Lucas 6:6-19

⁶Nayan, pegdateng te doma aldaw te peg-etod, dimoton si Jesus te simbahan te Judiyo, aw migtoladà. Doen otaw kidoen nekepis se belad din kowanan.

⁷Doen heman kidoen menge Parisiyo aw menenoladà te punù ingkeliwat i Moises. Nengemahà dan te idimanda dan tepad ki Jesus, aw yan se doun te gayed dan timengteng diyà kandin aw megpegolì sikandin te otaw doen mesakit te aldaw te peg-etod.

⁸Meneng netegahan i Jesus se aneng-aneng dan, aw minikagi diyà te otaw nekepis se belad, “Tindeg ka, aw diyà ka kanak.” Penga niyan, timolò se otaw ki Jesus aw dimoton kandin.

⁹Minikagi si Jesus diyà te otaw timengteng kandin, “Doen insà ko kenyo tepad te punù ingkeliwat i Moises. Eden lay se mepakay inangen tadon te aldaw te peg-etod? Meg-inang kidon lay te mèpiya, aw meg-inang kidon te medaet? Megtabang kidon lay te doma otaw, aw mengimatay kidon te doma?”

¹⁰Penga niyan, timengteng si Jesus diyà te kedita dan, aw minikagi diyà te otaw nekepis se belad, “Oladi se belad nikaw.” Pegtolò din, migkèpiya iyan.

¹¹Meneng ontò neopal se menge Parisiyo aw menenoladà te punù. Yan migpebelaw-belaway dan aw menonen dan si Jesus.

¹²Nayan, wedà kenamay, timikedeg si Jesus doton te bontod amon megtawal-tawal. Timayod sikandin te delem aw migtawal-tawal diyà te Timanem.

¹³Pegkeiselem, tinawal din se kedita te otaw tinoledaan din. Penga niyan, pinemallì din se sempolò teg dowa otaw megtelaban kandin, aw iningedanan din dan menge apostol.

¹⁴Sikandan si Simon iningedanan i Jesus ki Pedro, aw kedowa din si Andres, aw si Santiago, si Juan, si Felipe, si Bartolome,

¹⁵si Mateo, si Tomas, aw si Santiago batà i Alfeo, aw si Simon meyseg,

¹⁶aw si Judas batà te kesangay i Santiago, aw kesangay din si Judas Iscariote, sìyan migtolok ki Jesus.

¹⁷Nayan, timopang si Jesus tinekingan te menge tinoledaan pinemallì din, aw timindeg dan kidoen te tanà mepantal. Ontò medita se otaw gayed egtaking kandan, aw minakop diyà kandan se ontò medita otaw lekat te kedita te lonsod sakop te probinsya te Judiya, aw lekat te Jerusalem, aw pengkey lekat te Tiro aw Sidon medapag te dagat. Netipon se kedita dan amon menenalan ki Jesus, aw amon kegolian se mesakit dan.

¹⁸Dimoton heman kandin se otaw dinetengan te bosaw aw migkèpiya dan.

¹⁹Migtelaman se kedita te otaw memaed kandin, so doen tolos din aw yan se doun te nekebatog sikandin migpegolì te kedita dan.