Luke 1:11-77

¹¹Se Kari Biya ko engel bo tama siring yawara te betera ko kuwim koma sengam mu te aratu sanamaram.

¹²Se tom Zechariah nu arigam, mu biririkaram ale nguangakaso.

¹³Bare engel nu maonam, “Zechariah, ni me nguangerko! Kaem nika guranek ikiam. Nika imet Elizabeth nika kuriang iluwok se ni ko nup bitar John i meko.

¹⁴Nu ni ka gemang motam amilmil biyala kisok se ninguru neman nungeruk, se kariimet suen biya noko bilangara mu ko amilmilamonko,

¹⁵mu awuk, nu Kari Biya motam te nup biya bagarukko. Nu waen se yu aora saki nungursan mu me ta naukko. Noko bilangara tom te la nu Bur Laili kumik karogo lilim bagarukko.

¹⁶Nu Israel kariimet suen biya tala nongorak peleruk Kari Biya nononga Kaem kote nongorak tairukko.

¹⁷Nu Elijah ko ura se bagara aolak sokel ago beteram iwitatala bita se, Kari Biya koma tata girok ura tauk nama sagarukko. Nu nunam nonet se nunga kuriang ago nongomang gurugok se nongomang suan bagamon se, den me karo tua alo mu nongomang gurugok se ikia sinar se ningo diram bagara ko kariimet bagamonko. Nu munan umu te Kari Biya ko taira mu ko kariimet nunga sinar awurok se sinar la bagamonko.”

¹⁸Se Zechariah aking engel isuam, “Bare ani awuk ikiek mel ni balsam sumu nunguning iwita ikiekko? Ani kari garukara, se aninga imet mu agotala imet garukara.”

¹⁹Bare engel mam, “Ani Gabriel, ani Kaem koma te sanamara ko kari, se nu kota balam se ani tairem ale den ningo imi ko ni kerak munakasam.

²⁰Buta se aitak mu ni kiring sisirok se papon te la munaker nama mel ani ka manem mu ko tom te nunguning kaparuk asele ko, mu awuk, ni aninga den imi ko gemang ningi me nunguning aram.”

²¹Se kariimet matangi mu Zechariah ko kimi bita se nungamin yenakaso se balukasan, “Anape mel aratam se nu tom maiya biya temple ningi bagoso ya?” makasan.

²²Laga udagi aratam, bare nu arungu munakarukko me terong. Nu kuring sisiram, se papon te la arungu munakakaso. Mu te nuna ikiman nu temple ningi mel bo kilimik ta aratam se arigam.

²³Se udagi noko tom temple ningi ura taukko mu menaram mu nu ko wonong te peleram namaram.

²⁴Se baga udagi noko nuwus Elizabeth tuagu ago, se sige 5 iwita mu kawam ningi la bagaram.

²⁵Ale mam, “Kari Biya gomang aisam ale kilek yawara aninga angimik te beteram, ale ani kuriang mena se ko dolara agate aniram mu kutuwuram.”

²⁶Elizabeth tuagu ago bagaram ko sige six mu te, Kaem ko engel Gabriel maonam se Galilee sor te wonong Nazareth mu te namaram.

²⁷Ale imet itiwik samalet bo, David ko gue te kari kulak Joseph ilak naukko luan ilu beteman, mu kote namaram. Imet umu ko nup Maria, nu kari bo ilak katir me aniram.

²⁸Se engel nukote namaram ale maonam, “Amilmil yawara, ni ka ari ikiam! Kari Biya kerak bagoso,” mam.

²⁹Se Maria den mu ko ikia ninguru moakaso, se amilmil den owore ko ikia tokaso.

³⁰Bare engel maonam, “Maria, ni me nguangerko. Kaem ni ko ko gomang yawarakala.

³¹Ni tagu aratuk se kuriang kari ilup ale ko nup bitar Jesus i meko.

³²Se nu nup biya bagaruk se nuna ko balmon Kaem Kalel Biya ko Namar mamonko. Se Kaem, nu Kari Biya, nu ko girigir David ko kuwim te bitiruk se king ko baga se,

³³pempem Jacob ko kariimet gue nunga bituokko; noko kingdom mu kumik menara mena,” mam.

³⁴Se Maria engel isuam, “Ani awuk atagu aratukko? Ani kari bo ilak me ani arigem,” mam.

³⁵Se engel nu maonam, “Kaem Kalel Biya ko Bur Laili mu ko nikim sokel nikate tairukko. Se kuriang laili bilangaruk mu ko balmon, Kaem ko Namar, ma balmonko.

³⁶Ni ikiko! Nika gue suan Elizabeth mu garuk ningi ta kuriang taukko; nu kuin sisira lagaram, bare aitak tuagu ago, ko sige 6.

³⁷Mu awuk, mel bo Kaem nu me bitirukko koma iwita mena, nu mu mel suen biya bitirukko terong la.”

³⁸Se Maria mam, “Ani Kari Biya ko ura imet. Se anapeya ani angimik te aratukko ni balem uwuta am aratukko,” mam. Se engel nu beteram ale namaram.

³⁹Se kam me maiyam, Maria barasam numi nungam mu biririkaram duruk sor Judea mu ko wonong bo te namaram ale

⁴⁰Zechariah ko kawam ningi kasu naguram ale Elizabeth amilmil tuam.

⁴¹Se tom Elizabeth Maria ko amilmil den mu ikiam, mu kuriang nu tuagu ningi mu pitigiram ale tingmam. Se Kaem ko Bur Laili mu Elizabeth kumik ago lilimaram.

