Luka 1:11-77

¹¹Niyo mndima ywa kwembingu ywa Zumbe amlaila Zakaliya, kachimala ntendele ya kulume ye nchanja yo kufunkiziza ubani.

¹²Zakaliya eze amwone, niyo ehelwa na kwingilwa ni woga.

¹³Mna yudya mndima ywa kwembingu niyo amgamba, Zakaliya, “Use kogoha! Kwaviya Chohile keva malombeza yako, na mkaziwo Elizabeti nakwelekele mwana ywa chilume. Wenawe naumwitange Yohana.

¹⁴Wenawe na utende na mbwedo na chinyemi, na wantu walozize nawabwede mo kwelekwa kwakwe.

¹⁵Kwaviya nauwazwe kutenda mntu mkulu kulongozi kwa Zumbe. Hanywe divai hegu mpombe, naho namemezwe Muye Ukukile kukongela mwe nda ya nine.

¹⁶Nawahitule Waizulaeli walozize kwa kumuwiya Zumbe Chohile ywawe.

¹⁷Namlongweile Zumbe, naho na atende na nguvu na udahi wa Muye saviya muwoni Eliya. Na wevanye vituhu watati zamntu na wana wawo, na kuwahitula wehi watendwe na umanyi saviya wakuwoneka wedi, naho na watende wantu wemalanye kale kumhokela Zumbe.”

¹⁸Zakaliya amuza yudya mndima ywa kwembingu, “Nanimanye vivihi ichindedi che imbuli ino? Miye sidalahala, mkazangu naye kadalahala.”

¹⁹Mndima ywa kwembingu amgamba, “Miye ni Gabulieli, akwikala haguhi na Chohile, anisigile nize kulonga na weye na kukugambila mbuli yedi ino.

²⁰Mna kwaviya huzumile ulosi wangu, ukunga uchinte mwe chipindi chikigwe. Kwaviya huzumile, haudahe kulonga, naho naunyamale kubula mwe dizuwa diya dye ndagano nadichinte.”

²¹Wantu wendile wakamgoja Zakaliya wehelwa kwaviya kekalisa mwe nyumba yo kuvikila.

²²Eze afose, hakudaha kulonga nawo, wantu niyo wamanya kugamba kawona uwoni mndani mwe nyumba yo kuvikila. Niyo alonga nawo kwa vilagiso mwe mikono yakwe.

²³Eze abinde ndima yakwe, Zakaliya auya kwe kaya yakwe.

²⁴Yeze yomboke mazuwa majeche, mkaziwe Elizabeti niyo atenda msoka ekala hekaya yakwe miezi mishano.

²⁵Elongela, “Vino nivyo anitendele Zumbe,” akagamba. “Kanusiza soni zangu za kuleka kweleka!”

²⁶Mwezi wa mtandatu we inda ya Elizabeti Chohile amsigilaga mndima ywa kwembingu Gabulieli aite kwe isi ya Galilaya ikwitangwa Nazaleti.

²⁷Nakasigilwa kwa mwana chiche akwitangwa Maliyamu henati kudugana na mgosi. Mwana chiche uyo nakalombwa ni mgosi akwitangwa Yusufu, akulaila mo lukolo lwa Daudi.

²⁸Mndima ywa kwembingu niyo amlaila Maliyamu na kumlamsa, “Utondowazi utende naweye! Zumbe ehamwenga na weye naye kakujimbika vidala!”

²⁹Maliyamu niyo engilwa ni chinyulu eze eve ulosi uwo, niyo ehelwa mbuli idya yagaze.

³⁰Akaheza mndima ywa kwembingu amgamba, “Maliyamu, usekogoha, kwaviya Chohile kakufila mbazi.

³¹Nawinule nda, naho naweleke mwana chilume, namwitange zina dyakwe Yesu.

³²Uyo natende mkulu naho netangwe Mwana Chohile Mkulu. Zumbe Chohile namwinke chigoda chakwe cho useuta, saviya endaga mwelesi ywakwe Daudi,

³³naho natende seuta ywa lukolo lwa Yakobo mazuwa yose, useuta wakwe hauna udumo!”

³⁴Maliyamu niyo amuza mndima ywa kwembingu, “Navidahike, vivihi, mbuli ino?” Miye simmanyize mgosi.

³⁵Mndima ywa kwembingu amhitula, “Muye Ukukile nakwizile, na nguvu za Chohile nazikugubike. Kwa chausa icho mwana uyo nomwitange Mwana ywa Chohile.

³⁶Naho umanye mlukolo ywako Elizabeti, yudya wantu wamanyize hakweleka, mna haluse ana nda ya myezi mtandatu, hatahegu kadalahala.

³⁷Kwaviya hamna hedikudahika kwa Chohile.”

³⁸Maliyamu niyo agamba, “Kaula, miye ni mtumwa ywa Zumbe,” “navitende saivyo ulongile.” Niyo mndima ywa kwembingu ahalawa.

³⁹Mwa mazuwa yadya Maliyamu kahalawa aita kwa kuchinyinta kwita ko mzi wendile kwa magulu ye mwe si ya Yudeya.

⁴⁰Niyo engila mwe nyumba ya Zakaliya na kumlamsa Elizabeti.

