Luka 6:6-19

⁶Ebu Bana Madaḡa ꞌahogano, Iesuꞌa nuꞌonuꞌo neḡa diuḡadu vazevaze ihoziro. Eꞌea edaꞌe nae ꞌevoꞌa rudanoga vazeḡa zuni radiunu.

⁷Mose goro ḡoeꞌa ihozeꞌeteꞌe azaḡa zu Farisea azaḡaꞌe Iesuꞌa Bana Madaḡano vaze eꞌe fainiꞌuma ga mene rae ehamu radiro. Mazaḡa aniꞌa vaze eꞌe fainine, zeḡe kotao ohonoga uratiro.

⁸Rehano Iesu aniꞌe zeꞌa nouge rae zamarinutaꞌaꞌe ederiro. Ebu ꞌevoꞌa rudanoga vazeḡa niro, raenaꞌa, “Iḡunadu vaze ḡuḡuvaḡa zama ꞌada eda aroꞌi!” Ebu ani eda onamiro.

⁹Ebu Iesuꞌa zinaꞌa, “E za ḡadizeꞌohe. Mose goro ḡoeꞌaꞌe Bana Madaḡa zamaḡano nagini haḡaine idaḡa raꞌohe? Manoḡa haḡaiꞌuma ga sauꞌa haḡaiꞌuma? Ḡaboziꞌuma ga zimiꞌuma?”

¹⁰Iesuꞌa zeḡe niduꞌa ḡiaze ḡemadu vaze eꞌe niro, raenaꞌa, “ꞌEvoꞌo einoꞌi!” Aniꞌa einirotene, ꞌevoꞌaniꞌa manoriro.

¹¹Rehano ze maḡune rudanadu zeḡe zeḡeꞌa Iesu mazao nagini haḡaiꞌuma rae ḡoaniro.

¹²Eꞌe madaḡano Iesu ani maḡa onamadu ohere faḡa Badiꞌa mazao kuraro.

¹³Ebu oherebau moneo ani tahiꞌatahiꞌa huze tibuziro. Ebu tahiꞌa 12 daꞌo zamazadu Apostolo azaḡa rae huziro.

¹⁴Nizeꞌe ꞌahiꞌeꞌe: Simona niḡa ꞌahoḡaꞌe Petero, Petero negoḡa niḡa Aniderea, Iakobo, Ioane, Filipo, Batolomeo,

¹⁵Mataio, Tomasi, Alefeo ubuḡa niḡa Iakobo, Roma gavamani utito ziniꞌeteꞌe duḡuruḡa vazeḡa niḡa Simona,

¹⁶Iakobo ubuḡa niḡa Iuda ebu Iesu revoharoteꞌe vazeḡa, Isakariota vazeḡa niḡa Iuda.

¹⁷Eꞌe enogano, Iesu ani tahiꞌatahiꞌa teite maḡanonoꞌo ovaradu haba sebaḡano edaro. Eꞌe habaꞌanoꞌe ane hegoteꞌeteꞌe azaḡa ḡuḡuvaḡa ebu haba nunu azaḡa ḡehaḡaniꞌa radiunu. Zeꞌe Iudea habaꞌa, Ierusalema neḡa boro zu davara genaḡa neḡa boro Taea ebu Sidonaonoꞌo Iesu hari abitoga zu ugize faizoḡa radu ariro.

¹⁸Ebu Iesuꞌa vine sauꞌaniꞌa diuḡadu sausauziroteꞌe azaḡa zuni faiziro.

¹⁹Zeḡe niduꞌa ani ahiri obonihi reiro, mazaḡa ugi faineꞌeteꞌe inaraḡaꞌe ani mazaonoꞌo buanadu zeḡe nidua manoriro.