11Tala kar, *ɗubil ka Buŋdi bayniiji ɗo Zakariya ho ŋa pey ɗo meeday ta wer kaak dokkanne onniy-aka.
12Min Zakariya taliig ɗubil-ak, ŋa barjiltu ho kolaw obiiga.
13Kar ɗubil-ak gay kaawiiji aman : « Zakariya, dak ginenno kolaw. Buŋ cokiyit salaanen̰. Daaciŋ Elizabeet yaan̰ wee mico. Ya ta wee, kii kolin̰ Yaaya.
14Adin̰ yaa gine portik aale ho gee dakina yaa aaciye iŋ kiŋke ɗo bi ka ween̰ji.
15Asaan mic-ak asa gine gay riyor tatko ka Buŋdi. Wala ŋa siya maama, wala ŋa siya argi. Min ɗo adti ka yaaco di, Ruwwin ta Buŋdi miinig ko.
16Ŋa asa iyin̰ koogin ku Israyeel dakina ɗo botol ta *Rabbinco Buŋ.
17Ŋaa ogirin̰ uŋji, ŋaa gine riyoy iŋ gudurre ho iŋ ruwwine ar kaak nabi *Eli gintu awalle. Ŋaa amrin̰ aginay iŋ kooginco ho ŋaa newsin̰ gee kuuk kaƴco bombo ŋuu gine gee sellen̰. Paa kat, ŋaa n̰ume gee kuuk yaa kuuniye kun̰ji. »
18Zakariya telkiiji ɗo ɗubil ka Buŋdi-ak aman : « Nunu iŋ daatur, seertini ni zaɓ ko, kar maman naa ibine kadar maanna-aŋ ka seener ? »
19Ɗubil-ak kaawiiji aman : « Nun ko kaak ŋu koliy Jibriin kaak peya ɗo uŋji ka Buŋdi. Ŋa n̰aamintu a naan̰ iyin kabarre ta gala-anta.
20Kar kiŋ gay bal aamine ɗo kaawor. Kaawor-at yaa asen di ɗo wiktinti. Ɗo saan taar-at ko, Buŋ yaan̰ sokumin̰ bin̰ nam ƴiriy taat gamin-ak yaa kuuniye. »
21Wiktin taat Zakariya kaawiy iŋ ɗubil ka Buŋdi-ak, gee kuuk eraag kara gay ajbiytu ɗo taaye kaak ŋa taaytu atta-aka.
22Min ŋa amiltu, biy sokume. Illa ŋa tawga iŋ pisin̰ji di. Ampaa ko, gee-ak ibintu kadar maan bayinji atta ɗo ger ka Buŋdi.
23Hiyya, min kun̰ Zakariya deet kaminco, ŋu yeeptu geero.
24Ba aaro, daaciy Elizabeet ictu adi. Koyin beeƴ ta cigil geer di. Ta kaawtu ɗo adti aman :
25« Way, Rabbin tal kaatu. Diŋ ŋa imilduut kat sokun̰uwir min uŋco ka geemir. »
26Adti ka Elizabeet nec ko koyin bijigiƴ, kar Buŋ n̰aamiig *ɗubiley Jibriin ɗo geeger ka Nazareet ɗo kiɗ ka Galile.
27Ŋa n̰aamiig ɗo gemso rakki, siŋti Mariyam taat kaawco mat ko iŋ Yuusup a ŋuu obe. Yuusup gay, ŋaar min baa tan̰ Dawuud.
28Ɗubil-ak un̰jitu ɗo werti, ŋa ooyiititi, ho ŋa kaawiitit aman : « Kaŋ aacay, ka gas barkin min ɗo Buŋdi. Ŋa goy iŋ kaŋke. »
29Min Mariyam doriit kaawoy-at, ta barjiltu tak-tak. Kar ta ostu ɗo adti aman : « Taar-an gay baati maa ? »
30Ɗubil-ak kaawiitit aman : « Dak ginenno kolaw, Mariyam, asaan ka gas barkin ta Buŋdi.
31Kaa ice adi, kaa wee mico ho kaaji diye siŋ Iisa.
32Mic-ak, siŋji asa aale. Ŋuu kolin̰ Roŋ ka Buŋ ka kuwa. Rabbin Buŋ yaaji berin̰ sees ka sultan kaak min ka tacco Dawuud.
33Ŋaa goye sultan ka gee ku Israyeel doo ho meennuwiy gaasaaɗo tak-tak. »
34Mariyam telkiiji ɗo ɗubil-ak aman : « Maanna-aŋ yaa kuuniye maman asaan nun ibanno misa mitko ? »
35Ɗubil-ak kaawiitit aman : « Ruwwin ta Buŋdi yaake ase ho gudurre taat min kuwa yaake gootiŋke ar kelmo. Ansii ko, mic kaak kaa wee-ak yaa goye sellen̰ ɗo uŋji ka Buŋdi ho ŋuu kolin̰ Roŋ ka Buŋdi.
36Cokay ! Elizabeet taat min baako oki iŋ adti. Taar taat gee osiy a ta mogina din sa, diŋ adti koynay bijigiƴ ko ho taa wee mico.
37Asaan ginno maan kaak pak Buŋ. »
38Min pa-ak Mariyam kaawtu aman : « Nun gay riyor ta Rabbiner. Kaaw taat ki kaawiidu-an yaa ase ɗo botilti. » Hiyya, ɗubil-ak rasiita ho ŋa ɗeettu.
39Menaw ŋuur-ak di, Mariyam uctu ho ta birtu sak-sak iŋ uŋti ɗo kiɗ ka Zuude ɗo geeger rakki ka dambar.
