ᤗᤢᤁᤠ 6:27-44

²⁷“ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴ ᤁᤧᤄᤧᤶᤒᤠᤛᤣ. ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

²⁸ᤂᤡᤏᤡ᤹ ᤛᤠᤱᤃᤪᤠ ᤁᤧᤔᤧᤵᤐᤠᤜᤠ᤹ ᤔᤢ᤹ᤀᤡᤛᤠᤶ ᤌᤠᤛᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤋᤢᤘᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥

²⁹ᤜᤠ᤺ᤳᤗᤧ ᤁᤧᤏᤧᤍᤧᤱᤒᤠᤴ ᤁᤧᤗᤧᤱ ᤁᤧᤒᤡ᤹. ᤂᤧᤏᤧ᤹ ᤘᤣ᤹ ᤗᤧᤵᤔᤠᤱᤒᤠ ᤁᤧᤏᤧᤍᤧᤱᤒᤠᤴᤏᤠᤱ ᤂᤧᤴ ᤋᤥ᤺ᤴᤍᤧ ᤐᤡᤖᤧ᤹॥ ᤜᤠ᤺ᤳᤗᤧ ᤛᤠᤰᤁᤧᤸᤗᤧᤰ ᤁᤧᤛᤢᤱᤄᤣ᤺ᤰᤘᤠ᤺ᤴ ᤁᤧᤏᤠᤵᤐᤠᤱ ᤋᤣ᤹ᤖᤢ᤹. ᤂᤧᤴᤏᤡᤴ ᤁᤧᤈᤠᤱᤔᤠ ᤋᤣ᤺ᤳᤋᤡᤴᤏᤠᤱ ᤐᤡᤖᤧᤍᤣ᤺ᤛᤧ᤹ᤀᤥ॥

³⁰ᤜᤧᤰᤁᤩᤠᤱ ᤁᤧᤏᤠ᤺ᤰᤐᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤁᤧᤈᤡᤃ᤺ᤰᤘᤠᤜᤠ᤹ ᤁᤧᤍᤣ᤹ᤒᤠᤜᤠ᤹ ᤕᤠᤶᤔᤥ ᤕᤠᤱᤏᤠ ᤔᤧᤏᤠ᤺ᤰᤋᤧᤛᤧᤴᤏᤧ᤹ᤀᤥ॥

³¹ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤀᤠᤰᤂᤣ ᤁᤧᤶᤔᤧᤳᤋᤡᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ. ᤂᤡᤏᤡ᤹ᤀᤠᤱ ᤒᤠ ᤜᤧᤰᤁᤣ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

³²ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ᤖᤰ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥅ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤈᤥᤃᤢ᤹ᤖᤥ॥

³³ᤜᤧᤰᤁᤩᤠᤱ ᤂᤡᤏᤡ᤹ ᤏᤢ᤺ᤖᤡᤰ ᤁᤧᤔᤧᤵᤐᤠᤜᤠ᤹ᤖᤰ ᤏᤢ᤺ᤖᤡᤰ ᤁᤧᤔᤧᤳᤋᤢᤶᤛᤡᤶᤏᤧ ᤑᤠ᤹ᤃᤪ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥄ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤔᤧᤳᤋᤢᤛᤡ᤹ᤖᤥ॥

³⁴ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤔᤥ ᤔᤧᤏᤢ᤺ᤰᤋᤢᤖ ᤑᤠ᤹ᤀᤠᤱ ᤔᤏᤠᤜᤠ᤹ ᤌᤧ᤹ᤗᤠ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥄ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤈᤥᤃᤢ᤹ᤖᤥ॥

³⁵ᤁᤖ ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹. ᤂᤧᤱᤜᤠ᤹ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤔᤧᤏᤢ᤺ᤰᤋᤢᤖ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤌᤧ᤹ᤗᤠ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤢᤶᤄᤥ᤺ᤴ ᤕᤖᤡᤰ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ ᤏᤢ ᤑᤥᤋᤩᤠᤒᤠ ᤔᤏᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥

