Lucas 6:27-44

²⁷“Meneng seini se kagi ko diyà te kedita niyo nenenalan kanak. Kedekeli niyo te pedowan se poon niyo. Inangi niyo se mèpiya diyà te otaw egkebensi kenyo.

²⁸Pemoyò kaw diyà te Timanem te keidowan din se otaw egpenollon kenyo. Pegtawal-tawal kaw heman diyà kandin tepad te otaw egtompuyus kenyo.

²⁹Aw sempaken kaw diyà te pisngi, pesempaki niyo heman se dibaloy. Aw legesen kaw memegay te ekasan niyo, begayi niyo heman se saol niyo.

³⁰Pemegay kaw diyà te otaw memoyò kenyo. Aw doen mengabat te kedònan niyo, ikà niyo egpeolì.

³¹Aw meibeg kaw te mèpiya se inangen te doma otaw diyà kenyo, keilangan mèpiya heman se inangen niyo diyà te doma otaw.

³²“Aw olò otaw doen dakel pedowan diyà kenyo se kedekelan niyo te pedowan, eked kaw duyuni te Timanem, so pengkey otaw kenà egpenimanem, dakel se pedowan dan diyà te otaw doen dakel pedowan diyà kandan.

³³Aw olò otaw eg-inang te mèpiya diyà kenyo se inangan niyo te mèpiya, eked kaw heman duyuni te Timanem, so iling heman kenyan se eg-inangen te otaw kenà egpenimanem.

³⁴Aw olò otaw mekeimpas te salà se pebelesan niyo, eked kaw duyuni te Timanem, so pengkey otaw kenà egpenimanem, egpebelesay dan aw egpeimpasay dan.

³⁵Meneng sikiyo, seini se keilangan inangen niyo. Kedekeli niyo te pedowan se poon niyo. Inangi niyo dan te mèpiya. Pebelesi niyo dan pengkey eked dan iyan keolì. Aw yan se inangen niyo, dakel se ontong ibegay diyà kenyo, aw ipetaga-taga niyo te batà kaw te Timanem, so gayed sikandin egkeido te kedita te otaw pengkey medaet dan aw kenà egpesiontong.

³⁶Keilangan egkeido kaw te doma iling te keido te Amay niyo Timanem.”

³⁷“Ikà niyo eg-okom te doma otaw amon eked kaw okomi. Ikà niyo egpemegay te pelumun diyà te doma otaw amon eked kaw begayi te pelumun. Pegwedadi niyo se salà te doma otaw amon pegwedaden se kenyo salà.

³⁸Bowangi niyo se doma, aw bowangan kaw heman te Timanem. Ontò dakel se ibowang din kenyo, so deseken din, aw keyongen din, aw olowan din se ibegay din kenyo amon ontò dakel se kinewaen niyo. Aw bowasag kaw diyà te doma otaw, bowasag heman se Timanem diyà kenyo.”

³⁹Migtegdeyanan si Jesus, kagi din, “Wedad otaw bota mekeagak te doma din bota, so medagdag se didowa dan doton te awang te tanà.

⁴⁰Wedad heman meiskwilahay labi pa biyasa diyà te meistro din. Meneng penga te peg-iling din te kedita, onawa se kebiyasa din aw kebiyasa te meistro din.

⁴¹“Mola niyo egkitaen se sagbet kidoen te mata te doma niyo, meneng wedà niyo ketegahi te doen batang kidoen te kenyo mata.

⁴²Aw eked niyo kitai se batang kidoen te kenyo mata, eked kaw peketabang te doma niyo amon meabat se sagbet lekat te kandin mata. Kolang se aneng-aneng niyo te wedad salà niyo. Ebati niyo onà se batang lekat te kenyo mata, aw penga niyan metaen se pegkità niyo amon mengabat kaw heman te sagbet lekat te mata te doma niyo.”

⁴³“Aw mèpiya se kayo, eked iyan pongo te medaet. Aw medaet se kayo, eked heman pongo te mèpiya.

⁴⁴Aw kitaen tadon se pongo te kayo, ketegahan tadon aw eden kemoloi te kayo iyan. Wedad pongo igira geniyen lekat te ligem. Wedad heman paras ipoen lekat te telayid.