Lucas 1:11-77

¹¹Asi et manpaila di anghel di Diyos en sisya ay pinmipika sin makannawan di altar ay pangipooan das insinso.

¹²Nakibtot si Zekarias sin nangilaana yan inmegyaegyat.

¹³Ngem kanan et din anghel en sisya, “Adi ka emegyat ay Zekarias, tan dinngen Diyos din kindaw mo. Isonga si asawam ay Elizabet et mawad-an to et man-anak si lalaki et asi ka ngadanan si Juan.

¹⁴Peteg di ragsak mo ya siya abe sin ad-ado ay ipogaw mo maianak sisya,

¹⁵tan napateg sisya sin pangilan Diyos. Masapol ay adi man-in-inom si danom di obas ono odom ay bemeteng, yan manipod pay laeng sin daan maianak, napno sin panakabalin di Ispirito Santo.

¹⁶Awni man et ad-ado di pantaoliena ay iib-am ay Israelita en Diyos ay Apo da.

¹⁷Mangon-ona mo din Apo, yan din panakabalina et kaman met laeng din panakabalin ay indawat di Ispirito Santo en Elias ay mamadto ed nabaon. Pan-oolnosena din man-iibaw ay sin-ama, ya pantaoliena abe din adi manongtongpal en Diyos ta din nemnem da et mais-o sin nemnem di nalinteg ay ipogaw. Siya di din iyat na ta say masasagana din ipogaw sin omalian di Apo.”

¹⁸Pag kanan Zekarias sin anghel, “Aw, ngem intoy pangammoak ay matongpal dana? Tan nay ay enggay nakayak ya nabakes abe si asawak.”

¹⁹Kanan aben din anghel, “Sak-en si Gabriel ay mansilsilbi en Diyos, et sisya di nangibaa en sak-en ta enak ibaga en sik-a din nay siged ay damag.

²⁰Ngem gapo ta adim patien din inbagak, awni man et maomel ka enggana ay domateng din agew ay temet-ewaana, tan awni et matongpal din inbagak mo domateng din kosto ay timpo ay inkeddeng Diyos.”

²¹Masmasdaaw din kaipoipogaw ay manman-ed en Zekarias, tan mabamabayag sin oneg di Timplo.

²²Idi bomala pay sisya, sinsinyasanas daida tan adi makakali, et say nangammoan da ay waday inpailan Diyos en sisya ed oneg.

²³Makdeng pay ay nansilbi da sin Timplo, sinmaas Zekarias.

²⁴Baken nabayag et nawad-an si asawa na ay si Elizabet, et nanpopokok sin beey da si limay bowan.

²⁵Kananas nemnem na en, “Kambaw ed wani et sineg-angan Apo Diyos sak-en, tan kinaana din kaibabbainak sin ipogaw.”

²⁶Sin maikan-em ay bowan din liton Elizabet, inbaan Diyos din anghel na ay si Gabriel ed Nazaret ay esay ili sin probinsiya ay Galilea.

²⁷Tan waday ibaga na sin esay balasang ay magay nangiwgiwit en sisya ay naitotolag ay makiasawa en Jose ay polin din si Ari David. Din ngadan di balasang ay sana et si Maria.

²⁸Inmey din anghel en sisya yan kanana, “Komosta ka. Kadkadwaen dakan Apo Diyos ya peteg di seg-ang nan sik-a.”

²⁹Palalo ay nariribokan si Maria sin inbagan di anghel et anaanapena mo sino ngin di laydena ay kalien.

³⁰Siya di et kanan din anghel en, “Adi ka emegyat ay Maria, tan sineg-angan dakan Diyos.

³¹Awni et mawad-an ka, et man-anak kas lalaki et ngadanam si Jesus.

³²Napateg tos sisya ya makwani en Anak di Kangatoan ay Diyos. Pan-arien aben Diyos sisya ay kaman din apo na ay si Ari David ed nabaon,

³³et sisya di mangituray sin polin Jacob ay eng-enggana, tan iwed polos patinggan di panturayana.”

³⁴Asi et kanan Maria sin anghel, “Aw, ngem intoy iyat na ngin, tan iwed met di nangiwgiwit en sak-en?”

³⁵Sinombat din anghel yan kanana, “Awni et emey din Ispirito Santo en sik-a ya malinongan ka sin panakabalina. Et siya nay gapo ay din nasantoan ay ianak mo et makwani en Anak en Diyos.

³⁶Nemnemem din ton-od mo ay si Elizabet. Olay mo kanan da en basig ya nabakes pay sisya, nawad-an pay dedan, et enem ay bowan din litona ed wani.

³⁷Tan mo maipanggep en Diyos, maga di adi na kabaelan ay amagen.”

³⁸Kanan pay Maria, “Naeyak kayman ay mansilbi en Apo Diyos. Sapay koma ta maitongpal en sak-en din inbagam.” Et pag komaan din anghel.

³⁹Idi siya di mansaganas Maria et dalasena ay emey sin beey da Zekarias ay wada sin esay ili sin kadondontogan ed Judea.

⁴⁰Somawang pay sidi, sinenggep sin beey da et komostaenas Elizabet.

