Lukasi 1:11-77

¹¹Mayeaia mani Zakariai detio Sempaisi ne wewai manei doa na mesbao niunung finunsai mampori naya fo eneung domoya fo.

¹²Zakariai detioi fo soiri tuti mitai.

¹³Manamo wewaifoi medu wei deyo, “Zakariae, mutai fanai. Weo nemu nadiwai Sempaisi taraoi tuti dohong kariri ampa. Binemu Elisabeti ambori minohi tuti kaisung manei ki. Bohong te wonong fino Yohanesi.

¹⁴Wau murarising tutu puraise rai, kontai kaiwasa bitoya wai emararising weo arikangwai,

¹⁵weo weinontarai fuba na Sempaisi urengreafo. I mani wiro dunung angguri ete ye kaha. Arikang nini inang minohi tutiri kaharai mae Sempaisi Nuaninu Mirarebana foi sensoni kawuru na inang enemanabufoia.

¹⁶Arikang manani mani wedaya inontarai Israeli bitoya etarababerasa we Seng Allai, ene Mananufoi.

¹⁷I mani da foni Sempaisi, wemambiriu kariri nabi Eliai. Ampafe dohong wawa enemirorong sawai we ene arikangfosa, tuti dohong inontarai era saiworuai etarababerasa we rang mesio inontarai emararebana fosa era nai foi. Nanaia mani deunau kaiwasafo ampafe emainenang etamang we ene Sengfoi.”

¹⁸Ainanaya Zakariai medu we wewaifoi deyo, “Todoni iroaso finanai? Weo iweinonggutung ampa, tutio nehu wiwingfoi wewiwinggutung ampa.”

¹⁹Wewaifoi yoa wei aha deyo, “Modu tonana fanai. Wewai Gabrieli di yau. Yauno diru rahida yoa na Seng Allai arongfo ne, amani demi yau ma yeikariri kaiwo mahikai ninai we wau.

²⁰Fi yeoai nina mani wetarai rai, manamo roasoa kaha, ampafe boromutamu rai. Modu fiea kaha pariao kaiwo ninai wetarai na ne rahida derera fo.”

²¹Kaiwasa demang we Zakariai na boriai foi enemitituaitai paria, weo niayai waroi karerai na Rorong Mirarebana foi.

²²Mayeaia mani da to boriai, manamo borongfoi tibau wesa kaha, niari kaririai na warangfo terai. Arahio ewaitawanai weo deti fiainawiai bei na Rorong Mirarebana foi. Mae borotamu pampang wo.

²³Mayeaia mani fi niari na Munu Seng foi kai finanaya, ainanaya tiwera tono ne munu rorong fo aha.

²⁴Waroi aha kaha mae binengno Elisabeti doama, ampafe dediwari na munu rorongfo we embai ring.

²⁵Deyo, “Ikarawahi pariao iwewiwinggutung, ampafe kia mamaya we yau. Wape nina mani ikarawahi ahang kaha. Seng Allai niari finini we yau. Dohong ne bengfo arora we yau ampafe imamaya na kaiwasa earomireafo ahang kaha.”

²⁶Elisabeti doama ne embai wonang mani, Seng Allai demio ne wewai manei, wonong fino Gabrieli, da to munuefeai na nu Galileai, wonong fino Nazareti.

²⁷Da we kadawing sowaworua manei, wonong fino Mariai. Mariai nini da we mang manei wonong fino Yusupi, weriria na ne wawafoi, ene mananu Dauti.

²⁸Mayeai wewaifoi da ma sobu Mariai tuti medu wei deyo, “Mahikaifeai we wau, wobu ne bengfo ampa. Sempaisi niai na wau.”

²⁹Mariai tarao kaiwofo nanai, soiri weai, enetituai na enerorongfoi we mahikai fianai aino wewaifi deyoa fo.

³⁰Mayeai wewaifoi medu wei deyo, “Mariae, wau mutai fanai! Weo wobu bengfo ria Seng Allai ampa.

³¹Wau boama rai, ambori munohi tuti kaisung manei. Bohong te wonong fino Yesusi.

³²Arikang manani mani fiebai wefuba, ahui we Sengno Dedai Mantaung ne Kaisung, tuti Seng Allai ambori yuaisi we Mananu fuba na ne wereng Dauti ne mananu rorong fo.

³³I ambori yu wemananu fuba we Yakupi ne ririafoi sentenang. Ne mananufo wiro werea na ea kaha.”

³⁴Ainanaya Mariai yoa we wewaifoi deyo, “Wape irirau kaharai mae, todoni e, boyo ambori iwearikang nina?”

³⁵Wewaifoi medua deyo, “Sempaisi Nuaninufoi bia woru wau, ne tapapa nai woru wau, ampafe arikang munohi tutiri wai mani mirarebanaifa, tuti ahui weo Seng Allai ne Kaisung dine.

³⁶Aromuo nemu tafuai Elisabeti, wewiwinggutung ampa. Eteyo kirawahia finana, wape ambori dawingno arikang manei ki, we ninaia mani doama to ne embai wonang ampa.

³⁷Weo fifianai aino Seng Allai de niari fo mani, miawa arora wei.”

³⁸Mariai deya deyo, “Yau mani, Sempaisi ne woming di yau. Deyo fiani mani, yohong kaririai, ampafe fianai aino niari we yau ne mani tarai kariri boyoawara.” Ainanaya wewaifoi da werui anina.

³⁹Waroi aha kahai mae Mariai sikera beyari da to munuefea na katai weuai, wa na nu Yudea foi.

⁴⁰Da to Zakariai ne munufoi, da wa suai afui, dohong mahikai we Elisabeti.

