Luku 1:11-77

¹¹Dokopa baa kareyamo dokona epo Kamongona aŋala mende rendamu pingi bange kisingi rate kingi rolaerena dokona pano epo kareyamo kandeya.

¹²Baa kando pakapala monarename pulunongo piya.

¹³Piyamopape aŋala dokome baa dopa lamaiya. Sakaraya, emba paka kae. Emba ateŋa lao karene doko Anatumi soo karamo. Embena etene Ilisapeta baame wane mende manjakara. Banya kingi Jone lare.

¹⁴Dokopa emba raeko maiyuo mona pyakalyuo pyao kararenepa wambu malu mee manjipilyamo lao rae mairamiko.

¹⁵Baa Anatunya lenge kambu dokona andake ingyuo karara. Baa waene ipwange dokope ipwange porai dupwape dokona mende naa nara. Endangimi baa manjo nyeramo gii dokopa Imambu Poo Pyasi baa keta palyuo simbwaramo karara.

¹⁶Baame Isaraele wambu malu nakamana Kamongo Anatu dokona dee lanyuo epara.

¹⁷Wamba Ilainja porai ingyuo kareyamo imambu porai doko baa keta paliramopa Kamongona lenge kambu dokona pyuo karara. Rakange dupwame nakamana wane wanakepe dupwa mona reto karena lao simbinali pingi wambu dupwame wambu rolae pingi dupwana pii soo nyinya lara. Kamongo baa epara lao wambu dupwa rapa rapa pyuo karena lara, leya aŋalame.

¹⁸Leyamo dokopa Sakaraya baame aŋala kando dopa pyuo piso siya. Emba letene doko apa pyuo angingyuo kandarose? Namba alemo karo dee nambana etenge baa endemo ingyuo petamo, leya.

¹⁹Dopa leyamo dokopa aŋala dokome isingi baa lamaiya. Namba Geperiele lenge dokome Anatunya lenge kambu dokona karenge. Waili pii keyange lalono doko emba langyala puu lapyasa epelyo, leya.

²⁰Namba dopa pira lalono doko pii kinyi lao suu pyaa nalene dokona emba pii laa nao pii lalana saka nao karare lyakande. Namba lapunuli pyuo pyaka separamo dokopa emba kapa pii lare, leya.

²¹Dokopa wambu kamanda kareyami dupwame Sakaraya epelyape mee lao isaro karo baa tembole andakare mee karalu kareyamo dokona apa pipyasa baa epa nalyamo lao saka nao kareyami.

²²Dokopa baa kamanda epapala nakama pii lamainya saka naya. Dokopa baa pii repa repa pipyamo mende kandapyalyamo lao kando siyami. Dokopa baa pii lalana saka napala kingi sikisa pyambuo lasaka piya.

²³Pipala banya purisinya yulu pingi yuu gii dusipa epo otapeyamopa baa anda peya.

²⁴Yuu gii dusipa epo papeyamopa banya etenge Ilisapeta baa rombanda wane ingiya. Wane ingiyamopa baa elyapala kana kingi paki yalu pyuo peteya.

²⁵Namba ane mende manja nao elyuo peteyo dokona ingyuo Anatumi namba nyisapyamo dokona rae maiyuo pisiru leya.

²⁶Kana kingi paki wane rombanda paleyamopa Anatumi aŋala Geperiele yuu Galili dokona yuu taone Nasarete lenge dokona pena leya.

²⁷Akali mende banya kingi Josepe lenge baa Dapitinya para pyasinya mende karo baame enda mapwae mende kingi Maria lenge mokoriya piya. Enda doko peteyamo dokona Geperiele pena leya Anatumi.

²⁸Baa peteyamo dokona epapala dopa lamaiya. Emba pisipilyamo yako. Kamongome emba yapo nyepala emba elyape keta pisilyamo.

²⁹Dopa leyamo dokopa baa pulunongo piyamopa baa yako lalamo pii doko aki pii lao suu pyanyi pyano peteya.

³⁰Dokopa aŋala dokome baa dopa lamaiya. Maria, emba paka kae. Anatumi emba rae maiyuo karamo.

