LUKA 1:11-77

¹¹Má i pákánbung erei, kesi angelo si Konom a purut narsá Sakaria má a tur pagas tili balsán mingin i nián osmapak uri osos lom.

¹²Ái Sakaria a mákái angelo erei má a sodar mák lala ráuráuwas.

¹³Mái sár angelo a parai singin ngoromin, “Koion una mátut, Sakaria! Ái Káláu ákte longrai á kam sung, má kam wák ái Elisabet na káhái besang i tekesi natum na kalik káláu. Una utngi ngisán mam Ioanes.

¹⁴Na gas i balam má una laes, má kán páng á kalik er na tari gasgas singin marán kálámul.

¹⁵Má kalik erei na kálámul kuluk má na ninir i ngisán i mátán ái Káláu. Kápnate lu ngin i wain ngo te dan rakrakai. Má na tep i kán liu mai Tanián a Pilpil tangkabin tili bál ái mámán sang.

¹⁶Má na lam te marán matananu til Israel dák pukdai kándi liu má dák ilang sur Káláu erei kándi Konom.

¹⁷Kalik erei na hut táil i Konom, má rakrakai káián Tanián na mon on ngorer a mon mul i Elaisa hirá, má na láklák namurwai kemen ái Elaisa. Na lu obop arsaktai rang kák di mai rang nat di suri da kepwen kaleng, má na lu pukdai tám abulbul náng kaleng uri sálán holhol a nokwan, má na aleget i matananu suri kán purpurut ái Konom.”

¹⁸Ái Sakaria a longrai ngorer má a pánsálngát i worwor er, má a parai singin angelo ngoromin, “Ngádáh ina mánán ngoi á táit minái uri narsang kabin iakte lala pupunkak má, mái kak wák ákte lala wákánkak sang mul?”

¹⁹Mái angelo a parai si Sakaria ngo, “Á iau ái Gabiriel á minái, iau lu tur i mátán táil ái Káláu. Ái Káláu sang a tari palai iau má minái iau purut suri para talsai singim á lain arbin a dos pala iau mai.

²⁰Mákái! Káplabin kápute ruruna i kak worwor minái, na gap i ngudum má káp una te worwor nák han pang i bung er tan táit minái na tur apos. Pinpidan kaiak minái na hut muswan i kán pákánbung sang.”

²¹Matananu di lala nana Sakaria má di lala holhol ngo dánih má ák lu longoi iatung i rumán osmapak.

²²Má namur a soura má kápate arwat suri na worwor mai matananu, má ngorer dikte mánán on ngo ákte mákái tekesi táit iatung i rumán osmapak. Má kápate para te worwor, a longoi akiláng sár mai limán uri narsá di.

²³Namur má, ákte artálár i kán bungun him iatung i rumán osmapak, mái Sakaria a kaleng má uri kán malar.

²⁴Má namur i te bung sár, ái Elisabet a tián. Má ákte arwat mai alim i kalang a tián pasi, mái sár kán tu kis besang iatung i rum, káp a tini so uri malar. Má a parai ngoromin ái Elisabet,

²⁵“Ái Konom a lala mámna iau má a tangan iau má a tari kalik singing suri ina káhái. Tungu iau koros mák mon i kak rumrum i mátán matananu. Má onin ái Konom ákte pah palai.”

²⁶I awon i kalang palai kán tián ái Elisabet, ái Káláu a dos palai kesi angelo ngisán ái Gabiriel uri balis á Galiláiá má uri gengen malar á Nasaret.

²⁷Angelo a han mai worwor ur singin kesi kalik átlái kápte be a bop mai káláu, ngisán ái Maria. Má kalik átlái erei ákte mon i tar kári suri na kila pasi kesi kalik kaukak ngisán ái Iosep, a gegen si kabisit Dewit.

²⁸Angelo a han hut i narsán má ák parai singin ngoromin, “Maria, ái Káláu a laes mam iáu má a kis i narsam!”

²⁹Ái Maria a longrai worwor erei a parai á angelo uri narsán, má a rogorogo i kán hol mák hol on ngo, “Matngan pinpidan ngádáh á ngoro minái?”

