Luka 6:27-44

²⁷Eḡe ḡoere egoniꞌeteꞌe azaḡaꞌe ziꞌohe. Agireze azaḡa zamaroꞌi zu heꞌeheꞌeꞌeteꞋe azaḡa mazao manoḡa haḡaoꞌi!

²⁸Za rae sausauzeꞌeteꞌe azaḡaꞌe Badiꞌa manohuga hidoga veize uminoꞌi zu zae mazao haḡai sauꞌa haḡaeꞌeteꞌe azaḡa veize kuranoꞌi!

²⁹Vazeꞌa ḡanigo faꞌonoꞌidene, naeḡa zu notonohanoꞌi! Vazeꞌa dabuaḡo meiꞌadu hena bare ꞌahoga zuni meihi roꞌidene, aꞌa zu hanoꞌi!

³⁰Iniuꞌa nagini umiꞌoꞌidene hau tauḡoꞌi, ebu iniuꞌa ḡauḡo mae buroꞌidene, ago bare moꞌi!

³¹Vazeꞌa zae mazao haḡai manoḡa haḡaeꞌeteꞌe uratoꞌidene, zae zuni zeḡe mazao haḡai manoḡa haḡaoꞌi!

³²Zaꞌa zae vetuḡaziꞌeteꞌe azaḡa daꞌo vetuḡazine, Badiꞌaꞌa mene niguziꞌuma. Sauꞌa azaḡa zuni zeḡe vetuḡaziꞌeteꞌe azaḡa vetuḡaziꞌohe.

³³Ebu zaꞌe zae mazao manoḡa haḡaeꞌeteꞌe azaḡa mazao daꞌo manoḡa haḡaine, Badiꞌaꞌa mene niguziꞌuma. Sauꞌa azaḡa zuni ꞌouge haḡaeꞌohe.

³⁴Ebu zaꞌe ḡauze bare ziniꞌuma raꞌeteꞌe azaḡa daꞌo zinihi reine, Badiꞌaꞌa mene niguziꞌuma. Sauꞌa azaḡa zuni ḡauze bare meiniꞌuma rae zamareꞌenaꞌa, sauꞌa azaḡa ḡauze ziniꞌohe.

³⁵Rehano agireze azaḡa vetuḡazoꞌi, zu zeḡe mazao manoḡa haḡaoꞌi! Ebu bare naenaeniꞌuma rae mene zamareꞌenaꞌa zenoꞌi! ꞌOugine, Badiꞌaꞌa naeḡa boro ziniꞌuma, ebu zaꞌe Ḡihiꞌa Hune Badiꞌa ubuga reꞌuma. Mazaḡa Badiꞌa mene matuꞌo hauꞌeteꞌe azaḡa ebu sauꞌa haḡaeꞌeteꞌe azaḡa zuni Badiꞌaꞌa vetuḡaziꞌohe.

³⁶Zae Mama Badiꞌaꞌa vaze vetuḡaziꞌeteꞌe teige, zae zuni vaze vetuḡazoꞌi!

³⁷Vaze mazao sauꞌa azaḡa rae ago zoꞌi! ꞌOugine Badiꞌaꞌa zae zuni sauꞌa azaḡa rae mene ziꞌuma. Vazeꞌa sauꞌa haḡaoꞌidene, riḡa ago ḡorezoꞌi! ꞌOugine Badiꞌaꞌa zuni zae sauꞌa riḡa mene ḡoreziꞌuma. Zeḡe sauꞌa rae modoꞌi! ꞌOugine Badiꞌaꞌa zuni zae sauꞌa rae modiꞌuma.

³⁸Ḡauze zenoꞌi! ꞌOugine Badiꞌaꞌa manohuga ziniꞌuma. Badiꞌaꞌa zaꞌe iriꞌavone fosafosanoga, taugoga, zuꞌizuꞌinoga ebu foraꞌaḡa beuꞌe ruruno ziniꞌuma. Zaꞌa vaze mazao nagini haḡaine, Badiꞌaꞌa zae mazao ꞌouge haḡaiꞌuma.”

³⁹Iesuꞌa hari ꞌahoga idaniro, raenaꞌa, “Kuruḡa vazeḡaniꞌa kuruḡa vazeḡa ibitohaune, anianine hoꞌona ꞌuite ovoiꞌuma.

⁴⁰Tahiꞌaꞌe ani ihore vazeḡa mene vitiniꞌuma. Rehano iniu faifaine ihonine, ani zuni ihore vazeḡa teigiꞌuma.

⁴¹Ḡaꞌe nabugo ubumao beꞌa dinunuḡa ḡianeꞌohe. Rehano nougadu ḡae ubumao beꞌa gado ireḡa mene ḡianeꞌohe?

⁴²Ḡaeꞌa ubumaḡo beꞌa gado ireḡa izema ḡianogano, negoḡo mazao ꞌahige raꞌohe. 'Negohe, ubumaḡo beꞌa dinunu eꞌe mae vaḡinihi!' Ḡa, zama guhi vazeḡa! Ibite geno ḡae mazao gado ireḡa eꞌe mae vaḡinoꞌi! Ebu ḡaꞌa faine ehamanadu negoḡo mazao ubuma dinunuḡa mae vaḡiniꞌuma.

⁴³Eꞌe teige, ire manoḡaꞌe maḡa sauꞌa mene iniꞌohe, u ire sauꞌaꞌe maḡa manoḡa mene iniꞌohe.

⁴⁴Ireꞌe maḡa horonadu nagi ireḡa edereꞌohe. Figi maḡaꞌe ire renoga zamaḡano mene iniꞌohe zu vaini maḡaꞌe ḡunu renoga zamaḡano mene iniꞌohe.