⁴¹Elizabeti eze eve indamsa yakwe Maliyamu, kazana mwe inda yakwe katugusa. Elizabeti niyo amemezwa Muye Ukukile.

⁴²Niyo alonga kwa izwi kulu, “Kujimbikwa weye kujinka wavyele wose, na umwana ukunga weleke kajimbikwa!

⁴³Ilaila vivihi mbuli ino, vikaleka mame ywa Zumbe ywangu anitalamkile?

⁴⁴Nize nive indamsa yako, kazana mwe nda yangu niyo katugusa kwa chinyemi.

⁴⁵Chinyemi kwa weye uzumile longa mbuli ziya ugambilwe kulaila kwa Zumbe nazichinte!”

⁴⁶Maliyamu niyo alonga, “Umoyo wangu wamtogola Zumbe,

⁴⁷no muye wangu wamwelelwa Chohile Mwambula ywangu,

⁴⁸kwaviya kanikumbuka, mtumwa wakwe mnyanyahala! Kukongela vino haluse na kujendeleza, vyeleko vyose navinitange mjimbikwa,

⁴⁹kwaviya Chohile mta Udahi anidamanyiza vintu vikulu. Zina dyakwe ni ukuka.

⁵⁰Mbazi zakwe zekala vyeleko na vyeleko kwa wadya wakumwogoha.

⁵¹Kadamanya vintu vikulu kwa mkono wakwe. Kawasambalagasa wata kweduvya fanyanyi zawo mwe myoyo yawo.

⁵²Kawaseleza maseuta wata nguvu kulaila mwe vigoda vyawo vyo useuta, na kuwakweza wachiwa.

⁵³Kawegusa wata sala kwa vintu vyedi, na kuwabalaza wagoli mikono ibule.

⁵⁴Kamwambiza Izulaeli, mndima ywakwe, naho kawafila mbazi wantu wakwe mazuwa yose.

⁵⁵Saviya alongile kwa wababa zetu Bulahimu na lweleko lwakwe lose mazuwa yose!”

⁵⁶Maliyamu niyo ekala na Elizabeti myezi mitatu, niyo auya kaya.

⁵⁷Mazuwa ya Elizabeti yo kwefungula yeze yabule, niyo efungula mwana chilume.

⁵⁸Wantu we haguhi hakwe hamwenga na walukolo wakwe weze weve ivyo Zumbe amfilise mbazi, niyo wose weleleswa hamwenga naye.

⁵⁹Mwana eze abule mazuwa mnane, weza kumjela ngasu. Niyo waunga wamwinke zina dya tati yakwe, etangwe Zakaliya.

⁶⁰Mna nine niyo agamba, “Bule! Zina dyakwe netangwe Yohana.”

⁶¹Wamhitula, “Mna hahana mntu mo lukolo lwenyu akwitangwa zina idyo!”

⁶²Niyo walonga na Zakaliya kwa vilagiso chani wamanye ivyo akunga amwitange mwanawe.

⁶³Zakaliya niyo alombeza wamwinke chibawo awandike, niyo awandika vino, “Zina dyakwe netangwe Yohana.” Wose niyo wehelwa vidala!

⁶⁴Ahadya Zakaliya niyo adaha kulonga naho, niyo akonga kumjimbika Chohile.

⁶⁵Wantu we haguhi hakwe niyo wogoha, na mbuli za vintu ivyo niyo zalongwa kose kwa wagulu wose we isi ya Yudeya.

⁶⁶Chila evile mbuli izo, afanyanya mo moyo wakwe na kweuza, “Ivyo mwana uyo natende mntu ywani? Kwaviya udahi wa Zumbe wi hamwenga naye.”

⁶⁷Zakaliya, ise dya Yohana, amemezwa Muye Ukukile, naye kalonga mbuli ino kwa uwoni kulaila kwa Chohile.

⁶⁸Ajimbikwe Zumbe, Chohile ywa Izulaeli! Kwaviya keza kuwambiza wantu wakwe na kuwambula.

⁶⁹Kachinka suwe Mwambula mta nguvu, kulaila mo lukolo lwa Daudi, mtumwa ywakwe.

⁷⁰Saviya alongaga kukongela nkongo, kujinkila kwa wawoni wakwe wakukile,

⁷¹kugamba na chambulwe kulaila mwe wankondo wetu, na kulaila mwe mikono ya wadya wose wakuchihiwa.

⁷²Alongaga nawawonele mbazi wadalahala wetu, na kudikumbuka lagano dyakwe dikukile.

⁷³Elisaga kwa Bulahimu mkale ywetu,

⁷⁴kugamba nachambule kulaila mwa wankondo wetu. Naho nachitende chidahe kumsankanila Chohile hehena kogoha,

⁷⁵kwa ukuka na kwa kuwoneka wedi kwakwe, mazuwa yose yo ujima wetu.

⁷⁶“Nawe mwanangu, nawitangwe muwoni ywa Chohile Mkulu. Kwaviya naulongole kubula kulongozi kwa Zumbe, chani umdamanyize sila.

⁷⁷Kuwagambila wantu wakwe kugamba nawambulwe kwa kulekeilwa masa yawo.