³⁰Má angelo a parai singin ngo, “Koion una mátut, Maria, kabin ái Káláu a lain kuluk mam iáu má ákte ilwa pas iáu.

³¹Una longrai be, Maria! Una tián besang má unáng káhái kalik án káláu, má una tar ngisán mam Iesu.

³²Ái na kálámul pakta da árngai ngisán, má ái mul da tar ngisán ngo Natun ái Káláu Sorsorliu. Ái Káláu er Konom na tari ur singin á kiskis án kabisit si Dewit kámpupun,

³³má ái mul na kabisit áklis i tan sumlahin ái Iakop, má kán lolsit kápnate pang kus!”

³⁴Ái Maria a longrai ngorer má a parai singin angelo ngo, “Ngádáh sang na hut ngoi uri narsang á ngoromin, kabin káp iau te bop be mam tekesi kálámul?”

³⁵Má angelo a kosoi ngoromin, “Tanián a Pilpil na sos i iáu, má rakrakai káián ái Káláu Sorsorliu na kis i narsam. Má ngorer kalik er na páng besang, da utngi ngo a pilpil má da utngi mai Natun ái Káláu.

³⁶Una hol pas Elisabet er buham, ái koner di lu parai ngo a koros, má ákte lala wákánkak mul. Mái sár onin ákte won má kán kalang a tián mai kalik án káláu.

³⁷Káplabin kápte kesi táit ngo ái Káláu kápate arwat suri na longoi. Tan boh táit no ái Káláu a artálár suri long arwat pas noi.”

³⁸Ái Maria a longrai ngorer má a parai singin angelo ngo, “Na longoi sár ngorer u parai mam iau ái Konom, kápkabin ngo iau mul iau kán toptop.” A be parai ngorer ái Maria, má angelo a han pas alari.

³⁹Te bung namur ái Maria a eran má a han suri mák Elisabet. A sangsangar i tapam tangrai sál ái Maria urami balis á Iudáiá imi pungpung, mák han hut iatung i malar si Sakaria

⁴⁰máng kusak uri kán rum mák rahrah pas Elisabet iatung.

⁴¹Má ngo ái Elisabet a longrai worwor si Maria, kalik imi bál ái Elisabet a lala biluk. Má i pákánbung erei sang, Tanián a Pilpil a sos i Elisabet,

⁴²mái Elisabet a worwor mai worwor án arasosah má a worwor mai lala kaungán ur si Maria ngoromin, “Ái Káláu a lain kuluk mam iáu, Maria, alari boh wák no! Má na kuluk mul mai kalik er i balam una káhái be!

⁴³Suri dánih á matngan táit ngoro minái a hut i narsang, ái mámán ái kang Konom a purut suri laum iau?

⁴⁴I pákánbung u han purut mainái má uk parai te worwor, má irngán kam worwor a kusak uri talngang, ki kalik minái i balang a gasgas má a lala biluk.

⁴⁵Iáu kuluk pala kápkabin ngo ukte ruruna i kán worwor ái Konom a parai singim ngo na long arwat pasi sang.”

⁴⁶Má namur ái Maria bul a parai kán saksak án parpara agas ngoromin, “Balang a árnga Konom,

⁴⁷má taniang a gasgas sur Káláu kak Tám Araliu!

⁴⁸Suri dáh, a hol pápta iau má iau kán maris án toptop sár. Má turpasi til onin, bos ngaul matananu no da lu utung iau ngo iau kuluk pala,

⁴⁹kápkabin suri lala támin táit ákte longoi mam iau ái Koner a Rakrakai Sorliu. A pilpil i ngisán!

⁵⁰Turpasi tungu i akaksim nák han pang i arahrahi, ái rung di lu rumrum on tili keskeskesi ngaul kálámul, a inngasi kán armámna uri narsá di.

⁵¹A lu longoi tan támin táit a rakrakai mai limán. A lu long sara di ái rung di apakta pas di sang.

⁵²A kip asosih i di á tara kabisit tili kándi kiskis, mái sár a apakta pas di ái rung di maris.

⁵³A lu akáng di mai lain táit ái rung di sáhár, má a lu dos palai tan konom mai wáin lim di.

