Luk 1:11-77

¹¹Wail Zakaraia bin bizi de insaid da Tempol, da einzel blo God i bin soe emselp de lo raitsaid blo da olta wea em bin bane da insens.

¹²Wen Zakaraia bin luk dat einzel, em bin prapa atzamp ane prait.

¹³Bat da einzel i bin spik po em, ‘Ei. Yu no prait. God bin lisen prea blo yu. So nau ai spik yu, Lizabet oman blo yu i go bone boibeibi. Yu mas pute neim blo dat boibeibi, Zon.

¹⁴Yu ane plenti pipol i gobi prapa glad wen da beibi i go bon.

¹⁵Em gobi prapa bigman wea God. Em no lau po dringk wain o eni strongdringk. Da OliSpirit paua i go stap wea em prom da taim wen em go bon.

¹⁶Em go teke plenti pipol wea dis kantri Izrael, ane em go teke yupla kambaigen po God, God blo yupla.

¹⁷Em go go pas po meke redi po da BosLod. Em i gobi prapa strong ane em go gad plenti paua blo God wase da spesilmesizman Ilaiza. Em i go meke ol pamle kambaigen tugeda ane tane ol pipol uda no bin lisen, po kambaik po da raitwei ane go meke dempla redi po da BosLod.’

¹⁸Zakaraia bin spik da einzel, ‘Wiskain? Wiskain ai go sabe diswan i tru? Mitu prapa tu oul po meke beibi!’

¹⁹Da einzel bin ansa em, ‘Mi Geibrel, ai oltaim stanap klostu wea God ane God go elpe “yutu. God bin sane mi kam po spik yutu dis gudniuz.

²⁰Yu no bilibe mi, bat wanem ai spik po yu i tru. Prom distaim nau, yu gobi dam, kan tok, raitap po da taim wen da beibi i go bon.’

²¹Ol dem pipol i bin weit de ausaid da Tempol po Zakaraia. Dempla i bin stat po pazol nau. ‘Kole, wanem longtaim em mekem de insaid lo da Tempol?’

²²Wen em bin kam ausaid, em kan tok. Em bin meke ansain po dem pipol so ol i bin stretwei sabe em bin luk samting wase bizin de insaid lo da Tempol.

²³Wen Zakaraia bin pinis dem wok blo em, em bin go longwei gobaik po aus blo em.

²⁴Apta nau, Lizabet oman blo em, i bin kam pamle. Em no bin libe aus po paib mant, bikoz em no bin wande nobodi po sabe em pamle.

²⁵Lizabet bin spik po emselp diskain, ‘God bin gibe mitu samting prapa gud. Em bin tingbaut mitu ane em bin tekemaut sem prom mi bikoz ai nogad pikinini ane nau ai pamle.’

²⁶Wen Lizabet i bin siks mant pamle, God i bin sane einzel Geibrel go po da biliz blo Nazaret wea da smol eria blo Galali.

²⁷Da einzel i bin go luk wan gel neim Meri. No man bin go wea dis gel. Em bin promis po maret wan man, neim blo em Zosep. Zosep i bin kam prom pamlelain blo King Deibid.

²⁸Da einzel bin kare mesiz prom God po Meri. Em bin spik diskain po Meri, ‘O o! Wiswei yu? God i go ona yu ane blese yu. Em i ya wea yu. Em bin suze yu prom ol dem nada oman.’

²⁹Wen Meri i bin luk ane lisen po wanem da einzel i spik, em bin prapa prait. Em bin pazol baut demting wanem da einzel bin spik po em.

³⁰Da einzel bin spik po em, ‘Yu no prait Meri, bikoz God i prapa kea po yu. Em bin suze yu.

³¹Lisen gud! Yu gobi pamle ane yu go gad boibeibi. Yu mas pute da neim blo da boibeibi, Zizas.

³²Em gobi bigman ane ebribodi i go kole em Boi blo da Prapa AntapGod. Da LodGod i go meke em king wase Deibid, dat prapa bigate blo em.

³³Em gobi king oba Izrael, poeba. Em gobi king wea i nogad end.’

³⁴Den Meri i bin spik baik po dat einzel diskain, ‘Wiskain ai go pamle? Ai no sabe man.’

³⁵Da einzel ansa em baik, ‘Da OliSpirit go kam insaid wea yu ane da paua blo da Prapa AntapGod go kaba yu. So da pikinini wea i go bon, i gobi Boi blo God.

³⁶Yu lisen po mi nau. Yu sabe kazen blo yu Lizabet prom mamasaid blo yu. Em nogad pikinini ane em prapa oul. Wel, em siks mant pamle nau.

³⁷Wa, bikoz i God uda ken meke ebriting.’

³⁸Meri i bin ansa em baik diskain, ‘Ai wokinggel blo God ane ai mas mekem wanem God i wande mi po mekem, so lete demting wanem yu spik i go kam tru.’ So apta Meri bin spik diskain, da einzel bin go.

³⁹So nau Meri i bin meke redi ane ariapwan go po dat taun wea ilkantri blo Zudia.

⁴⁰Seimtaim wen em bin go insaid aus blo Zakaraia, em bin alo po Lizabet.

⁴¹Wen Lizabet i bin lisen da ala blo Meri, dat beibi i bin mub insaid beli blo Lizabet. Ane da OliSpirit i bin kese em strong.