³¹Embena rombanda wane ingyaramopa manjiri lyakande. Manjipala banya kingi Yesu lare, leya.

³²Baa andake ingyuo kararamopa baa Ama Ketae Karamo dokona Ikinyingi larami. Dokopa Kamongo Anatumi baa banya rakange kyawa Dapiti dokona kiŋi yulu nyuo maira.

³³Mairamopa yuu peparae baa Jekopena rara doko kamongo wakasa ingyapala rapu pyuo karalu karo karara. Dokopa banya isingi yulu doko ota nara, leya.

³⁴Lao oteyamo dokopa Mariame aŋala lamaiyuo, Namba akali nyii nange doko apa pyuo emba lapinyili pyuo pira? leya.

³⁵Leyamo dokopa aŋala dokome baa lamaiyuo dopa leya. Imambu Poo Pyasi emba keta maralyara. Ama ketae karamo dokona renge porai doko emba sembara. Dopa piramo dokona wane manjiri doko Poo Pyasi Anatunya Ikinyingi larami, leya.

³⁶Lapala, Embena ree palu enda Ilisapeta lenge doko endemosa wane ingiyamopa kana mange pyakambwaro paleyamopa peteya lyakande. Wamba baa wane manji nao pote petamo leyami dokoko epapu wane paleta petamo.

³⁷Anatu mende pinya saka naa nange dokome piya, leya.

³⁸Dopa leyamo dokopa Maria dopa leya. Namba Kamongona yulu pingi enda peto kande. Emba letenyili pyuo pinya, leya. Leyamo dokopa aŋala dokome baa yaki nyepala peya.

³⁹Enakana dokopa Maria baa sipurapala yuu kyau pyalya pyana pingi dokona yuu Jutia dokona sukusa anda repe repe pyuo karenge mendena waiya lao peya.

⁴⁰Papala Sakarayana anda kolando pao Ilisapeta yako leya.

⁴¹Yako leyamo pii doko Ilisapetame siyamo dokopa banya rombanda dokona wane paleyamo doko pyuku leya. Dokopa Ilisapeta Imambu Poo Pyasi dokome baa palyuo simbuyamopa

⁴²baa pii ketae palyuo dopa leya. Mee enda dupwa pisiminyi dokona Anatumi emba yapo elyape keta pisilyamo, embena rombanda wane palamo dokona Anatumi elyape keta pisarako.

⁴³Kamongona endangi doko namba ketae pyambuo yako lao epelyamo doko apa pipyasa pilyamo?

⁴⁴Dokona lao embame namba yako lalene pii doko selono dokopa wane nambana romba dokona palamo baa rae maiyuo pyuku lalamo lyakande.

⁴⁵Kamongome leyamuli pyuo pira lao suu pyapinyi dokona raeko maiyuo pare ingilyamo.

⁴⁶Dokopa Maria dopa leya. Mona anda dokona Kamongo doko ketae pyambulyu.

⁴⁷Nambana Lete Wai Pyao Nyingi Anatu dokona suu pyao rae maiyuo peto.

⁴⁸Namba banya yulu enda mee koole ingyuo pisipunupape baame namba suu pyaro karamo. Rengya manjirami dupwa peparaeme nambasa kando Anatumi namba elyape keta pisiyapya larami.

⁴⁹Porai Wakasa Karamo dokome namba nyiso yulu andake pyakapyalyamo. Banya kingi doko yapasi ingyuo palamo.

⁵⁰Wambu baa kando pako wambo kareyami dupwape enakana kararami dupwape baa sakame kumuo nyiso karenge.

⁵¹Banya kingi porai dokome wambu range wakasa ingyuo karamano lao suu pingi dupwa pyao ralinyi nembeya.

⁵²Kiŋi kareyami dupwa pyao mee inginyi pyambwapala inyimungu petenge dupwa nyuo ketae pyambuya.

⁵³Wambu lopo karaminyi dupwa baame sikya pinya lao nenge keyange maingi. Dopa pyuo bange malu retenge dupwa kaepala pendewa inginyi nembo pena lenge.

