Luka 6:6-19

⁶Na, sabate esau i awasae sunago alona eai i lauheata: tau esau nei eai ia nima tutuna i tubu eaeyaelua.

⁷Tauuriuri eo Parisea ia se itaitasipoi, asubena sabate tau wa abo i hemauri, e nige’e; ana mata se eooi bena ia abo se hegiru.

⁸Edi nuatu i itayao, tau wa nimana i eaeyaelua i ribalau ia arinai, i ene, “U toro, u toromasarahama duaduari eai.” I toro, abo i toromasaraha.

⁹Iesu i ribalau aridi eai, i ene, “Ginauri esega ea oimuri arimiu eai, laugagaeo edoha emi laelaena asubena sabate, laulau lolo ta ginauri, e laulau baaea? ta abihemauri, e ta unuhemate?”

¹⁰Gamagaridi i itaitahetahetaiiridi, abo i ribalau tau wa arinai, i ene, “Nimam u heleleama.” Nimana i helelelaei: nimana abo i mauriuio doha nimana esau.

¹¹Adi ou se monauboriboriri; isibom se ribariba, si ene, Iesu abo edoha edi abiabina.

¹²Nei asubenadi ne ia i dalasae oea tupina eai i lau uura, maiona esau maudoudoina eai i lau uura Eaubada arinai.

¹³Mara‐ie‐tom ena heaheatayao i eogaidima, aridi eai saudoudoi‐labui i riba‐hilehileidi; isi esadi hinage i toredi ede aposotolo;

¹⁴Simona. (esana esau ie tore ede Petero,) eo ena tau Anederea, Iamesi eo Ioane, Pilipo eo Batolomaio.

¹⁵Mataio eo Toma, Iamesi Alepaio natuna, eo Simona esana hinage Selote.

¹⁶eo Iudasi, Iamesi ena tau, eo Iudasi Isakariota, ia taumoruina ede.

¹⁷Maedi i leta i dobi, gonu eai i totoro, eo ena heaheatayao peledi hinage, eo moutuadi lailai Iudea eo Ierusalema eai se laoma, eo Turo eo Sidona geregeredi eai se laoma hinage, ena riba bena se ataiei, eo adi asiebo hinage bena i hemauridi;

¹⁸isi hinage earua biibiidi se hebaaeadi; abo se hemauridi.

¹⁹Moutuadi gamagaridi ia bena se abiitalaei; gigibori ia boeana eai i laoma, arinai gamagaridi i hemauridi.