Lucas 1:11-77

¹¹Ari roñaagakari Zacarías imaninkarite Awinkatharite, ikatziyimotapaakari rakoperoki ritayirowa kasankainkari.

¹²Antawo ithaawanake, iyokitziitanake iñaawakerira.

¹³Irojatzi riñaanatantanakari, ikantziri: “Zacarías, eero pithaawi. Tema ikemaitakero pamananewo. Ari piñaakero piina Elisabet intzimai eentsite, iri piiteri Juan.

¹⁴Arika intzimake pitomi, osheki pinkimoshirewenteri, ari inkantyaari eejatzi atziripaini.

¹⁵Tema iriiperori inkantakayaari Pawa. Eero pirakairi shinchaari ishinkitaitari. Tema risaikashiretantatyaari Tasorenkantsi tekera itzimiita.

¹⁶Ikenkithashiretakairi Israel-iite inkemisantairi Awinkatharite Pawa.

¹⁷Iriitake jewatapaakerine Awinkatharite. Inkantakayaari ishintsinka Elías, ari raapatziyakaayetaiyaari ipaapateetari maawoini rowaiyane. Ari rotsimaryaashiretairi katsimashireri, ari onkantya riwetsikashiretantaiyaari inkemisantairi Awinkatharite.”

¹⁸Rakanakeri Zacarías maninkari, ikantziri: “¡Ari! ¿Tsikama onkantya niyotantyaawori jiroka? Antarikitakena naaka, eejatzi okantzitaka noina.”

¹⁹Ikantzi maninkari: “Naakatake Gabriel, poñaachari Pawaki. Rotyaantakena nonkamantemiro Kameethari Ñaantsi.

²⁰Iro kantzimaitacha, okantakaantziro pithainkawaantetakena, kisowaante pinkantya iroñaaka irojatzi imonkaatantakya okaatzi nokantakemiri.”

²¹Saikaiyatsini itsipa jakakeroki royaawentaiyirini Zacarías, ari rosampitawakaanaka: “¿Iitaka rosamanitantari Zacarías tasorentsipankoki?”

²²Ikanta rishitowawetapaa Zacarías, te okanta inkenkithawaitapai, rookowaitashitapaaka. Ari riyotaiyanakeni eenitatsi iñaakeri tasorentsipankoki. Rashi rowanakero ikisowaantetanake.

²³Irojatzi imonkaatantaawo kiteesheri rantawaitzi tasorentsipankoki, piyaawo ipankoki.

²⁴Okanta Elisabet iina Zacarías, motzitake. Antawoite okenkithashiretaka, te ishitowai opankoki ikaatzi 5 kashiri omairentaka, okantashirewaitzi:

²⁵“Irootake inintakaakenari Pinkathari naaka, ompoñaantyaari eero imanintaitantana.”

²⁶Ikanta rawisake 6 kashiri, rotyaantairi Pawa maninkari Gabriel nampitsiki jitachari Nazaret saikatsiri Galilea-ki,

²⁷iñeero mainawo kaari yoterine shirampari, jitachari María, tema irootake iinantyaari mainari jitachari José, icharine David-ni.

²⁸Ikanta ikyaapaake maninkari isaikira María, ikantapaakero: “¡Pinkeme María, itsipashiretakemi eeroka Awinkatharite. Pawisayetakero otsipa tsinanepaini ineshironkaperotaimi Pawa!”

²⁹Okanta oñaawakeri maninkari, iyokitziitanake, okenkithashiryaakotziro ikantapaakerori riwethatapaakawo.

³⁰Irojatzi ikantantanakawori maninkari: “María, eero pithaawi, tema ineshironkatanewo Pawa pinatzi.

³¹Ari piñaakero pimotzite, intzime peentsite. Iri piiteri JESÚS.

³²Iriitake materone ririiperote, iitaiteri Itomi Jenokisatzi. Tema Pawa Awinkatharite, iriitake pinkatharitakairine roshiyakagairi pairani icharineni David-ni ipinkatharitakaakeri.

³³Irijatzi pinkathariwentairine ikaatzi icharinetari Jacob-ni, rashi rowaatyeero impinkathariwentantai irirori.”

³⁴Akanakeri María, okantziri: “¿Tsikama onkene nomotzite, te noñiiri shirampari?”

³⁵Rakanakero maninkari, ikantziro: “Iriira kantakayaawone Tasorenkantsi. Tema ritsimankantakemiro ishintsinka Jenokisatzi, oshiyaawome itsimankantzi aamparentsi. Irootake iitantyaari peentsite Tasorentsi Itomi Pawa.

³⁶Ari okantaka eejatzi pisheninkathori Elisabet, ikantaweetari maaniro, okantawetaka antawokiwetaka iroori, motzitai. Ikaatake oyashirite 6.

³⁷Tekaatsi kompitzimotyaarine Pawa.”

³⁸Irojatzi okantantanakari María: “Naakatake rimperatanewo Pinkathari, rantenawo okaatzi pikantakenari.” Irojatzi ripiyantanaari maninkari.

³⁹Okanta otsipa kiteesheri, shintsiini iyaatanake María, jatake tonkaariki Judea-ki isaikira nampitsi,

⁴⁰irojatzi areetantakari ipankoki Zacarías, iwethatapaakawo Elisabet.

