Lukas 1:11-77

¹¹Enime'ede Zakaria onne, namlilinnohi Makromod Lalap Nin hophopon a'am raram ida nalhari kemen ai. Hophopon onne namriri lolo honoi kanani onno rodi haharna au hairne wala'ula'u herne malanna.

¹²Zakaria do'onedi hophopon onneni ne, ai nahumarnedi la namka'uk rehi.

¹³Enimaa hophopon a'am raram onne ne'el Zakaria na'ahenia, “Yono mamkauk! Makromod Lalap dernedi numa lir napanak me'e. Na'amoli o houm Elisabet moriyana tatana mo'oni ida, la om waki naran Yohanis.

¹⁴Na'amoli an hi'i mi akim nahuwa'an wake'e, la lere mori ai, ri nammori akinhe nahuwa'an haenhi,

¹⁵ono ai namwali ri lalapa lolo Makromod kalarna. Yon ai nomun anggur me arak, la nano nin lere momori me'ede Roh Kudus na'aromromo irhun raramne.

¹⁶Enla lere Israel upun ananhe derne ai lirna, hi nammori wali wali'ur mai hi Makromon, Makromod Lalap!

¹⁷Ainin molollo namnenehe nabi Elia la Roh Kudus nala molollo ai naise nonolu nala Elia haenhi. Ende ai noluwedi Makromod hari kalla leke ri Israel akinhe ramkenedi lere Makromod mai eni. An hi'i ri leleher roro tatan'ukun ramwali mahaku. Enla ri ma kan derne rakani Makromod enihe, an wakuku hi leke rauroin derne rakani Makromod la ramwali ri molololo Makromod Lalap kalarna. An hi'i panaeku eni na'akeme leke hi'i ri mormori akinhe ramkene kokala Makromod.”

¹⁸Zakaria na'ukani hophopon a'am raram onne na'ahenia, “Hi'i hehewi ya auroin num wanakunu eni namlolo? Ya'u eni a'ileheredi me'e, la ainu'u maekleher na'ileheredi me'e haenhi.”

¹⁹Enime'ede hophopon onne na'ahenia, “Ya'u eni Gabriel, Makromod Lalap Nin hophopon wahwahan ma namriri Ai leken kalarna. Ai penia hopon yo odi lira wawa'an eni mai loikaru ki o.

²⁰Horhorok! Rakan nin lere alam, ainu'u wanakunu eni na'akeme namwali kokkoo. Maa o eni kam derne makani ainu'u wanakunu eni, de om hakukuwedi hehen nanumene ainu'u wanakunu eni namwali.”

²¹Zakaria aile Makromod Lalap Nin Romleu Lape raram makun ne, ri nammori mahar lalapan ai namhara mai paharne. Hir mehe kakaiyedi ono ai nalo'oledi Romleu raram onne me'e.

²²Enla an maiyedi paharne ne, ai kan wakunu haida ono ka nauroin wakunu me'e. Hir do'on ai nodi liman mehe herre wanakunu mene hi rauroin ai lo'o mehen do'onedi haida lolo Makromod Lalap Nin Romleu Lape raram me'e.

²³Ainin lere alam howok lolo Romleu Lape horuwedi ne, an wali laa nin nakar me'e.

²⁴Ka nalo'ol ne, hono Elisabet ap'apun me'e, la ka namhara nin nakar wollo wolima raramne.

²⁵Ai na'aheni, “Eni mene Makromod kukule akin man wa'an paku maya'u. Ende ka awawa lolo heri kalarna me'e ono Ai nala tatana ya'u moriyane.”

²⁶Lere Elisabet nornoro raramne wollo woneme ne, Makromod Lalap hopon Nin hophopon a'am raram ma naran Gabriel nala'a noho Galilea lolo kota Nazaret

²⁷pakromo noro maeke ida naran Maria. Ai noro Yusup rira honorok aki namnehe na'alonedi me'e leke woro'ohe ho, maa lere onne ka ramkuru wuku makun. Yusup onne rai Daud upun anan.

²⁸Hophopon a'am raram onne ne'el Maria na'ahenia, “Heih, Maria! Akim nahuwa'anedi ono Makromod namre'e namharu o rehi, Ai norle'ule'u norwaliwali o mamani.”

²⁹Maria derne hophopon onne lirna, idewe an polletilu la namka'uk de lolo akin na'aheni, “Lira eni nina panaeku inhawe?”

