LUKA 1:11-77

¹¹Mataico, Abuipaw vaiming cawh ama khatah a va paly ka, ringthopaw ronah siasang cacang lang lekhei a daw thlang.

¹²Zakaria tah ama cawh a hmuh tihtah a pahly ka, a ci ngetei.

¹³Canghrasala vaiming taco, “Zakaria ci kheh, Khazing tah na thlawchangnah khah a ca thui pah. Na nupui Elizabet tah sawcapaw a ca sah pah a. A ming cawh Johan na sá a.

¹⁴Na thawchahnah le na lung a tlingnah ngetei a cang a. A pinah cawtah ming hlupui khah aa lung a lawng a.

¹⁵Abuipaw mehmuh letah mehlai a cang a. Zu le ahringpaw rui khy a cangpaw zong khah ding hrahring a be. A no chung taitah Thlawpaw Pathai tah a chih ciapaw a cang a.

¹⁶Israel cawngsaw mehlupui khah Abuipaw aa Khazing khatah a va chui kaw he a.

¹⁷Taico, Elija a hmingtuakhynah le a thlawpaw tah Abuipaw hmelang tah a sei a. Paw sahlo lungthing cawh aa sawtei sahlo lang letah le bia a nge lypaw sahlo cawh singnah a cangpaw dingnah lang letah a hui sá he a. Cawngsaw vytei khah Abuipaw cawtah a maipacia rua pawtah a pachia a paning he a,” tatah a tah.

¹⁸Zakaria tah vaiming hai letaco, “Ma cawh zehratamaw a cang khy a? Kama zong mehtaa cang myca neh ka, ka nupui zong kung macang pui a cang myca?” a tah.

¹⁹Vaiming taco, “Kama Gabriel cawh, Khazing hmekaw letah a dawpaw ka cang. Ma kong thawngchawbia heh nama ching rua tah tawpaw ka cang.

²⁰Mataico nama cawh ma hming vytei heh a va tlung thlu hlai vytei na rei thlaw khy khaw bei ceh. Zecawtamaw tatah ma cai a tling tih tei, a va tlung lepaw ka reipaw bia khah na zing lynah cawtah,” a tah.

²¹Ma chung cawh zawpui vytei tah ama cawh heh thlang he ka, zecawtamaw behnah ing chung letah ma tlua co a ry zia tatah aa khuarawh a haa thlu.

²²A ka piathlah tihtah aaning sahlo khah bia a ching khy khawh bei he. Behnah ing chung lekhei apalynah a hmuh tahpaw khah aa hni. Zemaw tahpaw co, a kihtua khei bia khah a ching he ka, a rei cawh thlaw khy hlui be.

²³Mataico a raihrenah cai cawh a chang tihtah ing lang khah a dih.

²⁴Ma khy taico a nupui Elizabet cawh sawtei pho ka, thlah pangaw chung a nawh.

²⁵Elizabet taco, “Ma heh Abuipaw tah ka cawtah a tuapaw a cang, atoning cai lehei a dukhuinah cawh palangsah ka, ming vytei hrong letei ka ningzawnah khah a pa lahpah hly myca,” tatah a tah.

²⁶Taico, a thlahruhnah leco, Khazing tah vaiming Gabriel cawh Galili raang Nazaret khua lang khah taw ka,

²⁷David teisaw a cangpaw Josef tah chui ruapaw tei a pahapaw laisaw pathai khakhei a taw. Ma laisaw pathai a ming cawh Mari a cang.

²⁸Vaiming cawh ama khaco va sei ka, “Na kih ka ca tle, nama cawh dukhuinah a sangpui a cypaw na cang. Abuipaw cawh nama khatah a ung,” a tah.

²⁹Mari cawh ma bia rawng taco a lung hna a hnawh ngetei ka, ma heh zehapaw kihtlenah maw a cang sialia, tatah a khuarawh a haa thlang.

³⁰Canghrasala vaiming taco a hai letah, “Mari, ci kheh, Khazing dukhuinah na hmuh myca.

³¹Sawtei pho ceh ka, sawcapaw na sá a. A ming tah Zisu tatah na tah a.

³²Ama cawh mehlai cang a ka, Cungnungcai Khazing Sawcapaw tatah y a cang a. Abuipaw Khazing tah a pathlahtu paw David abui dyching khah a pae a.

³³Jakob mingphing sahlo cung letah bia a hnui paria a. A painah raang cawh changnah hnui be,” a tah.

³⁴Mari taco, “Zekhatamaw ma hming heh a cang thai a? Kama cawh laisaw pathai pui ka cang caw!” tah ka,

³⁵vaiming taco, “Thlawpaw Pathai cawh na cung letah tlung ka, Cungnungcai Khazing hmingtuakhynah tah a ca bakhu a. Macawtaco, mehpathai a va pi lepaw cawh Khazing Sawcapaw tatah y a cang a.

³⁶Na sawny no Elizabet tahmai a tá khy tah sawtei a sá a. A cing tatei aa tah teipaw khah atoheh cawh a thlahruhnah a cang myca.

³⁷Khazing khaco a cang khy lypaw zehmai ung be,” tatah a palei.

³⁸Mari taco, “Kama cawh Abuipaw a saecanu ka cang, na reipaw hratah ka cung letah tlung ky seh,” tatah a tah. Mataico, vaiming tah ama cawh a seisai.

³⁹Ma ningcai leco Mari cawh a pachia ka, Judia raang tlaang cung letei a ungpaw khua lang khah rairang tah a sei.

⁴⁰Zakaria ing leco a nae ka, Elizabet cawh a kih a tle.