⁴²Se nu sail ago balam, “Imet suen la nunga ningi amilmil yawara nikate, se kuriang ni ilup mu marak amilmil nukote karogotala!

⁴³Bare ani awuk nunguningkiri se aninga Kari Biya ko nuam agate tairam!

⁴⁴Tom ani nika den amilmil ikiem mu, kuriang ani atagu ningi mu tingmam ale amilmilaram.

⁴⁵Se amilmil biya nikate anirukko, mu awuk, ni Kari Biya kiwem kimik te bitirukko mu butata aratukko maem ale ko gemang ningi nunguning aram!”

⁴⁶Se Maria balam, “Aninga ikia lilim la te Kari Biya ko nup patawusam,

⁴⁷ale aninga angamang motam Kaem, aninga Saonga Kari, mu ko amilmiloso,

⁴⁸mu awuk, ani noko ura dungan imet, aip mena, bare nu ani ago ko ningo beteram. Buta se aitak se udagi te ko kariimet suen la aninga balmon, Kaem amilmil yawara aisam ma balmonkowo.

⁴⁹Mu awuk, Kaem Sokel Garagar mu mel bibiya ani ago ko nungam. Noko nup mu laili!

⁵⁰Nu kariimet noko kuring bowa ningi bagasan mu gomang nungarso, kariimet gue girakala ko ta, aitak tom imi ko ta, se tom udagi am koma suanta tala.

⁵¹Noko kuting te ura sokel ago bibiya beteram, ale nu kariimet nunga ikia nongomang ningi nunumi patawura ago mu nunga parusuwuram.

⁵²Nu bitua kari supuling bibiya mu nunga menawu nongorak kaparam, bare kariimet nunumi ago kapasan mu nunga patatuwu kualala nunga awuram.

⁵³Nu kariimet na ko kua lagaman mu mel ningo ningo nungaram, bare kariimet nungumik mel ago mu nuguting ipi nunga beteram se namaman.

⁵⁴Nu ko ura kari Israel saongam; nu anananga girigir Abraham se ko gue te mu gomang nangarukko mu ko den balam mu ko kuamin ares mam, se uwutata nanga beteram.”

⁵⁶Se Maria sige ilagala suan iwita Elizabeth ilak baga asele peleram ko wonong te namaram.

⁵⁷Se Elizabeth yusan taukko tom tai aragam, se nu kuriang kari iluwam.

⁵⁸Se ko bagara suan se ko gue suan Kari Biya gomang tuam se kuriang tam mu ikiman, ale nu ilak amilmilakasan.

⁵⁹Kuriang ko day tom 8 aram se kumik guang batagarmon ale ko nup mu nuet nup te Zechariah mamonko,

⁶⁰bare ko nuam balam, “Mena! Noko nup mu John,” mam.

⁶¹Se nuna nu manorman, “Nika gue suan ningi bo ko nup suwuta me bagoso, mena,” maman.

⁶²Ale nuna papon te ko nuet, kuriang nup aguwaya bitirukko wore ko isarman.

⁶³Se nu mel bo te garekarukko wore ko balam se tuman se iwita batogam, “Noko nup mu John,” mu batogam, se nuna ninguru tengeman.

⁶⁴Ale tom mu te la nu kuring pagam se munakakaso ale Kaem nup patawukaso.

⁶⁵Se noko bagara suan kiwem mu arigiman ale ninguru tinga gilingiman. Se mel suen la umu ko den pagam, Judea ko duruk sor lilim iram.

⁶⁶Se kariimet den mu ikikasan mu ikia ninguru nunga moakaso se isakasan, “Se kuriang umu maingte kuriang awuk nunguningkiri bagarukko!” makasan. Mu awuk, nuna ikiman, Kari Biya ko sokel nu ilak kapetaram bagakaso.

⁶⁷Se Bur Laili kuriang ko nuet Zechariah kumik ago lilimaram se den iwita balu pagarukaso:

⁶⁸“Amilmil biya Kari Biya, Israel ko Kaem, kote namoso, mu awuk, nu tairam ale ko kariimet nunga saongam.

⁶⁹Nu ko ura kari David ko gue te anananga Sangaru Tata Kari bo balu nangaram;

⁷⁰nu girakala ko prophet alo nuguring te balam uwutata beteram.

⁷¹Nu balam nu ana kager memek nuguting te nanga sangaru tauk, ale me nanga kuera alo mu nuguting te nanga bataguru taukko.

⁷²Nu uwuta beteram mu anananga girigir alo gomang nungaram, ale den nongorak kaolam mu me kuamili saparam.

⁷³Nu den sokel ago anananga girigir Abraham ilak kaolam ale bitirukko balam uwutata beteram:

⁷⁴nu ana kager memek nuguting te nanga sangaru tauk se ana guyak la nup patawu se,

⁷⁵nu motam te munan laili se ningo diram la te pempem la baganakko.”

⁷⁶Se Zechariah John ko iwita balam: “Se ni aninga kuriang, ni mu ka balmon Kaem Kalel Biya mu ko prophet ma ka balmonko, mu awuk, ni mu gir ale Kari Biya ko lage, te tairukko mu nunguru burangir

⁷⁷ale noko kariimet nunga sinar awur se, giris palagamon ale memek nubiring tumon, se nu nunga memek siwurok ale nunga sangaru taukko, mu nunga manaruko.