³⁶ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤆᤥ᤺ᤰ. ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥”

³⁷“ᤔᤏᤠᤜᤠ᤹ ᤐᤠ᤺ᤴ ᤔᤧᤎᤡᤰᤋᤧᤶᤛᤡᤶᤔᤧᤴᤏᤧ᤹. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠ᤺ᤴ ᤁᤧᤴᤎᤡᤰᤋᤡᤴᤗᤥ॥ ᤔᤏᤠᤜᤠ᤹ ᤆᤧ᤹ᤕᤠ ᤀᤡᤱᤍᤥ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤆᤧ᤹ᤕᤠ ᤀᤡᤱᤍᤥ ᤁᤧᤔᤧᤶᤔᤧᤳᤋᤡᤴᤗᤖᤥ॥ ᤔᤏᤠᤜᤠ᤹ ᤗᤧᤵᤔᤡ ᤐᤡᤖᤧᤶᤛᤡᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥

³⁸ᤔᤏᤠᤜᤠ᤹ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤁᤧᤶᤒᤡᤖᤡ᤹ᤖᤥ॥ ᤏᤢ᤺ᤖᤡᤰ ᤛᤡ᤺ᤰᤋᤧᤶᤔᤧ᤹ ᤏᤢ᤺ᤖᤡᤰ ᤌᤧᤰᤋᤧᤶᤔᤧ᤹ᤖ ᤏᤢ᤺ᤖᤡᤰ ᤔᤢᤴᤍᤧᤶᤔᤧ᤹ᤖ ᤁᤢᤎᤡᤶ ᤐᤥ᤺ᤱᤅᤠᤱ ᤁᤢᤘᤧᤳᤘᤧᤳ ᤔᤏᤠᤜᤠ᤹ ᤛᤡ᤺ᤰᤋᤧᤶ ᤐᤡᤖᤧᤶᤛᤡᤶᤔᤧ᤹. ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤁᤧᤶᤒᤡᤖᤡ᤹ᤖᤥ॥ ᤂᤡᤏᤡ᤹ ᤀᤠᤰᤂᤣᤗ᤹ᤖᤡᤰ ᤁᤧᤛᤡ᤺ᤰᤋᤢᤶ ᤁᤧᤒᤡᤖᤢᤶᤛᤡᤶ. ᤒᤠ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤁᤧᤶᤛᤡ᤺ᤰᤋᤡ ᤁᤧᤶᤒᤡᤖᤡ᤹ᤖᤥ॥”

³⁹ᤜᤧᤰᤁᤩᤠᤱ ᤕᤧᤛᤢᤖᤧ ᤁᤴ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤡᤰᤑ᤺ᤶᤒᤠᤸᤗᤧ ᤘᤣ᤹ ᤔᤡᤰᤑ᤺ᤶᤒᤧᤴ ᤗᤠᤶᤗᤥᤔᤠ ᤔᤧᤛᤢᤰᤋᤢᤴᤗᤥ. ᤗᤠᤶᤗᤥᤛᤢᤏᤧ ᤑᤠ᤹ᤃᤪ ᤏᤧᤵᤔᤠᤱ ᤗᤢᤶᤒᤠ᤺ᤳᤋᤥ ᤁᤧᤱᤛᤡ ᤗᤠ᤺ᤳᤇᤡ᤹ᤖᤥ॥

⁴⁰ᤜᤢ᤹ᤛᤠᤶᤒᤧᤴ ᤁᤢᤛᤡᤰᤛᤠᤶᤒᤧᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥ ᤁᤖ ᤂᤢᤏᤧ᤹ ᤏᤢ᤺ᤖᤡᤰ ᤜᤢ᤹ᤛᤡᤱ ᤛᤢ᤺ᤳᤇᤡᤱᤅᤠᤱ ᤂᤢᤏᤧ᤹ ᤁᤢᤛᤡᤰᤛᤠᤶᤒᤧᤴ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥

⁴¹ᤀᤠᤒᤠᤅᤣ ᤌᤰᤁᤥ ᤛᤠ᤺ᤱᤘᤧᤳ ᤆᤠᤖᤠᤶᤒᤠ ᤔᤧᤴᤏᤡ᤺ᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤖᤧ ᤁᤢᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤁᤧᤏᤡ᤺ᤛᤢᤒᤣ᥅

⁴²ᤂᤧᤏᤧ᤹ ᤀᤠᤒᤠᤅᤣ ᤁᤧᤎᤰᤁᤥ ᤛᤠ᤺ᤱᤘᤧᤳ ᤆᤠᤖᤠᤶᤒᤠ ᤁᤧᤴᤏᤡ᤺ᤛᤢᤴᤏᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤀᤡᤴ ᤁᤧᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤂᤧᤰᤂᤢᤱ ᤐᤡᤏᤧ ᤗ᤹ᤖᤡᤰ ᤔᤧᤵᤔᤠ ᤁᤧᤛᤢᤰᤋᤢᤒᤣ᥅ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤀᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤠᤒᤠᤅᤣ ᤁᤧᤎᤰᤁᤥᤒᤠ ᤛᤠ᤺ᤱᤘᤧᤳᤋᤡᤴ ᤏᤠ᤺ᤳᤋᤧᤍᤣ᤺ᤛᤧ᤹ᤀᤥ. ᤜᤧᤰᤁᤩᤠᤱᤗᤰ ᤁᤧᤴᤛᤠ᤹ᤖᤧ ᤁᤢᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤀᤢᤛᤢᤖᤢ ᤁᤧᤏᤡ᤺ᤛᤢᤀᤠᤱ ᤂᤧᤱᤔᤠ ᤁᤧᤛᤢᤰᤋᤢ᤹ᤖᤥ॥”

⁴³ᤀᤠᤳᤋᤡᤴ ᤏᤢ᤺ᤒᤠ ᤛᤡᤱᤒᤢᤱᤅᤥᤀᤠᤱ ᤋᤠᤵᤑᤧ᤺ᤶᤒᤠ ᤛᤡᤱᤛᤣ᤹ ᤔᤧᤎᤥ᤺ᤰᤏᤧᤴᤗᤥ. ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥᤀᤠᤱ ᤏᤢ᤺ᤒᤠ ᤛᤡᤱᤛᤣ᤹ ᤔᤧᤎᤥ᤺ᤰᤏᤧᤴᤗᤥ॥

⁴⁴ᤂᤧᤴ ᤛᤡᤱᤒᤢᤱᤜᤠ᤹ᤃ ᤛᤡᤱᤛᤣᤜᤠ᤹ ᤀᤥᤔᤧᤵᤔᤠᤀᤠᤱᤛᤠᤱ ᤁᤢᤛᤡᤱ ᤏᤡ᤺ᤳᤔᤧᤍᤧᤳᤗᤥ॥ ᤀᤠᤵᤑᤠᤸᤗᤧᤀᤠᤱ ᤋᤡᤱᤃᤪᤣ᤺ᤰ ᤐᤥ᤺ᤰᤗᤠᤀᤥᤗᤠᤶ ᤔᤏᤠᤜᤠ᤹ᤖᤧ ᤐ᤺ᤳᤇᤣ᤹ᤀᤡᤴ ᤔᤧᤴᤍᤢᤒᤢᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤋᤡᤱᤘᤠᤛᤣᤰ ᤐᤥ᤺ᤰᤗᤠᤀᤥᤗᤠᤶ ᤆᤧᤸᤗᤧᤰᤛᤣ᤹ᤀᤡᤴ ᤔᤧᤴᤇᤢᤵᤛᤢᤴᤗᤥ॥