Luke 7:6-19

⁶Setero Iesu ungode daedo mambusira. Edo Iesu mando aikambu bugiri gitijigari da otatao unemi itiri bugusera amimi Iesu tambusera. Tambudo gitijigari da binga Iesu da sorase sisira awa sisera, “Gitijigari naso mando da toradi eose ko na awa ewa aera.

⁷Edo daedo na ewa raro iso yei peni awasedo imo ainda atise tepo ge mi seio naso agipo embo ewamei are.

⁸Na gosena awa be adira ko na awa daedo isoro embo nenei da gitijigari da agodari da tuda ra edo daedo isoro embobo nenei awa naso agodari da tuda ra. Na isoro embo da da sadena mambu awa umo mambadira. Edo na isoro embo nei da sadena po awa umo puradira. Edo naso agipo embo da yei eiawa e sadena awa umo adira.”

⁹Edo Iesu binga awa ingido kove be edo wareregedo embo berari umo ambo ambo isera ainda yei sisira, “Dowo sano gave. Na Israel embomei da teda embo gebe ari embo eiedo awa da tambae be ra.”

¹⁰Setiri binga sisera embobo awa sekago engenembedo isoro embobo da gitijigari da mando da mambudo uso agipo embo awa ewamei edo atiri tambusera.

¹¹Iji tupo Iesu uso ambojimbi de embo jiwae be de nati Nain ainda mambusera.

¹²Edo ungo nati da totorero embo nati da edo bugusera embo mei singa betari awa ango edo betari kokombo da budo mambadi. Edo mei singa betari ainda ai awa kinapeina nenei bae edo uso iu awa daedo betari. Edo embo jiwae be jiwae awa evetu ainga da pepeta isera.

¹³Edo Iesu evetu awa gido jo be jo isira evetu ainda yei sisira, “Ji do.”

¹⁴Sedo Iesu aikambu mambudo apara awa jigiri embo apara ango isera awa pepetisera. Petetero Iesu mi sisira, “Mei singa iso yei sena eri.”

¹⁵Setiri mei singa betari awa erido ge sadi tuturo isira. Edo Iesu mi budo mambudo uso ai da ititisira.

¹⁶Edo embo berari oju edo Mamo jasiga ise sisera, “Binga sari embo nembodiba awa ingodenaso teda bugira. Mamo uso embo soregadi bugira.”

¹⁷Edo binga ravetiri embo Judea da edo busu demo da damo da awa ro Iesu mi ira awa ingisera.

¹⁸John uso ambojimbi mi Iesu ro ira awa setero gido gido John Iesu da yei binga ititisira.

¹⁹Edo John setiri ambojimbi etoto uso yei bugero ungoda yei sisira, “Mambudo Iesu da yei nganega ari eiawa sewo, ‘Imo mo embo John mi bugarase sevira awa ta mo ko nango embo nei diti eri?’”