⁴¹Idi dinngen Elizabet din kalin Maria, mankeykey din litona. Pag mapno sin panakabalin di Ispirito Santo

⁴²yan ipigsa na ay mangwani, “Sik-a met kayman di kagagasatan sin am-in ay babai, yan nagasat abe din moyang ay ianak mo!

⁴³Ay sino aya di kaipogaw ko ta inmali ka ay pomasyal, sik-a pay san inan di Apok?

⁴⁴Tan idi kosto ay dinngek din kalim, nankeykey din liton ko si ragsak na.

⁴⁵Peteg ay nagasat ka, kanak, tan pinatim ay temet-ewa din inbagan Apo Diyos en sik-a.”

⁴⁶Pag kanan Maria, “Daydayawek si Apo Diyos sin am-in ay nemnem ko,

⁴⁷et palalo di ragsak ko begew en sisya ay mangisalakan en sak-en,

⁴⁸tan ninemnem nas sak-en ay nababa ay baa na. Isonga manlogi ed wani, kanan am-in di ipogaw en nagasatak

⁴⁹manbegew sin nakaskasdaaw ay inamag din manakabalin ya nasantoan ay Diyos.

⁵⁰Masmaseg-ang sin am-in ay mangipateg en sisya ay manlogi sin damo ay ipogaw enggana sin am-in ay inmon-onod.

⁵¹Ipappaila na din panakabalina, tan bokbokabokena di ipogaw ay mangipapangato sin nemnem da ya din am-in ay plano da.

⁵²Ipababa na abe din nankangangato ay manturay yan ipangato na abe din nababa ay ipogaw.

⁵³Idawtana pay din kaseseg-ang si siged enggana ay mapnek da, ngem din babaknang pay et pakaanenas daida ay nakoskosan da.

⁵⁴Tinongpal na din inkari na sin ap-apo tako ya binadbadangana abes datako ay Israelita ay mansilbi en sisya.

⁵⁵Aw, ninemnem na ay sineg-angan din si Abraham, siya abe en datako ya am-in ay poli na ay eng-enggana.” Siya say kanan Maria ay mangidayaw en Diyos.

⁵⁶Nakitetee en da Elizabet si tolo ay bowan, asi somaa.

⁵⁷Idi dinomteng din pan-anakan Elizabet, lalaki din in-anak na.

⁵⁸Idi dinngen din katokmang ya toton-od da din nakaskasdaaw ay seg-ang Diyos en sisya, nakiragragsak da abe.

⁵⁹Sin maikawao ay agew din moyang, nasinop din katokmang ya toton-od da Zekarias ta kogiten ya ngadanan da, tan say ogalin di Judio. Inpangadan da koma din ngadan ama na ay Zekarias,

⁶⁰ngem kanan et ina na en, “Baken sa! Din ngadana et si Juan!”

⁶¹“Ay tan? Iwed polos di ton-od yos manngadan issa!” kanan da.

⁶²Asi da et sinyasan si ama na ay mamoot mo sinoy laydena ay ingadan sin moyang.

⁶³Nanpaa si Zekarias si pansolatana yan di insolat na yan, “Di ngadana, si Juan.” Et peteg ay nasdaaw da am-in ay wadas di.

⁶⁴Pag et nakaan din omel Zekarias yan komali ay mandayaw en Diyos.

⁶⁵Peteg ay nasdaaw din am-in ay kailian da, et mandinamag na ay naiyat sin am-in ay inil-ili sin kadondontogan ed Judea.

⁶⁶Am-in din nannannge, nemnenemnemen da yan kanan da, “Ay sino ngata di panbalinan nan moyang ay nay?” Tan maila dedan ay wada en sisya din panakabalin Diyos.

⁶⁷Idi siya di, napno si ama na ay Zekarias sin panakabalin di Ispirito Santo yan kanana ay nangipadto:

⁶⁸“Dayawen takos Diyos ay Apon di Israelita, tan inmali ay mangipawaya en datako ay ipogaw na.

⁶⁹Tan inbaa na di manakabalin ay mangisalakan en datako ay say polin di nansilbi en sisya ay si Ari David.

⁷⁰Siya met laeng din inpaipadto na sin nasantoan ay mamadto ed nabayag

⁷¹ay mangwani en isalakanas datako sin kaibaw tako ya din am-in ay mangililiget en datako.

⁷²Kanana abe en tongpalena din inbaga na sin ap-apo tako maipanggep sin seg-ang na et adi na linglinglingan din nabanol ay inkari na en daida.

⁷³Inkari na abe en Abraham ay apo tako

⁷⁴ay isalakanas datako sin kaibaw tako ta say adi tako emegyat ay mansilbi en sisya

⁷⁵ya ta nasantoan ya nalinteg tako sin pangiilaana enggana sin kaposposan di leng-ag tako.

⁷⁶Sik-a pay abe ay anak ko, sik-a din makwani en mamadton Diyos ay Kangatoan, tan mangon-ona ka mo din Apo tako ta isaganam din danena.

⁷⁷Ibagam sin ipogaw na ay mabalin ay maisalakan da mo mapakawan di basbasol da.