³⁰Enimaa hophopon onne na'aheni, “Maria, yono mamkauk! Makromod Lalap naledi kenekrohu nala rere'e haharu man lap la ma'aruru wake'e ki o.

³¹Ka nalo'ol mormoro o raram me'e, la tatana ma namwali lolo o ihin kemen onne mo'oniyane. Na'amoli waki tatana onne naran Yesus.

³²Ai onne namwali ri lalapa la rin wekel Makromod Lalap Man Kulu Narehi Man Lap Narehi Ananne, la Makromod Lalap mehe kikan Ai namwali Rai naise upun a'an rai Daud.

³³Enla Ai nodi molollo Israel upun ananhe rakan laa ewi-ewi.”

³⁴Maria na'ukani hophopon a'am raram onne na'ahenia, “Hi'ihehewi ha eniyenihe namwali? Ya'u ka oro mo'oni amkuruwala makun.”

³⁵An walhe, “Na'amolia Makromod Lalap huri wali Nina Roh mai ki o. Makromod Lalap Man Kulu Narehi Man Lap Narehi Nin ke'eke'el an'anha norle'ule'u norwaliwali o de anum man om momori onne moumou dewdewe la rin wekel Ai onne Makromod Lalap Anan.

³⁶O mehem po'on we'ekwallum Elisabet, kade ai onne na'ileheredi me'e la ri na'aheni tatane kaale raramne me'e ne, ors eni nornoro raramne wollo woneme me'e,

³⁷ono Makromod Lalap mehe nauroin hi'i ha wo'ira na'akeme namwali.”

³⁸Maria na'aheni, “Ya amkene hi'i lernohi Makromod Lalap Nina honorok aki! Inhawe man Makromod na'aheni onne ya amkene kokale lolo i kem'u ono ya amwali Nina hophopon.” Enime'ede hophopon a'am raram onne nala'a me'e.

³⁹Ka nalo'ol ne, Maria na'akenedi nin hahaa la idewe nala'a laa leke ida ma aile Yudea nin wo'or. Lolo onne wo'or mamani.

⁴⁰Rakanedi enne ne, ai nala'a laa Zakaria nin nakar, napoluwala la nala hiyene arore Elisabet.

⁴¹Elisabet dernedi Maria lirna ne, tatana man minle konoin raram nawolwollo wake'e, la Roh Kudus na'aromromo lolo Elisabet raramne.

⁴²Enime'ede Elisabet wakau naruri na'ahenia, “O penia Makromod Lalap namre'e namharu o narehi maeke rahu na'akeme, la Ai namre'e namharu tatana man aile o raramne!

⁴³Maya'u eni inhoi penia Makrom'u inna mam ka'ara'ue?

⁴⁴Ya auroin Makrom'u aile o raramne ono ya'u derne num napolpolu idediyeni ne, idewe tatana man minle i kono'u raram nawolwollo wake'e ono ai akin nahuwa'an rehi.

⁴⁵Om lernala rere'e haharu man lapa ono o akim naili'iledi nahenia Makromod lo'o hi'i inhawa An konohiyedi me'eni.”

⁴⁶Enla Maria na'uli nasa'a Makromod Lalap na'ahenia, “Yo odi i honorok akin penpenu kemkeme a'uli asa'a i Makrom'u.

⁴⁷Ya akin nahuwa'an wake'e ono Makromod Lalap huri we'er ya'u nano ainu'u dohohala nin molollo.

⁴⁸Ai penia kan hamlinu ya'u ma namwali Nin hophopon wahwahan man lolo yawa eni. Nano lere eniyeni ri na'akeme ra'aheni ya amwali maeke man Makromod Lalap namre'e namharu narehi,

⁴⁹ono Makromod Lalap Ma Nodi Molollo Ma Narehi Na'akeme hi'iyedi panaeku man ma'aruru maya'u. Ai Oin Naran penia nahineiredi nano naran namehin na'akeme.

⁵⁰Ku herre ku An kukul aki man wa'an ri ma namka'uk Ai.

⁵¹Ai nodi Nin ke'eke'el an'anha hi'i hini'i man lewlewen. An reiye'er kope'eredi ri man holi kukulu lalap, leke rir panaeku yon namwali.

⁵²Ai nalkopuredi rai-rai nano rir kadere de ka rodi molollo me'e, maa An kikan ri ma kan holi kukulu lalap.