⁵⁴A kebeptai sang á oror er a oror mai ur singin rang támin i git, má ur si Abaram, má ur si di á tan sumlahin kalik mur. Má kán oror na kis áklis má kápnate rah! A hol páptai kán oror suri mámnai matananu Israel, má ngorer a tangan di.”

⁵⁶Ái Maria a arahi kán parpara agas, má namur a kis i narsá Elisabet artálár mai atul i kalang, má namur a elkaleng ur Nasaret.

⁵⁷Má namur pákánbung ákte páput ngo ái Elisabet na káhái natun, ngorer a kákáh má a káhái natun kalik káláu.

⁵⁸Rang buhán má di no tili malar erei di longrai kalik ákte páng, má di ot kuluk suri armámna káián ái Konom uri narsá Elisabet, má ngorer di lala gasgas má parmat mam Elisabet.

⁵⁹Kalik ákte liu artálár mai awal i bung, má namur di hut talum suri kut aririu i kalik, má di nem suri tari ngisán kalik mam Sakaria ngo na kipi ngisán sang ái kákán.

⁶⁰Mái sár ái mámán a parai ngo, “Koion. Ngisán á kalik min ái Ioanes.”

⁶¹Di longrai ngorer má dik parai si mámán ngoromin ngo, “Kápte kesi buh gaur mai matngan ngisán ngorer suri ngo gita utngi kalik mai.”

⁶²Má namur di worwor mai lim di suri ák mákái ái Sakaria, má di gátnai suri matngan ngis ngádáh ái kákán sang á kalik a nem on ngo na utngi mai á natun.

⁶³Sakaria a worwor mai limán uri narsá di iatung sur te pákán ram, má ding kip tari kesá pákán ram, má ák le i ngisán kalik on ngoromin ngo, “Ngisán kalik erei ái Ioanes.” Di mákái ngorer má dik lala sodar.

⁶⁴Má káp melek sár mák pasbat mul i ngudun ái Sakaria má a worwor mák para agas Káláu.

⁶⁵Má matananu tili malar er di mákái ngorer má dik mátut. Má namur arbin suri tan táit minái a hut pakta má a han arkaliut i balis no á Iudáiá imi pungpung.

⁶⁶Mái rung di longrai arbin erei di lala holhol suri, má di gátna ngo, “Matngan dánih na longoi á kalik erei má na matngan kálámul ngádáh?” Di parai ngorer kápkabin ngo rakrakai má ololoh káián Konom a kis tiklik mai.

⁶⁷Má Tanián a Pilpil a sos i Sakaria er kákán kalik, má ngorer ái Sakaria a parai kán worwor tus ngoromin,

⁶⁸“Git no sang gita párnga Káláu er Konom káián matananu Israel, suri ákte hut sosih má ák tangan pasi kán matananu alari kángit kis án kamkabat, má a asengsegeng i git.

⁶⁹A atri kángit Tám Araliu a tikai mingin, kes er tili gegen si Dewit,

⁷⁰ngorer ákte para páksi alhirá sang mai ngus di á kán tan tám worwor tus.

⁷¹Ákte oror suri na saras pas git tili limán kángit tan boh kurtara má alar rung erei di lu mikmikwa git.

⁷²A parai ngo na inngasi armámna si di á rang kámpup i git, má suri na kebepta áklisnai kán kamkabat er ákte parai alhirá sang.

⁷³Ái á oror er a oror pagas mai ur si Abaram, kámpup i git,

⁷⁴ngo ái Káláu na saras pas git tili limán kángit tan kurtara. Má ngorer gita sengsegeng suri lotu uri narsán mai bál git a matau má mátut na koion,

⁷⁵má suri gita tám nokwan má tám pilpil i mátán táil ái Káláu i bosbos bung ngo gita liu on.

⁷⁶Á iáu, natung, da utung iáu mai tám worwor tus káián ái Káláu Sorsorliu, kabin ngo una láklák táilna Konom má una timani kán sál.

⁷⁷Ngorer una atintini kán matananu suri da mánán ngo ái Káláu a nem ngo na pah palai kándi sápkin tatalen suri na aliu di