⁴¹Mari tei bia a chingpaw khah Elizabet tah a thui tihtah a chung letei a ungpaw ny cawh a pathlo ka, Elizabet cawh Thlawpaw Pathai tah a chih.

⁴²A thangpui tah y ka, “Canu vytei letah bonghnang a ting cai no cang ceh ka, na sah lepaw ny zong bonghnang a tingpaw a cang!

⁴³Canghrasala zecawtamaw ma tlua hei dukhuinah ka ting tu tlong! Ka Buipaw a no, kama khatah na vong thlangpaw heh!

⁴⁴Na kih tlenah o khah ka naw tah a thui cangkaw tei leh ka chi chung letei a ungpaw ny cawh a lawng ka, a pathlo.

⁴⁵Abuipaw tah ama khatei bia a reipaw, a va tlung ceingei a, tatei a zing no cawh bonghnang song tah ung ky seh,” tatah a tah.

⁴⁶Taico Mari taco, “Ka hringnah tahei Abuipaw cawh reithai ka,

⁴⁷ka thlawpaw cawh Khazing, a pa Pachahtu cung letah a lawng.

⁴⁸A saecanu a ny pahnai zia cawh monghly be ca ka, atoning ri taihei co, chai a va chuh lepaw letei cawngsaw vytei tah bonghnang a ting no aa pa tah a.

⁴⁹Meh thawtlungpaw taco, ka cawtah hming rungnawpaw a tua myca, a ming cawh a pathai.

⁵⁰Chaikheh hning chaikheh Ama a cizawpaw sahlo he cung letah a ningdonah a palang.

⁵¹A kiá tah hming rungnawpaw sahlo cawh tua ka, aa lungchung tei a palai a patuinah a hnuipaw sahlo khah a papaipatlaw thlu he.

⁵²Uhtu bui sahlo khah aa buidyching taitah dawh thlah he ka, canghrasala nytawpaw sahlo cawh a cuicaling he.

⁵³A ngaidipaw sahlo cawh hming chawpaw tah aa rivawsah he ka, canghrasala mehrung sahlo cawh aa kih longpaw tah a kawsah he.

⁵⁴A sae Israel cawh bawkhang ka, Abraham le a pathlah sahlo

⁵⁵letei a zaangsawnah cawh chaizaw tah a thui paria thlang ka, kaa mapaw sahlo letei a reipaw zong tai khah,” a tah.

⁵⁶Mari cawh Elizabet khaco thlah thung hrawng a ung khy taitah ing lang a tlung kaw.

⁵⁷Elizabet cawh ny a hnuinah ning le thlaw cawh va tling ka, sawcapaw a sah.

⁵⁸A ingpaw le a sawny sahlo tah Abuipaw tah a cung letah a zaangsawnah alaipui tah a langsah tahpaw aa thui tihtah a lawng khui ngetei he.

⁵⁹Ningreh ning taco nysai cawh a cingpatai rua pawtah va sei he ka, a ming cawh a paw ming Zakaria sah kaw pawtah aa tah.

⁶⁰Canghrasala a no tei a tahpaw cawh, “Cang be, Johan tatah ypaw a cang,” a tah.

⁶¹Aaning sahlo taco, “Naa sawny hrong letah ma hapaw ming a phopaw cawh aa ung tlung be,” aa tah.

⁶²Taico a paw cawh kihtua tah nypaw ming heh aho tah paseh la maw na du tatah aa hae.

⁶³Ama taco, “Ca cianah calung pa pei law,” tatah a kih tuapah he ka, “A ming cawh Johan a cang,” tatah cia ka, cawngsaw vytei cawh aa khuarawh a haa thlang.

⁶⁴Ma khy cangkaw leco, a lui cawh a catlai ka, a hmo a ka caw ka, bia ka reichua ka, Khazing khah a reithai.

⁶⁵Ingpaw sahlo vytei cawh ningang tah ung he ka, tlaang raang a cangpaw Judia raang cawngsaw vytei taco, ma kong longtei khah aa rei.

⁶⁶Ma aa thuipaw maikaw cawh aa khuarawh haa ka, “Ma nypaw heh zemaw a ka lo tae tu a?” tatah aa tah tlungmang. Abuipaw hmingtuakhynah kih cawh a cung letah a ungnah cawtah a cang.

⁶⁷A paw Zakaria cawh Thlawpaw Pathai tah chih ka, bia phy ka,

⁶⁸“Abuipaw, Israel Khazing cawh reithai tah ung ky seh. Zemaw tah pawco, Ama cawh a vong ka, a cawngsaw sahlo cawh a tlang myca he.

⁶⁹A sae David pathlah taikhei pachahnah ki cawh kaa cawtah a patung myca.

⁷⁰Abuipaw tah khuahlai ning taitei Khazing khuavang mehpathai sahlo hmang tei bia a ma taipaw cawh,

⁷¹kaa carae sahlo le a ma huapaw sahlo taitah pachah rua pawtah a cang.

⁷²Khazing tah kaa mapaw sahlo cung letah zawnge a neh ka, ka biahrai pathaipaw cawh ka cingkai a, a tah.

⁷³Kaa mapaw Abraham khatah ma biatainah a tuapaw cawh

⁷⁴kaaning khah kaa carae kih chung taitah pachah chua pawtah le ciphang lytah le pathainah le ding ná tah,

⁷⁵kaa hring chung vytei a hmekung letah a rai kaa hre khy nápaw cawtah a cang.

⁷⁶Ka sawtei, nama cawh Cungnungcai Khazing khuavang tatah y na cang a; zecawtamaw tatah Abuipaw langpui parai pawtah a hme letah na sei lai a.

⁷⁷A cawngsaw sahlo khah naa suanah ngethai a cangnah thongtah pachahnah naa hmuh a, tatah na ching he a.