Lukas 1:11-77

¹¹Be anggelo ton Maron per ga iuot pan ta idio imadid popou nabene aea isaleai pan ibage oatai.

¹²Sekaraia igera ta ikakrik ga imataud kapei tau.

¹³Be anggelo ikeo pan bedane, “Sekaraia, mataud mao, ngansa Deo ilongo lem raring na. Adaoam taine Elisabet ga ipopo lem gergeu aranga, ta eao ga oato ieda Ioanes.

¹⁴Ei ga ikado ta tinim igelgel kapei, be panua busa pade ga tinid igelgel ngan aea poponga,

¹⁵ngansa ei ieda ga iuot kapei Maron imatai. Be irangrang ngan iun oain ga gid eau matua padengada mao. Ienono itna iapai maitne, be Itautau Tutui ga iuon pan.

¹⁶Ta ei ga ipul panua Israel busa lolod ta tiluagid mulian pan ad Maron Deo.

¹⁷Ei ga ikado naurata ga imuga ngan Maron. Be ei ga iboko toman ngan Itautau Tutui iura mambe Elaija mugaeai. Ta ei ga ipul gid gergeu tamatamad lolod ga iluai mulian pagid led gergeu, ga ipatutui gid panua tipaki tangad ngan Deo ele posanga ta tibada oatainga kemi mambe gid panua toa led kadonga tutui. Ei ga ikado ga panua matad idae ta tisangasanga Maron ele namanga.”

¹⁸Io, Sekaraia ibeta anggelo bedane, “Be gau ga naoatai ngan danga toa ne iuot pagau madongan? Ngansa gau ga adaoag taine, gairua kapeipei o.”

¹⁹Be anggelo ikoli ele posanga bedane, “Gau anggelo Gabriel toa somisomi namadmadid Deo imatai. Deo isula gau ngan talnga ato toa ne ga inam pago.

²⁰Be ega, labone eao ga rangrang ngan posa mao ga irangrang ngan ado toaiua danga toa ne iuot tautaunga, ngansa eao eadi leg posanga mao. Be eine ga iuot tautaunga ngan ado toa Deo ikim.”

²¹Io, gid ipom tisangasanga Sekaraia, be lolod ede ga ede ngansa ei idio mole tau Deo ele luma iloleai.

²²Be iuot ga inam, ta irangrang ngan ikado posanga eta pagid mao. Tota tiuatai mambe ei igera danga ede Deo ele luma iloleai. Ta ikakado posanga ngan ibage ngansa iaoa gum.

²³Idio ta ele naurata tenainga aea kus, ta iluai mulian ga ila ele lumaeai.

²⁴Be muriai, iadaoa Elisabet iapa ta imumul ga imamado lumaeai ga irangrang ngan aea taiko lima. Idio ta Elisabet ikeo,

²⁵“Labone Maron imata isulug ga inam pagau ta ikado toa bedane ngan gau. Ngansa gau taine lasi, be isamum ag maeamaea toa ne pagid ipom busa matadeai.”

²⁶Elisabet iapa ngan aea taiko lima ga ede, be Deo isula anggelo Gabriel ga ila ngan tuanga ede ieda Nasaret ngan tibur kapei Galili.

²⁷Ta ila pan taine blala ede toa ilup toman ngan eaba eta maitne. Taine toa ne, tisio ei ngan oainga eaba ede ieda Iosep ngan iaoa kelede pan Devit. Taine blala toa ne ieda Maria.

²⁸Ei ila iuot pan ta ikeo, “Ado kemi, taine. Maron imado toman ngan go ga ilolo marum tau ngan eao.”

²⁹Be ei ilolo ede ga ede ngan ele posanga ta ikeo iloleai bedane, “Posanga toa ne madongan?”

³⁰Be anggelo ikeo pan bedane, “Maria, eao mataud mao. Ngansa Deo ilolo marum ngan eao.

³¹Ega, eao ga apam ta popo gergeu aranga, ta eao ga oato ieda Iesus.

³²Ei ieda ga iuot kapei, ta gid panua ga tiuato ei gergeu aranga ton Deo Gadae Tau. Be Maron Deo ga ibada itub Devit ele mul maron aea ga ila pan.

³³Ta ei ga imadid ga imugamuga ngan gid iaoa kelede pan Iakop somisomi, ta ele naurata maron aea ga irangrang ngan kus mao.”

³⁴Be Maria ikoli anggelo ele posanga bedane, “Danga toa ne ga iuot madongan? Ngansa gau nalup toman ngan eaba eta maitne.”

³⁵Ta anggelo ikoli ele posanga bedane, “Itautau Tutui ga isulug ga inam pago, ta Deo Gadae Tau iura kapei ga irobi go. Tota gid panua ga tiuato gergeu tutui toa eao ga popo ne ei Deo Inat.

³⁶Be ega, sobom Elisabet ei taine lasi ga taine kapei o, be ei pade iapa, ta aea taiko lima ga ede.

³⁷Ngansa danga eta ikulupu ngan Deo mao.”

³⁸Ta Maria ikeo, “Ega, gau taine paeaeanga ton Maron. Kemi ngan ikado toa bedane ngan gau mambe eao keo.” Ga kus ta anggelo itnan ei ga ila.

³⁹Ngan ado toaiua, Maria idae manmanae ga ila ngan tuanga ede ienono bereoeai ngan tibur kapei Iudea.

⁴⁰Toa eoa ila idudunga Sekaraia ele lumaeai ta ikeo “ado kemi” pan Elisabet.

⁴¹Be ngan ado imata toa Elisabet ilongo Maria ele ado kemi, tota ele gergeu iud iapa, ta Itautau Tutui iuon ngan Elisabet.

