Luka 7:6-19

⁶Eꞌanoꞌo Iesuꞌe zeḡe teite uti azaḡa ḡihiꞌa ne onamiro. Ze ani ne uhigano feurirotene, uti azaḡa ḡihiꞌaꞌa ane vaze nu Iesu vaḡe tuḡuziro. Ebu zeꞌa Iesu mazao aradu niro, raenaꞌa, “Uti azaḡa ḡihiꞌaꞌe ꞌahige raha. 'Zuhia Boro, ḡa e neo diuḡoga rae ago zamaroꞌi, mazaḡa eꞌe mene vaze manoḡa.

⁷Eꞌanoꞌo ḡa vaḡe mene ameha. Ḡoere daꞌo roꞌi! ꞌOugine eḡe tuḡure vazeḡaniꞌa manoriꞌuma.

⁸Mazaḡa eꞌe vaze ꞌahoga ꞌuꞌuḡano gaueꞌohe, zu uti azaḡa eḡe ꞌuꞌuḡano gaueꞌohe. Eḡeꞌa vaze ꞌahi ninaꞌa, 'Onamoꞌi!' reine, aniꞌe onameꞌohe, ebu ꞌahoga omo ninaꞌa, 'Aroꞌi!' reine, aniꞌe areꞌohe. Eḡeꞌa tuḡure vazeḡa ꞌahoga ninaꞌa, 'ꞌAdi haḡaoꞌi!' reine, aniꞌe haḡaeꞌohe.”

⁹Iesuꞌa eꞌe ḡoeꞌa igirotene, ani zaguzagaro. Ebu ani vaetadu ane hegotiroteꞌe azaḡa ziro, raena, “Eḡeꞌa ziꞌohe. Badiꞌa mazao ꞌahige fie gigaruꞌeteꞌe vazeḡaꞌe Isaraela azaḡa zamaḡano ize mene horoneha!”

¹⁰Ebu ze bare uti azaḡa ḡihiꞌa ne onamirotene tuḡure vazeḡaꞌe manoroga haniniro.

¹¹Eꞌe enogano, Iesuꞌa ne ꞌahoga niḡa Naina onamiro. Ane tahiꞌatahiꞌa zu vaze ḡehaḡaniꞌa ani ḡatiniro.

¹²Ebu ze onamadu ne ḡutuꞌaḡano feurirotene, ne azaḡaꞌe rune vazeḡa herate buni ariro. Aꞌe ḡozoba ꞌahoḡa ubuḡa. Ani tibuhuga eꞌe daꞌo fureniro. Ne azaḡa ḡehaḡa zuni ḡozoba eꞌe teite ariro.

¹³Iesuꞌa ḡozoba eꞌe horonirotene, ani vetuḡaniro, ebu ninaꞌa, “Ago nianoi!”

¹⁴Iesuꞌa ꞌouge rae neadu mauḡa heratiroteꞌe azaḡa vaḡe onamadu mauḡa obonirotene ze tue edaro. Ebu ani raenaꞌa, “Ene iziga, eḡeꞌa ḡaꞌohe. Iḡunoꞌi!”

¹⁵ꞌOuge rae nirotene, rune vazeḡaniꞌa iḡune ehoradu ḡoeꞌa ḡadaheniro! Ebu Iesuꞌa bare viꞌa ꞌevoreo modiro.

¹⁶Zeḡe niduꞌa rihau rudaro zu Badia matuo haro, raenaꞌa, “Peroveta boroꞌa eme boꞌaḡano fureraneha! Badiꞌaꞌa ane vaze, emeḡe danafeha!”

¹⁷Ebu Iesuꞌa nagini haḡairoteꞌe hariḡaniꞌa Iuda habaꞌa ebu uhiḡa habaꞌa niduꞌano bororaro.

¹⁸Ioane Babatisoꞌe ḡuꞌa neḡano radiuteꞌe zamaḡano tahiꞌaḡaniꞌa ane vaḡe onamadu Iesuꞌa haḡairoteꞌe hariḡa niduꞌa meꞌodo haro. Ebu Ioaneꞌa ane tahiꞌa ꞌaheu huze onaadu ziro.

¹⁹“Zuhiꞌa Boro Iesu vaḡe onamadu ꞌahige ḡadinoꞌi, 'Onaiꞌuma raꞌeteꞌe vazeḡa Kerisoꞌe ḡahe ga eme vaze ꞌahoga guhiniꞌuma?'”