40Ta un̰jitu ɗo ger kan̰ Zakariya ho ta ooyiitit ɗo Elizabeet.
41Min Elizabeet doriit ooyti-at di, mic kaak ɗo adti-ak teestu awke ho Ruwwin ta Buŋdi miiniita.
42Ta kaawtu iŋ gaaƴ toŋgo aman : « Min daaɗ okin̰co-aŋ, kaŋken di Buŋ barkiyiŋke ho mic kaak ɗo adke oki, ŋa barkiyga.
43Nun gay waa, taat nam atan̰ Rabbiner asiin talindu ?
44Talu, ɗo wiktin taat nu dorig gaaƴke di, mic kaak ɗo adir-aŋ alji gala nam ŋa awke.
45Galal loke, kaŋ taat aamin ɗo kaaw taat Rabbin kaawiike a taa nece ɗo werti ! »
46Kar Mariyam ictu riye aman : « Nu ozila Rabbin Buŋ, ŋaar kaak tatiko.
47Gelbiner miin iŋ galal, asaan Buŋ jilaanu.
48Ŋa tal aminduwir, nun taat gay riyoy ho diŋ ŋa jaalintu. Ka seener gay, min ƴiriyta ɓaayiy iŋ uŋti, gee okin̰co yaa kaawe a Buŋ berdu galal,
49asaan Buŋ kaak gin gudurre okintiti berdu gamin kuuk samaan lotu. Sellen̰ gay siŋji.
50Aminduwiy goy doo ɗo gee kuuk karmiyaaga.
51Ŋa gaarit gudurrey iŋ soriyay. Ŋa totirig gee kuuk jaala ziŋkico kuwa.
52Ŋa paayig sultinnay min ɗo jarɗico, ho ŋa jaalig masaakanna kuwa.
53Gee kuuk mey diyaagu, ŋa berco tee, ho gay gamnar gay, ŋa atkiig iŋ pisin̰co orok.
54Ŋa mogig gay riyoy, gee ku Israyeel. Ansi-ak, ŋa moyiig tale ka aminduwiy.
55Aminduwiy-at, ŋa taliit doo ɗo Ibraayim iŋ tambaay ar taat ŋa kaawiico ɗo aginiyte. »
56Min ŋaar-ak, Mariyam taaytu wer ka Elizabeet ar koyin subba pa, kar ta yeeptu gerco.
57Elizabeet, min menuwti ku weendi nectu, ta weetu mico.
58Mutkiyti iŋ aginiyti dortu a Rabbin tal aminduwti-ak, ŋu aaciytu iŋ taara.
59Min mic-ak gintu menaw porpoɗ, kar ŋu astu ɗo *ɗukume ka seln̰ol. Zer ŋu rakji diye siŋ ku tacco Zakariya.
60Kar yaaco gay kaawiico aman : « Ha’a, paaɗo ! Gii kolin̰ Yaaya. »
61Ŋuur gay telkiitit aman : « Ɗo baako, ginno gem kaak siŋji pa. »
62Kar ŋu kaawiiji iŋ pisin̰co ɗo tacco Zakariya aman : « Ki raka roŋji, gii kolin̰ waa ? »
63Ŋaar gay inditu maan ka siirindi, kar ŋa siirtu aman : « Siŋji Yaaya. » Hiyya, gee-ak okin̰co ajbiytu.
64Ɗo wer-ak, biy piltu kate ho ŋa teestu kaawe. Ŋa oziliig Buŋ.
65Gee-ak kolaw un̰jiico. Kaaw-at totirtu ɗo kiɗ okin̰ji ka dambiniidi ka Zuude ho ŋu kaawa ko ɗo bi ŋaar-ak di. Okin̰co, gee kuuk doriit kaaw-at, kolaw un̰jiico,
66ŋu obiit ɗo gelbinco ho ŋu ɗiytu aman : « Mic-aŋ asa gine maa gemira ? » Ka seener, gudurre ta Buŋdi goy iŋ ŋaara.
67Ruwwin ta Buŋdi miiniig Zakariya takan̰ mic-aka, ŋa teestu kaawe ar nabiin̰ce aman :
68« Oziliika ɗo Rabbine, Buŋ ka Israyeel asaan ŋa mogiig geen̰ji ho ŋa jiliigu.
69Ŋa imilte Gay Jilindi kaak gin gudurre min ɗo tamba ta gay riyoy Dawuud.
70An ko kaaw taat min awalle Buŋ kaawiico ɗo nabiinnay kuuk ŋa doɓtu ho ŋuur gay kaawiit ɗo geemir.
71Kaaw-at, taar ko taat Buŋ ɗiytu a ŋaate jilinte min ɗo adinte ho min ɗo pise ka gee kuuk elgitenno.
72Ŋa tal amindaw ta aginiyte ho ŋa bal rawtin jamuwiy taat taɓ ŋa obtu iŋ ŋuura.
73Jamaw-at, taar ko taat Buŋ togiltu ɗo tatte Ibraayim
74a ŋaate jilinte min ɗo adinte ho gii abdiyin̰ji bal kolaw.
75Ampaa ko, gii gine sellen̰ ho *cawar ɗo uŋji, ɗo menuwte kuuk ŋa beriite ɗo duniiner. »
76Zakariya kaawtu pey ɗo roŋji Yaaya aman : « Gem kol roŋji, ƴiriy rakki, ŋu asaan̰ kole a ki nabiin̰ce ka Buŋ ka kuwa, asaan kii ogire ɗo Rabbiner ho kiiji siyin botiliy.
77Kiico gaare ɗo geen̰ji maman ŋuu gase jile ho zunuubinnico, ŋuuco saamiyin̰co.
Luk 1
Luk 1:11-77