⁴²Ta imemetae ngan posanga ta ikeo, “Rabu ngan taine toa ngada ne, Deo ikado kemi tau ngan eao! Ga pade, Deo ikado kemi tau ngan gergeu toa apameai na.

⁴³Be gau taine madongan ga ag Maron itna inam pagau?

⁴⁴Ngansa tangag ilongo lem ado kemi pagau, ta gergeu toa apageai ne itin igelgel ga idug.

⁴⁵Be kemi tau ngan eao, ngansa lolom matua ngan Maron ele posanga pago ta eao eadi mambe eine ga iuot tautaunga.”

⁴⁶Ta Maria ikeo, “Ngan gau lolog, napakuru ngan Maron,

⁴⁷be ngan tautaudig, gau tinig igelgel ngan Deo toa ibada gau mulian.

⁴⁸Ngansa gau edag kapei mao, be ei imata nanan gau ele taine paeaeanga. Ega, labone ga muriai ga ilalala ga ila, gid panua toa ngada oa ga tikeo ga Deo ikado kemi tau ngan gau,

⁴⁹ngansa Deo matua soke tau ikado danga kapei ngan luanga gau. Ei ieda itutui tau.

⁵⁰Ele kadonga lolo isat aea iparangrang gid panua toa tilolon ngan ei, labone ga muriai ga ilalala ga ila.

⁵¹Ngan ibage, ikado naurata kapeipei. Gid panua toa tiuangga gid kekelegid edad kapeipei, ei isere gid.

⁵²Gid mamaron kapeipei toa timamado ngan led mul madonga aea kapeipei, ei isek gid ga tisulug gadio, be gid panua toa edad mao, ei isoa gid ga tidae.

⁵³Gid panua toa pitoreagid, ei iparangrang gid ngan danga kemikemi, be gid panua toa led pat kapei, ei isere gid ga tila sapaean.

⁵⁴Ei ilua gid ele paeaeanga Israel ad, be imata sapian ele kadonga lolo isat aea ngan gid oa mao.

⁵⁵Eine ele kadonga lolo isat aea toa ikado ngan Abraam ga itubtub toa mugaeai ga inam, lalaede mambe ikeo pagid tibutibuda.”

⁵⁶Be Maria idio pan Elisabet irangrang ngan taiko tol, ga kus ta iluai mulian ele tuangai.

⁵⁷Idio ta Elisabet imata poponga aea inam boloma, ta ipopo gergeu aranga.

⁵⁸Aea tuanga ipu ga isobosobo tilongo mambe Maron ilolo isat kapei ngan ei, ta tinid igelgel toman ngan ei.

⁵⁹Be ngan ado lima ga tol aea, tinam ngan gergeu aea palunga ta tiuangga tidol itama ieda Sekaraia idae ngan ei.

⁶⁰Be itna ikeo, “Mao, be taoato ieda Ioanes.”

⁶¹Ta tikeo pan bedane, “Eao sobom eta ieda toa bedana mao.”

⁶²Tota tiposa ngan baged ga ila pan itama ngansa tiuangga tiuatai, ei ikim ieda sai.

⁶³Ta ibeta ngan pat bodenga aea ta ibode posanga bedane, “Ei ieda Ioanes.” Ta panua toa ngada oa timatala.

⁶⁴Be mole mao, iaoa ikakai ta imae imalamalan ta iposaposa be isoa Deo ieda.

⁶⁵Panua toa tuangai oa timataud, be panua ngan tuanga ga tuanga bereoeai ngan tibur kapei Iudea tiposaposa ngan gid danga toa ngada ne.

⁶⁶Be panua toa ngada oa tilongo bedaoa, matad nanan posanga toa ne lolodeai ta tibetabeta pol ngan gid bedane, “Gergeu toa ne, muriai ga iuot eaba madongan?” Ngansa Maron idol ibage ga idae ngan ei.

⁶⁷Idio ta gergeu itama Sekaraia iuon ngan Itautau Tutui ta ibada Deo iaoa ta ikeo,

⁶⁸“Tasoa Maron ieda, ei Deo togita Israel, ngansa ei inama ngan luanga gita ele panua, ta ipola gita ta tatnan leda madonga paeamao.

⁶⁹Ei isula eaba ede iura kapei, ta iuot ngan iaoa kelede pan ele paeaeanga Devit. Ta eaba toa ne inama ngan badanga gita mulian.

⁷⁰Eine mambe ikeo pagid ele panua tututui toa tibabada iaoa mugaeai.

⁷¹Isula eaba toa oa ngan badanga gita mulian pagid ada miri itamatama bagedeai ga pagid panua toa ngada oa lolod paeamao ngan gita.

⁷²Ikado bedaoa ngan pasolannga ele kadonga lolo isat aea pagid tibutibuda, ta labone imata nanan ele posanga tutui toa irau toman ngan gid mugaeai.

⁷³Eine ele posanga tautaunga toa ikado pan tibuda Abraam

⁷⁴ngan badanga gita mulian pagid ada miri itamatama bagedeai, ta tarangrang ngan tamataud mao, be takakado ele naurata

⁷⁵ga tapasolan mambe Deo ele ul ienono ngan gita ga tamamado tutui imatai somisomi ado ga ado.

⁷⁶“Be eao leg gergeu, gid ga tiuato eao eaba toa ibada Deo Gadae Tau iaoa, ngansa eao ga muga ngan Maron ta patutui edap ngan ei.

⁷⁷Eao ga paoatai ele panua ngan saoa danga ei iuangga ikado ngan samumnga led kadonga sasat ga saoa danga iuangga ikado ngan badanga gid mulian.