⁴¹Okanta okemawakero Elisabet iwethatapaakawo María, shewatanaka omotzitakeri. Tema ikantakaanakityaawo Elisabet Tasorenkantsi,

⁴²okenkithawaitanake shintsiini iroori, okantanake: “Eerokatake anairori otsipa tsinanepaini ritasonkawentaitakemi. Ari inkantzityaari eejatzi powaiyane.

⁴³¿Iitaka pipokashitantanari irinirotyaari Nowinkatharite?

⁴⁴Tema nokemawakemi piwethatapaakena, shewatanaka nomotzitakeri naaka, kimoshiretanake.

⁴⁵Kimoshire pinkantaiya eejatzi eeroka pikemisantake, tema ari imonkaataiya okaatzi ikowakaakemiri Awinkatharite.”

⁴⁶Irojatzi okantantanakari María: Antawoite niweshiryaawentaiyaari Nowinkatharite,

⁴⁷Kimoshire nonkantawentyaari Pawa owawisaakoshiretainane.

⁴⁸Tema iñaakero rimperatanewo ashironkaawaitaka, Aripaite inkantayeetai: Antawoite ritasonkawentaitakero.

⁴⁹Tema antawoite rantzimotakenari matzirori otzimi ishintsinka. ¡Tasorentsi ini iwairo!

⁵⁰Rashi rowaatyeero ineshironkayetairi inkaate incharineyeetyaari paata, Inkaatera pinkathayetairine.

⁵¹Iroowa ishintsinka rantantayetakari. Raperotzitairi ikenkithashirewetari shamewaitatsiri.

⁵²Pawa kantakaakawori eero riyaatakaantawo impinkatharite ikaatzi pinkathariwetachari. Iri iñaaperotakaayeta ikaatzi tsinampashirewetachari.

⁵³Rashaagantakaayetari ikaatzi tasheneentawetachari, Iriima ikaatzi ashaagantawetachari raapithatairi oshekitzimowetariri romishitowakeri.

⁵⁴Ramitakotairi Israel-iite, tema rimperatanewo rinayetake. Irojatzi ineshironkayetziri,

⁵⁵Tema iro ikantaitakeriri pairani acharineyetakari, Retanakari Abraham-ni irijatzi maawoini incharinetaiyaari.

⁵⁶Ari isaikimowaitapaintziro María jiroka Elisabet ikaatzi mawa kashiri, irojatzi ipiyantaawo opankoki iroori.

⁵⁷Okanta imonkaataka ontzimaanitantyaari Elisabet, tzimake otomi.

⁵⁸Ari ripokaiyakeni osheninkapaini ikimoshirewentaiyironi, tema riyotaiyakeni antawoite ineshironkatakero Pawa.

⁵⁹Maakotake 8 kiteesheri eentsi, ragaitanakeri ritomeshaanitaiteri, ari ikowaweetaka iitaiterime Zacarías, tema iwairo inatzi ipaapate.

⁶⁰Irojatzi okantantanakari inaanate: “Eero iita Zacarías, iitya Juan.”

⁶¹Ari ikantaitanakero: “¿Oitaka? Tema tekaatsi pisheninka jitachane Juan.”

⁶²Rookowakoitashitanari rosampiitziri ashitariri, tsikarika inintziri iiteri itomi.

⁶³Rookotanakero Zacarías inchakota ramaiteniri, ari rosankenatakero, okantzi: “Iitya Juan.” Iyokitziitanake ikaatzi osampitakeriri.

⁶⁴Romapokashitanaawo riñaawaitanai Zacarías. Antawoite ikimoshirewentanakeri Pawa, riwetharyaanakari.

⁶⁵Pagaanka ikantaiyanakani isheninkapaini Zacarías. Tema ithonka ikemakoitanakero tonkaariki Judea-ki okaatzi awisaintsiri.

⁶⁶Kenkithashireri ikantaiyani ikaatzi kemakotakeriri, ikantaiyini: “¿Tsikama iityaaka paata jirika? Tema kempoyaawenta rowakeri Awinkatharite jirika eentsi.”

⁶⁷Ikanta Zacarías, ashitakariri eentsi, ikantakaanakari Tasorenkantsi, ikenkithawaitanake, ikantzi:

⁶⁸Kameethari rinatzi Awinkatharite Pawa, Iwawanetari Israel-iite, Ripokake retsinaryaakoyetai.

⁶⁹Rotyaantakairi matzirori rowawisaakoshiretantzi, Iriitake incharinetyaari David-ni, tema iriitake rimperatane Pawa.

⁷⁰Iro ikenkithawaitakaakeriri pairani tasorentsitatsiri Kamantantaneri.

⁷¹Iri owawisaakotaine itzimawetaga kisaneentayetairi.

⁷²Tema ineshironkatairi ikaatzi acharineyetakari, Eero ipeyakotziro tasorentsitatsiri raapatziyawakaantyaari.

⁷³Irootake jiroka ikashaakagaitakeriri pairani acharineni Abraham, Onkaate rantzimotairi.

⁷⁴Rontsiparyaakowentai itzimawetaga kisaneentairi, Tekaatsi anthaawantya ankemisantairi.

⁷⁵Kiteshire ankantaiya. Kameethashire ankantawentaiyaari maawoini kiteesheriki.

⁷⁶Irooma eeroka notomi, iitaitemi iyamantanewo Jenokisatzi. Tema eerokatake jewatakeriri Pinkathari, piwetsikaanteri tsika inkenayetanake.

⁷⁷Eeroka kamantairine asheninkapaini, iro riyotantyaari iriitake owawisaakotantaneri. Iri peyakotakagairine ikaariperoshirewaiwetaka.