⁵³Ai nala hanana'an man wa'an na'apehur ri ma namlara, maa An hopon ri orkanaru enihe rala'a ra'alehe haida-haida.

⁵⁴An kukul aki man wa'an maika, Israel upun ananhe ma namwali Nin hophopon wahwahan enihe. An paku ika naisa An nouwedi ik upud a'ad nonolu eni. Ai kan hamlinu Nin nou man An hi'iyedi noro Abraham noro upun ananhe laa ewi-ewi.”

⁵⁶Maria nin ul'uli sasa'e horu an minle noro Elisabet wollo wokelu mene wali laa nina nakar.

⁵⁷Rakanedi Elisabet nina lere alam moriyana, an mori mo'oniyanida.

⁵⁸Nin nakar wali noro lodon walinhe dernedi hi'ihehewi Makromod Lalap kukul Nin aki man wa'an wake'e Elisabet me'e, de roro ai akinhe nahuwa'an wewerre.

⁵⁹Tatana onne nina alam wo'aedi ne, nin nakar wali roro lodon walinhe mai leke sunate, la ai lodon walinhe rir panaeku waki tatana onne naran lernohi aman naran Zakaria.

⁶⁰Enimaa inna namhene la na'aheni, “Yono! Am waki naran Yohanis!”

⁶¹Hi re'el ai na'ahenia, “Hi'ihepe? O upun a'anhe kar wawa naran eni menee!”

⁶²Enime'ede hi rodi liman herre wanakunu ra'ukani Zakaria na'ahenia, “Tatane waki naran inhoi?”

⁶³Kame'ede Zakaria nodi liman herre wanakunu napanak waku man rodi hi'i horok leke an horok tatana naran. An horok na'ahenia, “Ai naran Yohanis.” Hi na'akeme mehe nananedi.

⁶⁴Lere onne me'ede Zakaria nauroin wakunu wali'uredi la na'uli nasa'a Makromod Lalap.

⁶⁵Rir nakar wali na'akeme ramka'uk rehi, la panaeku onne naderre nadaul lolo ri man minle Yudea nin wo'or-wo'or na'akeme.

⁶⁶Ri man derne panaeku onne na'akeme roro akin wakunu na'ahenia, “Tataneni lo'o namwali inhawa?” ono hir do'on rauroinedi Makromod norle'ule'u norwaliwali ai.

⁶⁷Enime'ede Roh Kudus nodi molollo Yohanis aman Zakaria de an wakunu inhawa ma namwali lere man mai. Ai na'ahenia,

⁶⁸“Mai ka'uli kasa'a Makromod, Israel nina Makromod Lalap, ono An mai leke huri we'er Nin ri nano rir dohohala nin hunukum makmaki.

⁶⁹Ai nala Ri lewlewen ida mai huri we'er ika nano iknik dohohala nin molollo. Ai onne, Makromod Lalap Nin hophopon wahwahan Daud upun anan.

⁷⁰Panaeku ma namwali eni naise inhawa man nonolu eni Makromod nouwedi lolo Nin nabi mememen enihe.

⁷¹Ai nala Ri man lewlewen onne mai huri we'er ika nano iknik arwali, leke ma kan suk maika yon rodi molollo maika me'e.

⁷²An kikan Ri man lewlewen onne leke kukul aki man wa'an ik upud a'ad Abraham, Isak, noro Yakup, ono Ai kan hamlinu Nin nou man Ai mehe naledi hi me'eni.

⁷³An kikan hopo na'akerhe Nin nou ma namkene noro ik upud a'ad Abraham

⁷⁴nahenia Ai lo'o huri we'er ika nano iknik arwali lekpananne yon kamka'uk ilitolle Ai,

⁷⁵leke ik kamwali Nin ri ma na'alehe dohohala, la hi'i ha ma namlolo lolo Ai leken kalarna mamani rakan iknik lere horu.

⁷⁶Enla ya an'u Yohanis o, na'amoli rin wekwekel o nabi man ilitolle Makromod Lalap Man Kulu Narehi Man Lapa Narehi eni, ono o penia moluwedi Makromod leke ma'ahari la ma'akene kalla An lole.

⁷⁷O penia man kukul kalla man wa'an Nin ri eni, leke hi rauroin Makromod Lalap Nin panaeku nala or'ori dardari ma kan horu hi, ono na'ohu nahala rir dohohala.