Lucas 1:11-77

¹¹Ket kapingmatan main anan sayay anghil nan Dios a naka'deng sa pawanan nan altar nin pammuuran nin insinso a pina'kit kona ni Zacarias,

¹²ket nabigra' tan nali'mwan ya.

¹³Wana bale' nin anghil kona, “Andi' ka nin mali'mo, Zacarias, ta rinnge' nan Dios a dasal mo. Ket si Elisabet a asawa mo, manganak ya li' nin lalaki! Pangaranan man Juan.

¹⁴Say ikaiyanak na ket mamaririket tan mamariga li' komoyo tan konran abaw a tutawo;

¹⁵bana' ta alaki tan impurtanti ya li' nin tawo sa pangingikit nan Dios. Matkap a kai yaynaod nin minom nin arak o animan nin makapabok. Mag'uray yay Ispirito nan Dios kona mataman itaw ya et sa tyan nan ina na.

¹⁶Pasublien nasara li' a abaw nin Israelita konan Dios a Uunuren ra.

¹⁷Say pinanakem tan pakayadi' na ket bilang sa nibi nan Ispirito nan Dios kona ni Elias a prupita nan Dios sin nu'nan panaon. Pasublien na li' a mabistan pisisimbatan nin mangatua tan ua'nak. Saray subag konan Dios ket, gaw'en nan kipada anay pangingisip ra konran matunong. Ket mu'na yayna ta pigaw nin isadya' nasaray tutawo sa pag'uuray nan Uunuren.”

¹⁸Ket, tinepetan naya ni Zacarias a anghil, “Pa'no ko wadi' nin mapihon mangyadi' in ta si'kami nin mitraasawa ket pariho kamin matuntawo ana?”

¹⁹Inumbat yay anghil kona a wana, “Si'ko si Gabriel a mampagsirbi lawas konan Dios. Si Dios nibaki' nakodti komo ta pigaw nin ika' koya iparate' ti nin mabistan patanda' komo.

²⁰Edet, maumel ka leg'an a siin nin nibarita' ko komo ket kai ya et nangyadi' bana' ta kai ka nin mamper. Sitin naipatanda' komo ket siguradon mangyadi' li' no rumate' a panaon nin nitanda' nan Dios.”

²¹Sin sain, saray tutawo anamaet, itaw sara sa rikor nin Timplo a mantaga'nan raya si Zacarias. Maka'ngap sarayna ta na'teng yaynadtaw sa luob.

²²Sin linmiwa' ya ket kai yayna nin makapag'irgo no kai sinya-sinyas tanay pitarusan ra ta umel yaynaod ana; kanya' nin nipa'ka' ra a main nin makapaka'ngap a nipa'kit nan Dios konadtaw sa luob.

²³Sin nayadi' anay turno nan grupo na ni Zacarias, sinmubli' yayna sa bali ra.

²⁴Ambo' nin na'teng, mabuktot yayna si Elisabet a asawa na, ket pinaipukok yan limay bulan sa bali ra. Wana sa nakem na,

²⁵“Ay, narate' a lamang! Kina'dwan nakon lamang nin Dios. Ginlat naya a pakabalawan kon kai manganak!”

²⁶Sin a'nem a bulan naynan mabuktot ni Elisabet, nibaki' naya anamaet nin Dios si anghil a Gabriel sa Nazaret, sayay babali sa prubinsyan Galilea.

²⁷Pinako naya konan sayay balasang itaw a say ngaran na ket Maria. Naitanda' yaynan pakasal konan sayay lalaki a say ngaran na ket Jose, a nangibwat ya sa puri na ni adi' a David.

²⁸Ket nako ya anaod a anghil kona ni Maria tan nangigalang ya kona a wana, “Rumiriket ka, Maria! Si Dios, kinawa-kawa'nan naka ket adani ya komo.”

²⁹Nabigra' ya si Maria sa nibarita' nan anghil ket inisip-isip na no ani kadi' a pipa'kaan nin inirgo na.

³⁰Ket wanan anghil kona, “Andi' ka nin masalak, Maria, ta napaririketan yan tuloy a Dios komo.

³¹Gumuktot ka tan lalaki yay iyanak mo, ket pangaranan ma li' nin Jesus.

³²Pinasyan kata'gayan li' nin nikatawo na, tan tawagen ya li' nin Anak nan Sangkata'gayan nin Dios. Si Uunuren a Dios gaw'en na a siin nin iyanak mo ket mag'adi' ya sa lugar nan puon na a si adi' a David.

³³Mag'uray ya li' konran puri na ni Israel anggan-angga tan say pag'uuray na ket kasan anggawan.”

³⁴Ket tinepetan naya ni Maria a anghil, “Pa'no in ket birhin ako et?”

³⁵Ni'bat nan anghil kona, “Si Ispirito nan Dios mako ya komo, ket sa pakayadi' nan Sangkata'gayan nin Dios gumuktot ka; kanya' nin si masanton iyanak mo li', nibaki' nayan Dios ket tawagen yan Anak nan Dios.

³⁶Wanin yan lamang si kanayon mon si Elisabet a say tanda' ket baog ya. Ginmuktot ya mataman no akulaw yaynan tuloy. Ika'nem a bulan nayna sawanin, a si iyanak na ket lalaki ya.

³⁷Anaod, kasan impusibli konan Dios.”

³⁸Ket wana ni Maria konan anghil, “Si'ko, aripen nako nin Dios ket sain nin karabayan nan mangyadi' kongko, akuen ko.” Mi'sa, nibwat yaynay anghil.

³⁹Sin sain, nisukbot ya si Maria, tan nangapura yan nako sa sayay babalin itaw sa tutalugtog nin prubinsyan Judea,

⁴⁰ta bisitawen nasara si Zacarias tan Elisabet. Sin rinmate' yadtaw konra, nangigalang ya kona ni Elisabet.

