

⁵⁹Si ɑjɔ mɛɛjɔsiɑ ɑ̀ nɑɑ ku dɑsi ɑmɑu bɑnɡo, nɔ ɑ̀ wɑɑ bi ɑ̀ kpoo Zɑkɑri, irii bɑɑɛu.

⁶⁰Ammɑ iyeɛ í so ide í ni, ɑɑwo, Zɑ̃ɑi ɑɑ kpoo.

⁶¹Ŋɔi ɑ̀ sɔ̃ɔ ɑ̀ ni, si nyɑɑnzeɛ inɛ kɑ̃mɑ kù nɛ dimii iriu bɛ.

⁶²Nɔ ɑ̀ bee bɑɑɛ do ɑwɔ ku bɑ ɑ mɑ̀ bɛi í bi ɑ kpe ɑmɑu.

⁶³Ŋɔi Zɑkɑri í tɔɔ mii ɡɔ si bii ɑ́ kɔ si, nɔ í kɔ í ni, Zɑ̃ɑi í jɛ iriɛ. Nɔ ɑŋɑ fei ɑ̀ biti.

⁶⁴Ŋɔi ɡbɑkɑ̃ Zɑkɑri í yɔkɔ í fɔ ide do ɡɛlɛɛ, nɔ í lɔsi ide ku fɔ wɑ sɑɑbuò Ilɑɑɔ̃.

⁶⁵Ŋɔi njo í mu hee do inɛ ŋɑ iyi ɑ̀ wɑ ɑmɛɛ ɑmɛɛ fei. Nɔ si ilɛɛkoi ɡeetei Zudee ŋɑ fei inɛ ŋɑ ɑ̀ wɑsi ku ce fɑɑjii ideu.

⁶⁶Inɛ ŋɑ iyi ɑ̀ ɡbɔ ideu fei ɑ̀ yɑ mɑɑ muui si idɔ nŋɑ nɔ ɑ mɑɑ ni, debɛi, bɛirei ɑmɑu ihɛ̃ ɑ́ nɑ ku jɛ. Mii ŋɑ iyi í ceu ihɛ̃ fei wɑ nyisi iyi ɡbuɡbɑ̃i Ilɑɑɔ̃ í wɛɛ do nŋu.

⁶⁷Ŋɔi Zɑkɑri bɑɑi ɑmɑu í kɔ̃ò Hundei Ilɑɑɔ̃, nɔ í ce wɑlii í ni,

⁶⁸Sɑɑbui í jɛ ti Ilɑɑɔ̃ Lɑfɛ̃ɛi inɛi Izirɛli ŋɑ Si nɑ iyi í jɔ̀ í nɑɑ bi inɛɛ ŋɑ í nɑ í yɑ ŋɑ.

⁶⁹Nɔ í nɑɑ nwɑ Woo fɑɑbɑ ilu ɡbuɡbɑ̃ wɑ si nyɑɑnzei ilɑɑlu Dɑvidi ɑmɑɑcɛɛu,

⁷⁰Si bɛi í jɔ̀ wɑlii kumɑ́ɛ ŋɑu ɑ̀ fɔ wo hɑi ku kpɛ.

⁷¹Nŋui ɑ́ fɑɑbɑ wɑ hɑi si ɑwɔi mbɛɛ nwɑ ŋɑ, Do hɑi bi inɛ ŋɑ iyi ɑ̀ cé wɑ fei.

⁷²Bɛɛbɛi í nyisi bɑlɑ nwɑ ŋɑ ɑrɑɑreɛ, Nɔ wɑ yeò ɡiɡii ɑkɑbuu kumɑ́ɛ.

⁷³Akɑbuuui í jɛ kuwɑ̃ iyi í ceɑ Aburɑhɑmu bɑlɑ nwɑ,

⁷⁴Í ni nŋu ɑ́ nyɑ wɑ hɑi si ɑwɔi mbɛɛ nwɑ ŋɑ, Nɔ nŋu ku jɔ̀ kɑ ceɑ nŋu icɛ do wɔɔkɔ.

⁷⁵Nɔ icɛ iyi ɑɑ kɑ ceɑu ku jɛ do idɔ kumɑ́ nɔ kɑ jɛ dee dee si wɑjuɛ do ɑjɔ fei si kuwɛɛ nwɑ.

⁷⁶Nɔ ɑwɔ ɑmɑm, ɑɑ kpeɛ wɑliii Ilɑɑɔ̃, nŋu iyi kù nɛ sɑɑ, Domi ɑɑ cuɑɑ Lɑfɛ̃ɛ i mɑɑ teeseɑ kpɑ̃ɑ,

⁷⁷Nɔ ɑɑ jɔ̀ inɛɛ ŋɑ ɑ mɑ̀ iyi ɑŋɑ ɑɑ bɑ fɑɑbɑ wɑɑti iyi Ilɑɑɔ̃ ɑ́ nyɑ dulum du ŋɑ.