Luk 1:11-77

¹¹Agef mog, Odug nẽ engel, ĩ bun wõ ye, alta aa gaula sumeĩ biya tõ fiyadig anĩ ima biyalẽ ifaren.

¹²Age fe di, Sekaraia ĩ ile fen, ĩ terẽ ye mã, kumĩ ye fen, dẽ yelen.

¹³Anĩ ere, engel ĩ irokenen, “Õ to kumĩ wo, Sekaraia, ogon kosẽya are Negur ĩ karĩ yen. Ogon aiwã Elisabet ĩ, ogon kesu monog gõ fouf, age fe di, in yana ũ, Jon wouf.

¹⁴Ĩ bunem waũ kulĩya ado waũ al fiya õ bun ibodõf, age fe di, musei ĩ gõ fouf bun waud al fouf,

¹⁵ere nigin, Odug mala bun ĩ yana odug adouf, ĩ wain be, aai naan totol falei difef anĩg to yãf, agef fen, ĩ sina namenem Awa Uur Fateulem aura fiyẽf.

¹⁶Israel tamo kayau musei fau inim, Odug, nedi Negur wagen kel gurif irou ilauf.

¹⁷Agef fen, ĩ Eliya nẽ uur ado megeir bunem, Odug fau ileya sã mog, ĩ ket uyu irou ile fen, temeid tar, naaluid tar nigin waud yenẽf nigin ado, fe temeleid idi madur ibodõya nẽ kisi biya bun ileya nigin falei fe fen, tamo kayau Odug nẽ anidi saika fediyouf.”

¹⁸Sekaraia engel to fiyen, “Naig afe fen, aya enei keleĩ youf? Aya neu kayau ado urom mabodok masi, tubau bagaif.”

¹⁹Engel aiten yale iron, “Aya Gabriel. Aya Negur mala bun afaredig, anĩ nigin, aya õ wogõ yõya nigin ado, biya od enei irokonõya nigin sur fiyal.

²⁰Anĩ gama õ ait ufokol fen, od to wogõ wof ule, anĩ wõ youf naa bun, ere nigin, õ neu od to momoi wol, od enei are fau yogon sain bun bagai, kaũ wõ youf.”

²¹Age fe di, tamo kayau Sekaraia tari de fen, idi ĩ sain meluk tempel namen ibodon nigin kisi musei dalen.

²²Ĩ ulõ yesin sain bun, ĩ wogõ fiyẽdiya kisi feleya san. Age fe di, idi kelein, ĩ tempel namen mala seleulã kurãf fen, ereb taka ilel, ere nigin, ĩ imam dogol ifelneĩd fen, ĩ wogõya sã ibodok ilen.

²³In kabĩ nẽ sain bure fele di, ĩ fõ bun kel ilen.

²⁴Anĩ bure fele di, in aiwa Elisabet bou adon, agef fen, ogõ faif ĩ iminkel ibodon.

²⁵Ĩ iron, “Odugem enei age fanan. Naa eneidi bun, ĩ yogon oroya ado wau ifenẽya ifelnan, agef fen, neu mama tamo kayau atun yalelkanan.”

²⁶Ogõ sigis bun, Negur, engel Gabriel Nasaret taun, oun Galili teneub, sur fiyẽ di, ile,

²⁷kayau taulei, tamo yana Josef, Dawid nẽ ibor bun tamalem yalouf nigin digirin gein ilen. Kayau taulei yana Maria.

²⁸Engel ĩ gein ile fen, iron, “Fel, õ nigin Negur fatuk el yok. Odug õ ado ibodok.”

²⁹Maria in od nigin wau fatuk togu fen, aanya enei naig fiya nigin ye fen, kisi musei yalen.

³⁰Anĩ ere, engel ĩ irokenen, “Maria, õ to kumĩ wo, õ Negur nẽ wau el fiya gurug wol.

³¹Õ fau kesu ado fen, kesu monog gõ wouf, ago fen, yana ũ, Jesus wouf.

³²Ĩ fau odug wõ ye di, Negur Ilun Bagai Naal douf. Negur Odug yogo, king nẽ modoũ tama Dawid nẽ anĩ, ĩ ifenẽf.

³³Age fe di, ĩ Jakop nẽ ibor bun king gai ibodkalauf, in tano to sa kalauf.”

³⁴Maria engel to fiyen, “Aya fau mois, eĩ naig fe wõ youf?”

³⁵Engel ĩ aiten yale iron, “Awa Uur Fateul õ bun isiyouf, age fe di, Negur Ilun Bagai nẽ megeir kerub yõf. Anĩ bunem fateul bagai gõ wouf are, yana Negur Naal douf.

³⁶Ogon sirag Elisabeteg tubau mog, kesu yalouf, ĩ dali den, anĩ mogo ogõ sigis ĩ bou ado ibodok.

³⁷Ere nigin, ereb taka anĩ Negur bun malai sã.”

³⁸Maria ĩ aiten yale iron, “Aya Odug nẽ kabĩ kayau, aya bun od sã, õ urok kilei od sã agef wõ youf.” Age ye di, engel ĩ itornẽ ilen.

³⁹Sain anĩ bun, Maria dodok fel, kaisã bagai taun taka arei bun, Judia distrik nediwon ilen.

⁴⁰An ĩ Sekaraia nẽ fõ bun wõ ye fen, Elisabet fel fiyen.

⁴¹Sain Elisabet Maria nẽ fel ya anĩ karĩ ye fen, kesu sina namen ibodon anĩ okĩ yen, age fe di, Elisabet Awa Uur Fateulem aura fiyen.

