Lukaa 1:11-77

¹¹A aangelo anu ra Tadaaru i waan paat karom Saakaria, ma i tur taau u ra papaara ot naa ra luwu na tuntun wetabaar, baa di tun a utnaa baa i aangawian wakwakaak uni.

¹²Baa Saakaria i babo paai, a panina i urugian, ma i burut aakit uni.

¹³Ma a aangelo i piri taana naa, “Saakaria, koku burut, God ia walangoro anum niaaring, ma anum tabuan Elisabet in buta paa ta natumlik a muaana, ma un taar a iaana baa Ioaanes.

¹⁴Un gaaia aakit uni, ma mongoro kaai diat a gaaia u ra nuna binabuta,

¹⁵maa in ngaala namataa ra Tadaaru. Pa in inim a waain, baa a palaa na longlong, ma baa pa din butai utbaai ia teng ma ra Takado na Nion.

¹⁶Ma in ben talili ta mongoro na taara Israael karom a Tadaaru anundiat God.

¹⁷In dekdek aakit welaar ma ra propet Eliaas, in muga taa ra Tadaaru, kupi in ben ungaai balet a kum tamtamaa ra kum naat karom a kum natnatundiat kupi diat a wemaraam balet, ma in ben paa a taara na wabulbul balet kup a koina ninunuk anu ra kum takado na taara, kupi in waninaar a taara anu ra Tadaaru kup anuna winawaan paat.”

¹⁸Saakaria i tiri aangelo naa, “Ang nunura lelawaai naa a utnaa mi in waan paat? Maa mir, mir aa takaana raap.”

¹⁹Ma aangelo i baalui naa, “Iaau Gaabriel, iaau laana tur namataan God. Ia ut i tula wa iaau kupi ang wapua ui, ma ang lo a koina wewapua mi karom ui.

²⁰Iaku ui, pa u nurnur u ra nung pirpir. In waan paat takado ut u ra kilaalaina. Baboi, mi pa un pirpir, maa kabina pa u nurnur. Un munga ku tuk u ra pakaana bung baa a utnaa mi in waan paat uni.”

²¹U ra pakaana bung maa a taara diat kiki walaang kup Saakaria, diat ngaraa baa ia ki iwan aakit u ra ruma na wetabaar.

²²Baa i waan pari, pa i pirpir laar paai ma karom diat, i tututuk maku karom diat ma ra ru limaana. Io, diat nunurai naa Saakaria ia babo taa ta binabo u ra ruma na wetabaar.

²³Baa ia raap anuna pakaana bung na pinapaam, i waan talili kup anuna taamaan.

²⁴Ma namur, Elisabet anuna tabuan i kipbaala, ma lima na kalaang pa i waan ingen paa ko ra ruma.

²⁵Ma i piri naa, “Mi maraagaam a Tadaaru i waraaut iaau ma i lo wa a utnaa baa iaau wawirwir uni naa ra taara.”

²⁶Baa ia 6 na kalaang anun Elisabet, God i tula wa aangelo Gaabriel urong Gaalilaia un raa taamaan a iaana Naasaret.

²⁷I waan karom a inip na tabuan a iaana Maaria, a pet webaat anun Iosep, ia baa ko ra wuna taara anun king Dewid.

²⁸A aangelo i ruk karom Maaria ma i piri taana naa, “Un gaaia, u daan aakit! A Tadaaru i ki karom ui.”

²⁹Ma Maaria i nuknuk laklagon aakit u ra pirpir mi, baa aawa a kukuraaina.

³⁰Ma a aangelo i piri taana naa, “Maaria, koku burut, God i gaaia aakit un ui.

³¹Walangoroi! Un kipbaala, un buta paa a naat muaana, ma un taar taa a iaana baa Iesu.

³²Ma a iaana in rarang, ma din waatungi naa a Natun God a Ngaala Aakit. Ma a Tadaaru God, in waki taai u ra kiki na king anun tabuna Dewid,

³³ma in naagagon takum a wuna taara anun Iaakob, ma anuna mataanitu pa in raap.”

³⁴Maaria i tiri aangelo naa, “In papet lelawaai mi, maa pa mir laa ungaai ma ta muaana?”

³⁵A aangelo i baalui naa, “A Takado na Nion in ki un ui, ma a dekdekin God a Ngaala Aakit in pulu baat ui. Lenmaa a Tena Gomgom baa un buta paai, din waatungi naa a Natun God.

³⁶Baboi, a kakum Elisabet ia takaana, ma di waatungi naa a bi, iaku mari ia kipbaala, ma ia 6 na kalaang anuna.

³⁷Maa pa ta utnaa i dekdek karom God.”

³⁸Ma Maaria i piri naa, “Iaau, iaau a tultul anu ra Tadaaru, din paami un iaau welaar ma ra num pirpir.” Ma a aangelo i waan paa koni.

³⁹Namur Maaria i waninaar paa, ma i waan tato gagaa kup a taamaan baa i ki nate u ra kum taangaai u ra papaar Iudaia.

⁴⁰I ruk u ra ruma anun Saakaria, ma i wataa na gaaia paa Elisabet.

⁴¹Baa Elisabet i walangoro paa a wewataai na gaaia anun Maaria karomi, a naat i gula u ra in balaana, ma Elisabet i teng ma ra Takado na Nion.

