Lukas 7:6-19

⁶Anam aeg amu Jesus ahe, oh gona, guguiṯegeg amu daup iḵi nug laiḵud laa Jesus ap̱eg dooḵunu amelagp̱a a, ag gona, nug aum oḏe Jesus amegp̱a ap̱ig. “Danab Naḏi na hamu uḏie nidṯe. Da am danab enate amu na uḏin da laul oop̱a neḵut?

⁷Am da ele da dooṯem, da danab ena iiṯa amunu da na gumiṯen goḵulnu amu da elele ii doomi amge na begbeg dahil eḏua ena daaḵunu naiib a! Na anam naiib ap̱e amu begbeg dahil nug eḏua ena daaḵu.

⁸Da amu dooṯemnu diig am, da ele uḏat imunu danab oḵai waalagp̱a daaiyi, ag da gumiḏegeg amu dahilad daup ag da waalp̱a daaṯeb. Amunu da laa amegp̱a, ‘Na uḵe!’ ai aria nug goṯe. Amu da laa amegp̱a, ‘Na do!’ ai aria nug doṯe. Dahil begbeg ele amegp̱a, ‘Na uḏat imu he,’ ai aria nug heṯe amunu na naiib ap̱e, keeke amuam beḵu dooṯem.” Danab amu ag oḵai ahilag oḏe amu aon, Jesus amegp̱a ap̱ig.

⁹Ag anam aeg, Jesus Nug doya, Nug dab mak kuḏum awawa, Nug eḏua, danab ah ameg naḏi ag Nug dim lamidp̱ig ele amu, Nug ag amelagp̱a inam aum. “Da ag amelagp̱a aṯem. Da Israel danab oolagp̱a oop̱a genab doyak imubia amu da laa ii anidmi,” awa aum.

¹⁰Aria danab daup iḵi nug he, ag Jesus top̱a gop̱ig ele amu, danab amu ag eḏun nug laugp̱a gona, begbeg nuhig amu eḏua ena dayeye anidp̱ig.

¹¹Amu nakok dimp̱a Jesus Nug ab oḵai laa onig Nen uḵe, nuhig ip̱uniṯak awak danab amu danab ah ameg naḏi ag Nug ele oh gop̱ig.

¹²Nug uḵa, ab amunu od oḵai amu guguiṯa noono, ag danab mauhak laa maon dop̱ig. Danab mauhom nug anig am ah qab, nug beḵa laip̱u amu aaḵuib. Amu danab ah ameg naḏi ab amup̱anu ag ah amu, nug ele uḏip̱ig.

¹³Jesus Nug ah amu anṯa, nuhignu oo doye, Nug ah amu amegp̱a aum. “Na aib gaame,” awa aum.

¹⁴Anam anana, Nug qaḏaqaḏ maop̱ig amu gukuiṯa wana, ep̱eg bahia, danab mauhak niiom ele qaḏaqaḏ amu aḏe, danab qaḏaqaḏ maop̱ig ele, ag hip̱aidna daap̱ig. Daaegeg Jesus Nug aum. “Nid bau, da aṯemde, na ahe!” awa aum.

¹⁵Anam a, danab mauhom amu eḏua aha dayaya, nai maṯie, Jesus Nug eḏua awa, anig meṯom.

¹⁶Danab ah oh ag amu anidna, Kayaknu ena doona, ag oolag oṯaie, ag Kayak binag mena ap̱ig. “Propet naḏi laa ig oonigp̱a uḏiom. Kayak Nug ig ehanigḵunu uḏiom,” aon ap̱ig.

¹⁷Amu danab ag Jesus keeke heum amunu ag maṯieg uḵe, Juda wan ohp̱a amu wan laala, Juda taliliṯak ele uḵe, ap̱an danab ag doop̱ig.

¹⁸Ag Jesus heumnu maṯiegeg amu Johanesnu ip̱uniṯak awak danab ag keeke amu ohnu nug amegp̱a aeg doyom.

¹⁹Doya amu Johanes nug nuhiḵud ip̱uniṯak awak danab aḏit onilahp̱a e, gumidya doeh, a goya Jesus inam oḏ meṯaglahnu aum. “Danab laa uḏiḵunu aeg doomut am na aaḵute o iiṯa ig laate ameg meḵunig?” Nug anam amelahp̱a anana, nug he gopiḏ.