⁴²Ĩ ait odugem iweig iron, “Kayau ganan atun, Negur õ el yok. Agef fen, kesu gõ wouf anĩg, Negur ĩ el fiyek!

⁴³Anĩ ere, aya naig fiya bagai nigin, neu Odug nẽ sina anĩ aya bun isif?

⁴⁴Ogon fel ya nẽ ait wederoun ile mog bagai, momou nameun al fe fen, okĩ yel.

⁴⁵Kayau taka, ĩ ereb Odug ĩ irokenek are agef kisi fel wõ youf, ye fen, momoi yef, are Negur ĩ el fiyek!”

⁴⁶Age fe di, Maria iron: “Neu malaukanon Odug yana yalesef,

⁴⁷agef fen, neu uur Negur Isennaya nigin kulĩ yef,

⁴⁸ere nigin, ĩ, aya yogon kabĩ kayau maleg nigin kisi fatuk yalen. Sain enei bunem ilauf ganan, ibor ganan Negur ĩ el fiyen douf,

⁴⁹ere nigin, Negur Megeir Barikã ĩ aya bun ereb odug age fel, ĩ yana fateul ibodok.

⁵⁰In wau yũya, ĩ nigin anini def bun tobol fouf, ibor gama ibodok enei ado, dumen isiyouf idi buneg gai gai ibodkalauf.

⁵¹Ĩ yogo imam kabĩ totol odug biya age fedin, ĩ idi neid kisi bun yeneid dalesef anĩ irudi di, firagagaũ difen.

⁵²Ĩ yeneid adodo, nedi modoũ bun yalelneĩd fen, maleg anĩ yalesnẽdin.

⁵³Ĩ idi naũ fedif anĩ, ereb ereb biya ifeneĩd fen, idi safineid adodo daku irudin.

⁵⁴Ĩ amã tubumã tar irokenẽdin kilei, ĩ yogon kabĩ tamo Israel isennen,

⁵⁵agef fen, Abraham ado in ibor nẽ tubu tar bun faimud, wau yũya ifenẽdiya nigin karĩ yeledig.”

⁵⁶Maria, Elisabet ado ogõ towo age fiya dibod ken, fõ bun kel ilen.

⁵⁷Elisabet nẽ kesu gõ fiya sain wõ ye di, ĩ kesu monog gõ fen.

⁵⁸Ĩ ne tã tar, in sirag tar geid, Negur nẽ wau yũya odug ifelnen anĩ karĩ de fen, idi weim waud al fen.

⁵⁹Naa eit bun, idi mulũ nigin kesu bou gudũ fiya nigin disin, age de fen, ĩ yana dũ, tama nẽ dait Sekaraia douf nigin age difen.

⁶⁰Anĩ ere, ne sina aitedin yale iron, “Age fiya sã! Ĩ yana Jon ye yauf.”

⁶¹Idi ĩ dirokenen, “Ogon sirag tar atun, yana age fiya taka sã.”

⁶²Age de fen, in tama bun kesu yana aib youf anĩ karĩ douf nigin, uris difenen.

⁶³Age dife di, ĩ itotoya nẽ safina nigin to fiyẽdin, agef fen, “Ĩ yana Jon,” ye itoto di, idi ganan terẽ den.

⁶⁴Sain anĩ bun bagai, ĩ awa kakã ye di, bale faraf yale ulõ yalaisi di, ĩ wogõ ye fen, Negur yana yalesen.

⁶⁵Ne tã tar terẽ de fen, anini den, age de fen, Judia neid arein, fonõ fonõ wogagã de fen, ereb wõ yen anĩ ganan wogõ den.

⁶⁶Adok anĩ karĩ de fen, kisi musei dale fen, to difen, “Kesu enei naig fiya wõ youf?” Ere nigin, Odug nẽ ima ĩ bun ibodon.

⁶⁷In tama Sekaraia Awa Uur Fateulem aura fiyẽ di, ĩ profet od eig ye wogõ yen:

⁶⁸“Odug seli tabiyouf, Israel neid Negur, ere nigin, ĩ isi fen, in tamo kayau kafĩ fiya bun tamal kel gei fel.

⁶⁹Ĩ yogon kabĩ tamo Dawid nẽ fõ bun, isennadaya megeir ado yalesel ifaref,

⁷⁰(are ĩ yogon profet fateul kulu temeleid sigoreid bun wogõ den kilei).

⁷¹Nemã kiwai tar ado, amã nigin to orodif anĩ imeid bun tamal, kel yalemãf.

⁷²Nemã tamamã tar nigin wau yũya anĩ ifelneĩd fen, ĩ yogon bar itenẽya fateul anĩ karĩ yelen.

⁷³Ĩ wau kuturol fen, nemã tamamã Abraham irokenen.

⁷⁴Nemã kiwai tar imeid bun tamal kel gei famãf, agef fen, amã kumĩ sã ĩ aruna yaleya kisi falauf nigin.

⁷⁵Amã nemã mabodok malauf bun, ĩ mala bun gai fateul bagai fen, madur bagai mabodõf nigin.

⁷⁶“Age fe di, õ neu kesu, Negur Ilun Bagai nẽ profet douf, ere nigin, õ uyu urou fen, Odug nẽ naab dodok wouf.

⁷⁷In tamo kayau neid mosor nigin wedereid tu kalauf bunem, kel yalediyouf nẽ keleĩ wenẽdiyouf.