⁴¹Elisabeti tarao Mariai dohong mahikaifo, arikang niai nano enemanabufoi dota dohonai we piraise fefe, tuti Sempaisi Nuaninu dong Elisabeti.

⁴²Ainanaya sahu tutirai deyo, “Mariai! Wauno wobu mai fuba sewa wiwingne ameane, tuti arikang bawini wai mani sobu mai fuba rai.

⁴³Tuti inontarai fuba di yau kaha mae, nehu Mananunei inangno da ma suambawa yau nina e?

⁴⁴Aweo bohong mahikai ma tarahuoai nanane arikang niai nano enehumanabufuini piraisefe dota dohonai.

⁴⁵Wau wobu ne bengfo paria weo roaso fiani aino Sempaisi deyoai ria wewaifoi fo wetarai rai.”

⁴⁶Ainanaya Maria deyo, “Yeparanding Sempaisi na enehurorongnei,

⁴⁷tuti imararising na nuhuaninunei we Seng Allai, nehu Mamparirifoi.

⁴⁸Weo andino aro yau, tuti urengfo nai na ne womingno enehurorong tewawa ne yaune. Tarai weo na ninai to fongna mani, kaiwasanei kiai sentenang ambori esahu yau we mano isobu mai ne,

⁴⁹weo Seng Allai, mano weMambiriu sewa, niari fibeng fuba we yau ne. Wonongfo mani mararebanai.

⁵⁰Riria bia we riria, Sempaisi aro inontarai mano emataiti fefe eroasoi fosa.

⁵¹Niari fi fuba paria na warang wemambiriru fo, Waraepa mano etawa fosa, ampafe fi enemitituaita fo etohong kariria kaha.

⁵²Su mananufosa weru ene kadera mananu fo to kofara, mae yuaio inontarai enemirorong tewawa fosa.

⁵³Dohong fiang beng weo inontarai ewawisi fosa ambori emamosi, mae datao inontarai ene ra fosa era arora, era ewarami era eawemi.

⁵⁴Fiata ne womingno Israeli foi kawuru ampa, tuti aroporo Abrahami tuti ne ririane tata kaha, mae aro ne kaiwasa Israeline tata paria, aro tata wefitawafa, kariri dererai we tane werengfosara fo.”

⁵⁶Mariai minohi ria Elisabeti na nanai we embai botoru teai, arahio daraberahi to ne munufoi aha.

⁵⁷Elisabeti ne rahidafo maia, minohi tutio kaisung manei.

⁵⁸Mano munu warareng ruhia fosa tuti ne terafosa etaramioai weo Sempaisi deinawiai we aro Elisabeti paria, ampafe ea kontai eparaise riati.

⁵⁹Arikangfoi neo rahida indeatorua mani, efanduhisa weo ewesunati kariri Yahudifosa ene koang, tuti ete etohoni wononso tamangno, Zakariai.

⁶⁰Manamo inang medua deyo, “Bireri! Tatohoni wonong fino Yohanesi.”

⁶¹Emadu wei eteyo, “Manamo na nemu ririanei ma mani, wiro manei wonong tonana kaha.”

⁶²Ampafe ehamang kaririai na ewaramifo we Zakariai, weo borotamu ampafe etutang berahi we wang fiani aino de dohonai we ne arikangfoi fo.

⁶³Zakariai dutang we kamiai toi nai bei, ainanaya soi aweu mani, “Wonong fino Yohanesi.” Kaiwasafoi pepuhung sentenang beyari.

⁶⁴Na kutu iyari nanai, borongfoi tibau, medu aha, tutu fiai Seng Allai.

⁶⁵Mano munu warareng ruhia fosa ematai tantenang beyari, ainanaya kaiwoaririfo etaiririai wario munuefo tantenang na katai weuai na Yudea.

⁶⁶Kaiwasa etaramioa fosa enemitituai weai na enemirorong, tutu eteyo, “Arikang wani fiabai mani, wefiani rai?” Weo Sempaisi ne tapapa weririati.

⁶⁷Zakariai, arikangfoi tamana, andino Allai Nuaninu Mirarebanai donti, ampafe medu kariri Allai deyoafo, deyo,

⁶⁸“Fiaifeai we Seng Allai, Seng we inontarai Israeli ne tata, Weo da ma we feriri ne kaiwasanei ampa.

⁶⁹Demi Mananu Mampariri wemambiriu manei da we tata, na ne womingno Dauti ne ririafoi.

⁷⁰Na fafongfa Sempaisi dohong Kaiwo Arerai kawurua, watai ria ne nabi mano dirisa fosa,

⁷¹weo sawing tata ambori takaharai weru tane aitetafosa, tuti weru mano enemirireu tata fosa ewaramirorongfo.

⁷²Weo deinawi ne aroafo we tane werengfosa, tuti dohong kariri ne Kaiwo Arerai mararebanai nanai ki.

⁷³Fefora we Abrahami, tatamamifoi,

⁷⁴tuti dererai weo wara-ai tata weru tane aitetafosa, ambori tatohong kariri tuti tasomi wei na tamatai kaha,

⁷⁵na taenemirorong mararebanai tuti taenemirorong mesi, na arongreafo na rahidao taminohi na nunei kiai ne.”

⁷⁶Ainanaya Zakariai medu we ne arikangfoi, deyo, “Nehu arikangwa wau, ambori esahu wau wenabi na Seng Allai mano Dedai Mantaung. Weo ro foni Sempaisi, weo bora rang wei, ambori bounau kaiwasanei ampafe emainenang etamang wei.

⁷⁷Ambori boisaharai we Seng Allai ne inontarai Israeli nesa, we ambori feririsa ki, weo deiai ene sasarifo ki.