Look 1:11-77

¹¹Sodn-wan, wahn aynjel fahn di Laad apyaa tu Zakaraiya pahn di rait han said a di alta weh dehn di bon di insens.

¹²Wen Zakaraiya si ahn, ih jomp weh ih mi soh fraitn.

¹³Di aynjel seh tu ahn, “Zakaraiya, noh frayd, man! Gaad ansa yu pryaaz. Yu waif Ilizabet wahn ga wahn son, ahn yu mos naym ahn Jan.

¹⁴Ih oanli wahn mek unu hapi ahn unu haat wahn glad, ahn lata peepl wahn glad tu wen di baybi baan,

¹⁵kaa ih wahn bee wahn impoatant man eena di sait a Gaad. Ih noh fi jrink no kaina wain er lika. Eevn fahn bifoa ih kom owta ih ma beli, ih wahn ful op a di Hoali Spirit.

¹⁶Sayka hihn, wahn lata di peepl a Izrel wahn ton bak tu di Laad dehn Gaad.

¹⁷Jan wahn dehdeh bifoa di Laad kohn, ahn ih wahn ga di sayhn spirit ahn powa weh di prafit Ilaija mi ga, ahn ih wahn mek di pa dehn haat geh saaf tuwaadz dehn pikni agen. Ahn dehn wan weh mi haad-ayz ahn weh mi ton weh fahn Gaad wahn si sens ahn chaynj dehn wayz ahn liv laik how gud peepl sopoas tu liv. Aala dis mi fi hapm fi geh di peepl dehn redi fi wen di Laad kohn.”

¹⁸Zakaraiya aks di aynjel, “How Ai wahn noa dat weh yoo di tel mi da chroo? Ai don oal, ahn mi waif da noh no yong gyal needa.”

¹⁹Di aynjel ansa ahn seh, “Ai da Gaybral! Ai aalwayz deh rong Gaad, ahn da hihn sen mee tu yoo fi gi yu dis Gud Nyooz.

²⁰Bot sayka weh yu neva bileev weh Ah tel yu, yu wahn dom til wen di rait taim kohn fi mek aal weh Ah tel yu kohn chroo.”

²¹Wail dis mi-di goh aan, di peepl dehn weh mi-di wayt owtsaid staat tu wanda weh mek Zakaraiya tek soh lang eena di templ.

²²Wen ih kom owt, ih fain owt fi chroo dat ih kudn taak. Fahn di taim dehn si ahn di mek sain aata dehn ahn no werd di kom owta ih mowt, dehn figa dat ih mosi mi si wahn vizhan eena di templ.

²³Wen ih fainali don aala ih jooti da di templ, ih gaahn hoahn bak.

²⁴Soon afta aala dis hapm, Zakaraiya waif Ilizabet geh pregnant, ahn ih stay lak op hoahn fi faiv monts.

²⁵Ih seh tu ihself, “Ah noa dat di Laad du dis fi mi. At laas ih smail pahn mi ahn dig shaym owta mi fays.”

²⁶Siks monts afta Ilizabet geh pregnant, Gaad sen di aynjel Gaybral da Nazaret, weh da wahn lee tong eena Gyalilee.

²⁷Ih sen ahn tu wahn lee yong laydi weh nayhn Mayri weh da-mi wahn verjin. Shee mi ingayj tu wahn man weh mi nayhn Joazef. Hihn mi kohn fahn King Dayvid famili lain.

²⁸Wen Gaybral apyaa tu Mayri, ih seh, “Heloa! Di Laad deh wid yu, ahn ih oanli di smail pahn yu.”

²⁹Mayri mi wel kanfyooz wen ih yehr dat, ahn seh tu ihself, “Ah wanda weh hihn meen bai dat?”

³⁰Bot Gaybral seh, “Noh frayd, Mayri. Gaad pleez wid yu.

³¹Yu wahn ga wahn lee baybi bwai, ahn wen ih baan, yu fi naym ahn Jeezas.

³²Hihn wahn bee grayt, ahn dehn wahn kaal ahn di Son a di moas hai Gaad. Di Laad Gaad wahn gi ahn ih grayt-grayt-grayt-granfaada Dayvid chroan.

³³Ih wahn rool oava di peepl a Izrel dehn fareva, ahn fi hihn kingdom wahn neva kohn tu wahn en.”

³⁴Mayri aks di aynjel, “Bot da how dis wahn hapm? Ai da stil wahn verjin.”

³⁵Di aynjel seh, “Di Hoali Spirit wahn kohn pahn yu, ahn di powa a di moas hai Gaad wahn kova yu. Dats wai dehn wahn kaal dis hoali baybi Gaad Son.

³⁶Az a mata a fak, eevn yu faamli Ilizabet, weh don oal ahn kudn ga no baybi, siks monts pregnant rait now!

³⁷Yu si, notn noh deh weh Gaad kyaahn du.”

³⁸Mayri seh, “Ai da di Laad servant. Mek evriting hapm tu mi jos laik how yu seh.” Den di aynjel lef ahn.

³⁹Wahn lee wail afta dat, Mayri geh redi ahn ih mikays gaahn da wahn tong weh mi deh monks di hil dehn da Judeeya,

⁴⁰weh Zakaraiya ahn Ilizabet mi liv. Wen ih reech dehn hows, ih gaan eensaid ahn hayl Ilizabet.

