Luku 6:6-19

⁶Hagi ru mani fruhu kna zupa (sabat) Jisasi'a osi mono nompi (sinagok) mrerino mono naneke rempi hu'nezamigeno, mago nera tamaga kaziga azamo'a sti'nea ne' mani'ne.

⁷Kasegere ugagota hu'naza vahe'ene, Farisi vahe'mo'zanena, zamua ante'soe hu'za kete'za mani'naze. Jisasima mni fru knarema ana nera azeri'soe hanige'za, hagi zamagra kegafa erifore hu'za Agrira azerinaku, kete'za mani'naze.

⁸Hianagi inakna antahintahima hu'nazana, Agra ko antahino keno nehuno, azama haviza hu'nea neku huno, ama maka vahe zamavure otinka eno! Higeno ana ne'mo otino e'ne.

⁹Jisasi'a zamagriku anage hu'ne, Nagra tmantahinegoe, mni fruhu kna (Sabat) zupa knare zama hanuna zamo kasegefina knarera hunefi, havi tavutavama hanuna zamo knarera hu'ne? Vahera zamaza hugahumpi, vahera zamazeri haviza hugahune?

¹⁰Arukrahe huno ome zamagege, eme zamagema huteno Jisasi'a azamo'ma stinea ne'ku anage huno asami'ne, Kzana arusuto! Higeno agra ana hu'ne. Anama higeno'a, azamo'a eteno so'e hu'ne.

¹¹Hianagi kasegere ugagota hu'naza vahe'ene, Farisi vahera zamarimpamo'a aka hege'za, Jisasina naza huntegahune hu'za zamagra zamagra kehugantu hugama hu'naze.

¹²Anaknafina Jisasi'a nunamu hunaku agonarega marerino, Anumzamofontega ana kenegera nunamu ome nehigeno ko atune.

¹³Ko'ma netigeno'a amagema nentaza disaipol naga'a kehige'za ageno, anampinti 12fu'a aposolo nagare huno huhamprino, zmagi'a zami'ne.

¹⁴Saimoninku Pita'e huno mago agi'a nenteno, nefunku Endru'e hu'ne. Hagi Jemisi'e, Joni'e, Filipi'e, Bataromio'e.

¹⁵Matiu'e Tomasi'e, Alfiasi nemofo Jemisi'e, Saimoni Zealeti nagapinti nere.

¹⁶Hanki Jemisi nemofo agi'a Judasi'e. Hagi mago ne'mofo agi'a Judas Isakarioti'e, ha' vahe'mokizami zmazampi Jisasina komoru huno avarentesia nere.

¹⁷Jisasi'a amage'ma nentaza disaipol naga'ane agonaregati erami'za agupofi eme otinege'za, anante amage'ma nentaza tusi'a disaipol veamo'za eritru nehazageno, maka Judia kazigatiki Jerusaletiki, Saitonitiki, Taia hageri ankena regati'enena,

¹⁸ana vea'mo'za Jisasi naneke nentahisageno krizimi zmazeri knamresiegu emeri atru nehazageno, agru osu havi avamumo'za zmazeri haviza hu'naza vahera zmazeri knamare'ne.

¹⁹Tusi veamo'za avako hunaku hu'naze. Na'ankure tusi'a hihamumo Agripinti ne-egeno, avakoma hia vahera maka krizmimo'a atrezmante'ne.