⁴²Ma i pirpir ma ra ngaala na ingaana naa, “Ui u daan taa ra in tabuan raap, ma a naat kaai baa un butai i daan.

⁴³Iaau woi na mangaana tabuan mi maa naa ra nung Tadaaru in waan karom iaau?

⁴⁴Baa iaau walangoro anum wewataai na gaaia karom iaau, a naat i gaaia, ma i gula u ra in balaang.

⁴⁵U daan baa u nurnur naa a pirpir anu ra Tadaaru karom ui in waan paat lingtatuna.”

⁴⁶Maaria i piri naa, “A niong i pir walaawa paa a Tadaaru,

⁴⁷ma in balaang i gaaia un God, anung Tena Walaaun,

⁴⁸maa i maari iaau anuna tultul na tabuan, baa iaau a tabuan biaa ku iaau. Turpaai mari a kum taaun taara raap diat a piri un iaau naa iaau daan,

⁴⁹maa Ia baa i Dekdek, ia paam taa a kum ngaala na utnaa un iaau, a iaana i gomgom.

⁵⁰Anuna maarmaari i ki karom a kum taaun taara raap baa diat rui.

⁵¹I paam a kum dekdek na pinapaam ma ra limaana, ma u ra dekdekina i kamaar weraana wa diat baa diat aamaamaan ngaala u ra nuknukindiat.

⁵²I ong pari wa a kum king ko ra nundiat kum kiki na ngaala, ma i wangaala pa diat baa di nuki naa diat a taara biaa ku.

⁵³I tabaara a kum iba na taara ma ra kum kokoina utnaa ma i tula wa a kum tadaaru ma ra pabon na limaandiat.

⁵⁴I waraaut anuna kum tultul, a taara Israael, maa i nuk paa anuna maarmaari

⁵⁵karom Aabaraam ma ra nuna wuna taara takum, welaar ma ia pir taai karom anundaat wuna taara taanga namuga.”

⁵⁶Ma Maaria i ki karom Elisabet welaar ma tula kalaang, ma namur i waan talili balet kup anuna taamaan.

⁵⁷Io, baa a bung anun Elisabet i ot kupi in babuta uni, i buta paa a naat muaana.

⁵⁸A kum teptepaana ma a kum kakuna diat walangoroi baa a Tadaaru i maari aakit Elisabet, ma diat gaaia ungaai mai.

⁵⁹Baa ia 8 na bung anu ra naat, diat waninaar kupi din poko kikili, ma diat nemi kupi diat a taar taa a iaan tamaana Saakaria uni.

⁶⁰Iaku naana i piri naa, “Koku, a iaana ut Ioaanes.”

⁶¹Diat piri taana naa, “Pa ta kakum i lo a iang maa.”

⁶²Namur diat paam a kum wakilang ma ra limaandiat karom tamaana, ma diat tiri naa woi na iang i nemi naa din ungi u ra naat.

⁶³Ma i tutuk kup ta utnaa baa in timtimu uni, ma i timui naa, “A iaana Ioaanes.” Diat raap diat kakaian.

⁶⁴Ma a waan Saakaria i paapa, ma in kaarmene i tapalaa, ma i pirpir maut, i pir walaawa paa God.

⁶⁵Ma a kum teptepaandiaar raap, diat burut aakit. A kum pirpir u ra utnaa mi, i waan werweraan u ra kum taamtaamaan baa diat ki nate u ra kum taangaai u ra papaar Iudaia.

⁶⁶Diat raap baa diat walangoroi, diat nuknuk aakit uni, ma diat piri naa, “A mangaana naat aawa mi?” Maa diat baboi naa a dekdek i ra Tadaaru i ki uni.

⁶⁷Saakaria tamaan Ioaanes, i teng ma ra Takado na Nion, ma i pirpir na propet lenbi,

⁶⁸“Daat a pir walaawa paa a Tadaaru, a God anu ra taara Israael, maa ia waan paat karom anuna taara, ma ia kul walaangalaanga pa diat.

⁶⁹Ia taar taa a dekdek na Tena Walaaun karom daat, ko ra wuna taara anu ra nuna tultul Dewid,

⁷⁰welaar ma ia pir taai namuga utbaai ko ra waa ra nuna kum gomgom na propet.

⁷¹Ia taar taai kupi in walaaun pa daat ko ra nundaat kum ebaar, ma ko ra limaandiat raap baa diat milikuaana daat,

⁷²ma kupi in maari anundaat wuna taara taanga namuga ma in paam ot paa anuna gomgom na kunubu.

⁷³I weweliman taau karom tabundaat Aabaraam,

⁷⁴naa in walaaun pa daat ko ra limaa ra nundaat kum ebaar, kupi daat a papaam karomi ma pa daat a burut.

⁷⁵Daat a papaam karomi ma ra mangamangaan baa i gomgom ma i takado namataana, u ra nundaat kum bungbung na lalaaun raap.

⁷⁶Ma ui natunglik, din waatung ui, a propet anun God a Ngaala Aakit, maa un waanwaan muga taa ra Tadaaru, ma un paam aara muga anuna aakapi,

⁷⁷kupi din wakaapa anuna taara naa din walaaun pa diat, baa di aa una wa nundiat kum aakaina mangamangaan,