⁴¹Az soon az Ilizabet yehr Mayri vais, di baybi jomp eena ih beli ahn Ilizabet geh ful op a di Hoali Spirit.

⁴²Ih bos owt ahn seh, “Gyal, owta aala di laydi dehn, yoo da di wan weh Gaad bles di moas, ahn ih bles di baybi weh yu wahn baan tu.

⁴³Bot da hoo mee soh fi mek mi Laad ma kohn luk fi mee?

⁴⁴Fahn di taim Ah yehr yu vais, di baybi jomp eena mi beli weh ih mi soh glad.

⁴⁵Gaad bles yu kaa yu bileev dat weh ih tel yu wahn kohn chroo!”

⁴⁶Den Mayri seh, “Ah prayz di Laad wid aal weh Ah ga,

⁴⁷ahn mi spirit oanli di rijais sayka Gaad mi Sayvya,

⁴⁸kaa ih memba mee, weh da ih hombl servant. Fahn ya goh bak, evri jenarayshan wahn seh dat Gaad oanli bles mi.

⁴⁹Kaa Gaad Almaiti du wandaful tingz fi mi, ahn fi hihn naym hoali!

⁵⁰Ih shoa mersi tu evribadi weh rispek ahn, fahn wan jenarayshan tu di neks.

⁵¹Wid ih oan han ih du wahn lata powaful ting. Dehn hai ahn maiti wan weh tink dehn deh op deh, ih bring dehn dong tu notn.

⁵²Ih eevn tek dong king fahn aafa dehn chroan, bot ih rayz op aala dehn wan weh hombl.

⁵³Dehn hongri beli wan, ih gi dehn nof gud ting fi eet, bot di rich wan dehn, ih sen dehn weh wid dehn too lang han di heng dong da dehn said.

⁵⁴Ih mi help ih servant Izrel; ih mi memba fi shoa mersi tu ahn.

⁵⁵Kaa ih mi pramis fi help Aybraham ahn shoa mersi tu aala ih jenarayshan dehn kohn rait dong.”

⁵⁶Mayri stay deh wid Ilizabet fi bowt chree monts, den ih gaahn hoahn bak.

⁵⁷Now di taim kohn fi Ilizabet baan di baybi, ahn ih ga wahn son.

⁵⁸Wen ih nayba ahn ih faamli dehn yehr dat Gaad mi soh kain tu shee, dehn mi oanli rijais lang wid ahn.

⁵⁹Wen di baybi mi ayt dayz oal, dehn kohn fi serkomsaiz ahn, ahn dehn mi waahn naym ahn Zakaraiya, afta ih pa,

⁶⁰bot ih ma seh, “No! Ih wahn nayhn Jan.”

⁶¹Di peepl dehn seh, “Jan! Bot nobadi eena fi yu faamli nayhn soh.”

⁶²Soh dehn mek sain tu Zakaraiya fi aks ahn weh hihn waahn naym di baybi.

⁶³Ih aks fi sohnting fi rait pan, ahn dehn mowt jrap oapm wen ih rait, “Di baybi naym da Jan.”

⁶⁴Az soon az Zakaraiya rait dong di baybi naym, ih tong geh loos ahn ih kuda mi taak agen, ahn ih staat tu prayz Gaad.

⁶⁵Aal di nayba dehn mi fraitn no miks sayka weh mi hapm, ahn peepl mi-di taak bowt it aal oava di hil dehn da Judeeya.

⁶⁶Evribadi weh yehr bowt it mi-di wanda ahn seh, “Da weh kaina pikni dis wan wahn bee?” Kaa Gaad han mi deh pan ahn fi chroo.

⁶⁷Den di Hoali Spirit tek kanchroal a Zakaraiya, di baybi pa, ahn ih staat tu seh weh Gaad mi tel ahn mi wahn hapm. Ih seh,

⁶⁸“Prayz di Laad Gaad a Izrel, kaa ih kohn tu ih peepl dehn ahn set dehn free.

⁶⁹Ih rayz op wahn maiti Sayvya fahn King Dayvid famili lain,

⁷⁰jos laik weh ih mi seh chroo ih hoali prafit dehn fahn way bak.

⁷¹Ih pramis fi sayv wi fahn aala wi enimi dehn, ahn fahn aala dehn wan weh hayt wi.

⁷²Dat da how ih mi shoa mersi tu wi ansesta dehn, ahn ih neva faget di agreement weh ih mek wid dehn.

⁷³Ih mek wahn oat tu wi grayt-grayt-grayt-granfaada Aybraham,

⁷⁴fi sayv wi fahn wi enimi soh dat wi ku serv ahn widowt feel frayd,

⁷⁵Ahn wi haat ku bee hoali ahn rait eena Gaad sait fi di hoal a wi laif.

⁷⁶Mi lee son, dehn wahn kaal yu wahn prafit a di moas hai Gaad, bikaa yoo gwehn heda di Laad fi mek di way redi far ahn.

⁷⁷Ahn yu wahn tel ih peepl dehn dat wen Gaad fagiv dehn sin dehn, dehn wahn geh sayv.