⁵⁴Kondo sakao pyakaro leya kande doko suu pyao karo banya yulu pingi Isaraele wambu dupwa nyiso karenge.

⁵⁵Baame namwana rakange kyawa Aporakame kandowa, banya ree palu wai kiso nyera ingilyamo dupwa kandowape yuu rakyame kaeya nao nyiso kararo lao, lalu lao leyamuli pyuo pingi, leya Mariame.

⁵⁶Lapala Maria Ilisapetapa kana remale role pyao peteyambi. Enakana kaepala anda peya.

⁵⁷Ilisapetame wane manjira ingiyamo yuu gii doko pyaka siyamopa wane mende mandeya.

⁵⁸Dokopa wambu repeta palenge dupwape banya palu dupwape Kamongo dokome enda baa kando kondapala yulu andake pyakamipyalyamo lao sepala baa role pyao rae maiyuo kareyami.

⁵⁹Yuu mange lama karo epo papeyamopa wane doko yongo yanenge awali lao pyakepanyi nembala epeyami. Epapala rakange kingi Sakaraya lenge dokona wane dopako kingi Sakaraya lalana piyami.

⁶⁰Lalana piyaminyipape endangimi daa lapala, Kingi Jone larama, leya.

⁶¹Dopa leyamo dokopa, Embena palu dokona mende kingi dopa laa nange kandale, leyami.

⁶²Dokopa wanena rakange dokona wane doko kingi api larama lao suu pilipi? lao piso siyami.

⁶³Dokopa pepa pingi bange doko minyuo epena lao lamaiya. Dokopa, Baa kingi Jone larama, lao pepa pyao reteya. Dopa lao pyao reteyamo dokopa nakama peparae ayaka leyami.

⁶⁴Dokopa Sakaraya dokona aopa banya kambu dee lumbuyamosa pii lao Anatu lakando kareya.

⁶⁵Dokopa nakama repeta paleyami wambu dupwa peparae pako kareyami. Dokopa yuu Jutia kyau pyalya pyana pingi dupwa peparaena wambu kareyami dupwame yulu dokona dopa pipya dopa pipya lao kareyami.

⁶⁶Dokopa pii doko siyami dupwa peparaeme monarename dopa pipya dopa pipya lao suu pyanyi pyano pyuo, Wane doko apiyakale karara, leyami. Kamongome wane doko nyiso karara doko soo gisiyami.

⁶⁷Dokopa banya rakange Sakaraya Imambu Poo Pyasi dokome palyuo simbuyamopa baa pii polo lamaiyuo dopa leya.

⁶⁸Kamongo Anatu Isaraele wambu dupwame suu pyao karaminyi doko lakandamana. Baame epo banya wambu dupwa nyiso kiiramo nyipyalyamo.

⁶⁹Dokona lao banya yulu pingi akali Dapiti dokona palu dokona Lete Wai Pyao Nyingi akali porai mende karena lao renge kuipyamopa karamo.

⁷⁰Dokonako ingyuo yuu wamba dokopa banya poropeta akali poo pyasi dupwa keta pii mende leya.

⁷¹Doko, Namwana yanda pimwai dupwa nembakao namwa nyisara, namwa kando awa nao karaminyi dupwa peparaeme namwa pyaa nana lao kyawa minyaro leya.

⁷²Namwana rora ambasupi kando lamaiyuo kaeyamuli pyuo, pii yapasi doko kame see napala kondo nyiso karara.

⁷³Baame namwana rakange kyawa Aporakame lamaiyuo pii mende lalu lao leya kande.

⁷⁴Doko namwana yanda pimwai dupwana kingi raka lanyi nembaramopa namwa koo soo kararama leya.

⁷⁵Dokome namwa banya lenge kambu dokona karo, yulu yapasi rolae dupwa pyuo karalu kararama lao lalu lao leya.

⁷⁶Anyi emba Anatu Wakasa Karamo dokona poropeta akali larami. Dokona lao Kamongo enakana eparamo dokona emba wambo pao banya kata wapwakamyuo pare,

⁷⁷banya wambu dupwana koo dupwa kame sakasi seramopa lete wai pyao parami lao pii doko boo pyao lamairi.