⁴¹Sin narnge' naya ni Elisabet si Maria, sinmikwal yay buktot na ni Elisabet tan nag'uray yay Ispirito nan Dios kona,

⁴²ket wanan maksaw, “Peteg a sangkakarmaan ka sa sarban bubbayi tan marayo ya li' anamaet a iyanak mo.

⁴³Aninaytin kagalangan a nibi nan Dios kongko ta si'kan si ina nan Uunuren ko ket mambisitawen nako!

⁴⁴Anaod, eteng tuloy tamo' nin narnge' taka ket sinmikwal yay buktot ko sa ririket na.

⁴⁵Makarma' ka, Maria, ta namper kan mangyadi' a nipatanda' nan Dios komo!”

⁴⁶Ket wana ni Maria, “Manraywen koyan tuloy a Catawan a Dios,

⁴⁷tan maririket akon tuloy bana' konan Dios a syay Mangingisalba ko,

⁴⁸ta pinili' nako mataman no ayupa' a kapapa'sar ko. Kanya' nin, mangibwat sawanin, say sarban tutawo sabtan rakon makarma'

⁴⁹bana' sa makapaka'ngap a ginwa' nan Makapangyayadi' a Dios kongko. Naiduma yan peteg!

⁵⁰Mapainganga'do ya konran sarba ran mangunor kona, mangibwat ana konran saray nu'nan tutawo anggan sawanin.

⁵¹Man'ipa'kit na sa gawa'-gawa' na a alakin kapangyadian na. Pitayak-tayaken nasaray mampipata'gay,

⁵²main nin galten nay pakayadi' ran saray iti sa uray, ket itandudo' nasaray maayupa'.

⁵³Mampabsuyen nasara sa matkap ray mampagkurang, bale' konran mumayaman paibwaten nasaran kal-la gamet.

⁵⁴Tinulungan natamon si'tamon mampagsirbi kona nin puri na ni Israel. Anaod, tinukid na a pangako' na nin pangingipa'kit na kontamo nin inganga'do nan magnayon anggan-angga a sigon sa nipangako' na kona ni puon tamon si Abraham pati konran puri na.” Sain a wana ni Maria.

⁵⁶Ket itaw yan magtulon bulan si Maria konra ni Elisabet, mi'sa sinmubli' yayna sa bali ra.

⁵⁷Sawanin ket, narate' anay pangangabing na ni Elisabet. Ket lalaki yaynaod a niyanak na.

⁵⁸Sin natandaan ran kabaraybay tan kukanayon ra a maipa'ka' sa nipangabing na ni Elisabet, nikiririket sara kona bana' sa alakin inganga'do nan Dios kona.

⁵⁹Ket sin ikawalon awro naynan abing, abaw saray tutawon nakodtaw konra ta turien ya sigon sa kaugalian ran Judio. Pangaranan raya kumon a abing nin Zacarias a bilang sa ngaran na ni tatay na,

⁶⁰bale' wanan ina na, “Kai! Juan a ipangaran kona.”

⁶¹Ket wanra anamaet nin saray tutawodtaw, “Ambale' ey? Kasa anamaet nin kanayon moyon wanin a ngaran!”

⁶²Kanya' nin nisinya-sinyas ran tinepet kona ni Zacarias no ani a rabay nan ipangaran konan anak na.

⁶³Nimustra na ni Zacarias a byan rayan panuratan, ket nisurat na a, “Si ngaran na ket Juan.” Ket sarba ra, naka'ngap.

⁶⁴Tampor nin makapag'irgo yayna si Zacarias ket rinayo nayay Dios.

⁶⁵Sarba ran tutawodtaw a nakatanda' sa sain, naka'ngap sara. Naibantog ti nin nangyadi' sa intiron babalin itaw sa tutalugtog nin prubinsyan Judea.

⁶⁶Ket sarba ran nakarnge' konan sitin nangyadi', inisip-isip ra no ani li' kadi' a liwa' na no umalaki yaytin anak. Wanin a iti sa nakem ra bana' ta mapala-palaway anaod a say pakayadi' nan Dios ket iti kona.

⁶⁷Sin sain, si Zacarias nin tatay na ni Juan ket nag'urayan nayan Ispirito nan Dios ket wanti a nibarita' nan minsahin ibat konan Dios:

⁶⁸“Marayo yay Uunuren a Dios tamon puri na ni Israel, ta rinmate' ya ta pigaw nin isalba natamon tutawo na.

⁶⁹Nibaki' naya kontamoy makapangyayadi' nin Mangingisalba a ibat sa puri na ni adi' David a nagsirbi konan Dios.

⁷⁰Siin anamaet a nipangako' na nin Dios yupa' konran prupita nin naitalaga kona sin nu'nan panaon ta wana a

⁷¹isalba natamo konran kalaban tamo tan konran sarba ran mangura' kontamo.

⁷²Ket ininganga'do nasaran Dios a pupuon tamo ta tukiden nayna a masagradon nipangako' na a

⁷³sinmamba ya kona ni Abraham nin puon tamo.

⁷⁴Isalba natamo konran kalaban tamo ta pigaw nin makapagsirbi atamo konan Dios nin kasan ikali'mo tamo,

⁷⁵ta maparinggas tan mapapteg atamoyna sa pangingikit na leleg tamon mabyay.

⁷⁶Ket si'ka, anak ko, Prupita nan Sangkata'gayan nin Dios a tawag li' komo; ta si'kay mangisadya' konran tutawo sa irarate' nan Catawan.

⁷⁷Ipatandaan mo konra a maisalba sara yupa' sa pammirduna nan kukasalanan ra.