⁴²Lizabet bin singaut laudwan, ‘God i bin blese yu moden eni nada oman. Ane em bin blese da boibeibi yu karem de insaid wea yu.

⁴³Ei! Uda mi, dat disting i apen po mi, dat yu, mama blo mai BosLod i kam ya po bizit mi?

⁴⁴Meri, wen ai bin lisen yu singaut, da beibi insaid mi i bin zamp prom glad.

⁴⁵Yu gobi prapa api ya nau bikoz yu bin bilib da mesiz blo God po yu, i go kam tru.’

⁴⁶Den Meri i bin spik diskain: ‘At blo mi i singaut preiz po God.

⁴⁷Mai at preize God ane kare neim blo em antap. Spirit blo mi i prapa glad bikoz God em i seibe mi.

⁴⁸Em bin tingbaut mi nomata ai prapa louklas gel blo em. Prom distaim nau ol pipol go kare neim blo mi antap, bikoz God bin suze mi.

⁴⁹Da Strong AntapGod, i bin meke ol prapa bigting po mi. Neim blo em i Oli.

⁵⁰Em soe sorewei po ebriwan uda i ona em ane pole em, demwan prom bipotaim, demwan ya nau ane demwan uda go kam biain.

⁵¹God bin soe paua blo em po yumpla. Demwan uda i praud, demwan uda i tingk dempla prapa ai, God spoile ol plan blo dempla. Em bin puse dempla go ausaid, meke dempla plai ebriwea wea win.

⁵²Em bin teke ol dem king prom taun blo dempla ane em bin daune dempla. Em bin liptemap ol louwan go antap.

⁵³Em bin gibe ol anggre pipol, ol plenti gudting, bat em bin sane ol riswan gowei, nogad nating.

⁵⁴Em bin elpe ol wokman blo em wea Izrael, dem longtaim pamle blo mipla. Diswan i bin Eibram ane ol pamle blo em. God bin meke dis promis, em ebritaim go meke gudpasin po dempla.’

⁵⁶Meri bin stap de wea Lizabet po tri mant. Den apta tri mant em bin gobaik po aus blo em.

⁵⁷Wen da taim i bin kam nau po Lizabet po bon, em bin bon boibeibi.

⁵⁸Ol pren ane ol pamle blo em i bin lisen da prapa gudting wanem God i bin mekem po Lizabet. So dempla i bin prapa glad po em tu.

⁵⁹Eit dei apta da boibeibi i bin bon, dempla i bin meke redi po kate poskin blo em wase dem Mozeslo i spik. Pamle blo em i bin wande neime em Zakaraia apta papa blo em.

⁶⁰Lizabet i bin spik, ‘Nono. Neim blo em i Zon.’

⁶¹Dempla spik diskain po Lizabet, ‘Yu nogad no pamle wea i gad dat neim.’

⁶²Dempla i bin meke ansain po Zakaraia, askem, ‘Wiswei? Wanem neim yu wande kole da boibeibi?’

⁶³So Zakaraia i bin askem po smol raitingbod ane em bin raitem diskain, ‘Neim blo em, Zon.’ Dempla bin sapraiz.

⁶⁴Da seimtaim nau, Zakaraia i bin stat po tok gen ane em bin mata preize God.

⁶⁵Wen Zakaraia i bin pinis tok, ol dem pipol i bin prapa atzamp ane niuz i bin spred oloba ilkantri blo Zudia baut da boi blo em.

⁶⁶Ebriwan uda bin lisen wanem bin apen, dempla bin tingbaut ane ol bin aske wananada, ‘Wanem dis boibeibi gobi. Ebribodi sabe da paua blo God i stap wea em.’

⁶⁷Da OliSpirit blo God i bin tekoba Zakaraia, papa blo Zon, ane em bin spik dis mesiz blo God:

⁶⁸‘Yumpla ebribodi kam preize da LodGod, da God blo Izrael. Em bin kam po elpe ol pipol blo em ane meke dempla pri.

⁶⁹Em bin sane wan prapa strongwan po seibe yumpla. Da wan uda seibe yumpla, em kam prom da pamlelain blo Deibid, sebant blo God.

⁷⁰Prapa mina longtaim de pas, God i bin promis wea ol dem spesilmesizman blo em,

⁷¹em go seibe yumpla prom ol enami blo yumpla, ane prom demwan uda i eite yumpla.

⁷²Em bin spik, em ken meke gudwei ane kipe dat spesil promis po ol dem longtaim pipol blo em.

⁷³Diswan da strong griment wea em i bin gibe Eibram, bigate blo yumpla.

⁷⁴Em go seibe yumpla prom ol dem enami blo yumpla, so yumpla ken serbe em ane no prait prom nating.

⁷⁵Ane yumpla ken bi oli ane mata pole da raitwei, raitap po dat taim wen yumpla go ded.

⁷⁶‘Ane yu, boi pikinini blo mi, ebriwan go kole yu spesilmesizman blo da Prapa AntapGod. Yu go pas, bipo da BosLod i go kam ane yu go meke da rod redi po em.

⁷⁷Yu go spik ol pipol blo em diskain, em go seibe dempla ane em go pogibe ol sin blo dempla.