6Ga wiripu艐uyunydja Gana艐'maranharamirriyu Waluyu, Djesu marrtjina balayi buku-艐al'yunaramirrilili bu峁塨ulili, bala 艐unhiliyinydja 艐ayi yukurrana yol艐u'-yul艐unha mar艐giku艐alana. Ga 艐unhiliyi bu峁塨u艐uranydja yol艐u yukurrana nhinana 岣廰rramu go艐-dho峁.
7Ga walalanydja marrtjina wiripu-gu岣籯uny'tja gonha 岣徝thurruna warray 艐unhiliyi bu峁塨u艐ura, Rom-dharraymirri walala ga Rom-mar艐gikunharamirri walala yol艐u'-yul艐u, bala nh盲艐alanydja walala yukurrana 艐anya Djesunha, wanhaka 艐ayi yurru dj盲ma 岣弖kmarama 艐unhiyi go艐-dho峁痭ha 岣廰rramunha 艐uri艐iyi Nhinanharamirriyu Waluyu, m盲rr walala yurru 艐anya dhuwurr-nyamir'yun, ga rom-bakmaranhamirrina 岣籥karama.
8Yurru 艐ayi Djesunydja mar艐githina walala艐gu, nhaltjarra walala yukurrana 艐unhiyi guya艐ina, bala 艐ayi w盲thurruna 艐uriki go艐-dho峁痥unydja 岣廰rramuwu bitjarrana. 鈥淕o, ga艐gathiyana lili marrtjiya 艐arrakala dhipala,鈥 bitjanna. Bala 艐ayi ga艐gathirrinydja 艐unhi, bala marrtjina nhina bala Djesuwalana.
9Bala 艐ayi Djesunydja bilyun ga wa艐a dh盲-wirrka'yunna walalanha bitjanna, 鈥淣h盲 dhika 艐ilimurru艐gu romdja dhiyakuyinydja 艐unhi waluwu? Nhaltjan 艐ilimurru yurru dhiya艐uyinydja Gana艐'maranharamirriyunydja Waluyu? Gu艐ga'yun muka yol艐u'-yul艐unha?... bay' nhaltjan?... 艐aya艐u-y盲tjkuma walalanha? Yo, nhaltjan yurru 艐ilimurru dhiya艐uyinydja waluyu? Wal艐akuma yol艐unha?... bay nhaltjan?鈥 bitjarra.
10Bala 艐ayi Djesuyunydja nh盲艐alana marrtjina walalanha, bala wa艐ana 艐unhi go艐-dho峁痭hana 岣廰rramunha, 鈥淢a', go艐dja djarryurrana,鈥 bitjarrana. Bala dhunupana yana 艐ayi go艐-dho峁痶ja 艐unhi djarryurrunana ba岣廰rra艐'thinana, 岣籥tju'thinana dhikana wal'艐u.
11Bala walala 艐unhi mayali'-wilkthunaramirrinydja walala yol艐u'-yul艐u mirithinana dhikana 艐oy-dharrana, bala walala yukurrana wa艐anhaminana nhan艐u Djesuwu bunharawuna, 艐ayan'tharrana murrkay'kunharawuna.
12Ga dh盲艐uru 艐uli艐urunydja 艐ayi Djesu marrtjina bala bukulilina wal'艐u bukumirriyanharawuna, bala 艐ayi 艐unhiliyinydja munha-艐uparana yukurrana bukumirriya艐alanydja Godnha.
13Ga 艐unhi 艐ayi marrtjina walunydja walmana lili, bala 艐ayi 岣籾艐'mara艐alana 艐unhi nhan艐uwaynydja malthunaramirrinha walalanha marrtjina, bala 艐ayi 艐uli艐uruyinydja mi峁痶ji艐uru djarr'yurrunana marrtjina 12-nhana, bala 艐ayi 艐unhi wa艐ananydja walala艐gala bitjarrana, 鈥淣humanydja dhuwalanydja walala yurru bo'puy艐una walala 艐arraku,鈥 bitjarra.
14Ga dhuwalana walala 艐unhiyi yul艐unydja, bo'puy艐u 12-tja y盲ku gam': Dj盲yman, 艐unhi 艐ayi Djesuyu 艐anya y盲ku-岣籥kara艐ala Beta, ga Wanduru 艐unhi 艐ayi gutha'mirri艐u Betawu, ga Djayim, ga Djon, ga Bilip, ga B盲talamu,
15ga Mathuyu ga Dumitj ga Djayim g盲thu'mirri艐u 艐unhi Yalpiyawu, ga wiripu Dj盲yman 艐unhi walala 艐uli 艐anya 岣籥karanha rom-d盲l 岣廰rramu,
16ga Djudatj 艐unhi 艐ayi g盲thu'mirri艐unydja Djayimgu, ga Djudatj-Gariyat, 艐unhiyinayi 艐unhi 艐ayi Djesunha weka艐ala miri艐uwala walala艐gala go艐lili. Ga dhuwalayina walalanha 艐ayi Djesuyu djarr'yurrunanydja nhan艐uwaynydja 艐ayi 岣籾ndu'mirrinunha walalanha.
17Yo, dh盲艐uru 艐uli艐urunydja Djesu ga nhan艐u 岣籾ndu'mirri艐u walala marrtjina w盲艐ga艐ala yarru'-yarrupthurruna, bala 艐ayinydja yukurrana dh盲rrananydja 艐oy艐urana ba峁塧rra'艐urana w盲艐a艐ura, ga gu岣籯u'na mirithirrina mi峁痶jinydja yol艐unydja walala marrtjina 岣籾艐'thurruna, dh盲rrananydja 艐anya 岣籭w'mara艐alanydja. Marrtjinanydja walala 艐unhi birrka'mirri艐uru w盲艐a艐urunydja mala艐u艐uru, makarr艐uru 艐ula艐uru Djudiya艐uru, ga Djurutjalam艐uru w盲艐a艐uru, ga mo峁塽k艐uru gali'艐uru w盲艐a艐uru D盲ya艐uru ga Dj盲ytjan艐uru,
18walala bukmaknha marrtjinanydja 艐unhiwalayi Djesuwalanydja 艐盲nharawunydja nhan艐u, ga wiripunydja walala 岣弖k峁痷kthinayi 艐unhi 艐ayi yurru walalanha 岣弖kmarama rerri艐uru mala艐u艐uru. Ga wiripunydja 艐unhi yol艐u walala mokuywala艐umirri birrimbirrmirri walala marrtjina, bala 艐ayi Djesuyunydja walalanha 岣弖kmara艐alana yukurrana.
19Bukmaknha yol艐unydja walala yukurrana go艐-djarryurruna mulkanharawunydja nhan艐u Djesuwu, li艐gu 艐uli艐uruyi nhanukalaynydja ganydjarr yukurrana dhawa峁痶hurruna biyapul'nha wal'艐u, bala walala yukurrana bukmaknha yana 岣弖kthurrunanydja dhunupana yana.
Luk 6
Luk 6:6-19