LUKU 6:27-44

²⁷Mɛ́ɛ oo amↄa kɛ̀ ée ma yã maanↄnɛ, àgↄ̃ ye a ibɛɛnↄzi à à maaa kɛ gbɛ̃ kɛ̀ aↄ̃ zàaguunↄnɛ.

²⁸À sa maaa o gbɛ̃ kɛ̀ aↄ̃è sa zaaa oareenↄnɛ. À adua kɛ gbɛ̃ kɛ̀ aↄ̃è ĩa daawaanↄnɛ.

²⁹Tó gbɛ̃ n swãn kɛ̀ n gasu dooa, ǹ à doo dↄnɛ dↄ. Tó gbɛ̃ n utadaa sìmma, ǹton gínɛ kↄ̃n n dansikioro.

³⁰Tó gbɛ̃ pↄ́ wɛ́ɛ kɛ̀mma, ǹ kpáa. Tó gbɛ̃ n pↄ́ sìmma, ǹton gbekaaro.

³¹À kɛ gbɛ̃nↄnɛ lán á yezi aↄ̃ kɛare nà.

³²Tó gbɛ̃ kɛ̀ aↄ̃ↄ yeaziinↄn á yeńzi, bↄ́ sáabun á vĩi? Baa durunkɛrinↄ ègↄ̃ ye gbɛ̃ kɛ̀ aↄ̃ↄ yeńzinↄzi se.

³³Tó gbɛ̃ kɛ̀ aↄ̃è à maaa kɛareenↄn eè à maaa kɛńnɛ, bↄ́ sáabun á vĩi? Baa durunkɛrinↄ è kɛ lɛ se.

³⁴Tó gbɛ̃ kɛ̀ a wɛ́ɛ dↄzi à pↄ́ eḿmanↄn eè pↄ́ sɛ̃kãńnɛ, bↄ́ sáabun á vĩi? Zaakɛ durunkɛrinↄ è pↄ́ sɛ̃kãkↄ̃nɛ, lɛ aↄ̃ e wà à gɛ̃ɛ sí yãnzimɛ.

³⁵Àgↄ̃ ye a ibɛɛnↄzi à à maaa kɛńnɛ. À pↄ́ sɛ̃kãńnɛ wɛ́ɛdↄzisai, é láada bíta e, égↄ̃ dɛ Luda Musude nɛ́nↄ ũ, zaakɛ è à maaa kɛ guturunↄnɛ kↄ̃n gbɛ̃ zaaanↄ.

³⁶Àgↄ̃ wɛ̃nda vĩ lán a De wɛ̃nda vĩ nà.

³⁷Àton gbɛ̃ taari ero, Luda é a taari e sero. Àton yã vɛ̃ɛ gbɛ̃aro, Luda é yã vɛ̃ɛawaro. À sùu kɛ kↄ̃n gbɛ̃nↄ, Luda é sùu kɛao.

³⁸À gbɛ̃ gba pↄ́, Luda é a gba se. Eé zaka maaa kɛ̀ à gbɛ̃̀gbɛ̃ à wɛ̃̀ à pà yɛ́lɛlɛ káare a utalɛn. Zaakɛ zaka kɛ̀ eè yↄ̃ońnɛn Luda é yↄ̃onnɛ se.

³⁹Ben à yã lɛ̀kↄ̃zińnɛ à bè: Vĩ̀a é fↄ̃ à gò kũ vĩ̀anɛↄ́? Aↄ̃ plaa ń píngi é si wɛ̀ɛnloo?

⁴⁰Ìba ègↄ̃ dɛ a dànnɛrilaro, mↄde gbɛ̃ kɛ̀ yã dàda à bↄ̀ɛzi dɛ lán a dànnɛri bàmɛ.

⁴¹Bↄ́yãnzi nɛ́ɛ sɛ̃̀buru kɛ̀ da n gbɛ̃daaa wɛ́ɛn eezi, bensↄ̃ nɛ́ɛ lí kɛ̀ da n wɛ́ɛn yã daaroo?

⁴²Mmↄn kɛ̀ nɛ́ɛ líkusu kɛ̀ da n wɛ́ɛn eero, nɛ́ kɛ dia ǹ be n gbɛ̃daaanɛ, à tó ǹ sɛ̃̀buru kɛ̀ da à wɛ́ɛn bↄnɛ? Mↄnafikide! Ǹ líkusu kɛ̀ da n wɛ́ɛn bↄ gĩa, nɛ́ gbasa ǹ guu e wásawasa, lɛ ǹ e ǹ sɛ̃̀buru kɛ̀ kú n gbɛ̃daa wɛ́ɛn bↄnɛ.

⁴³Lí maaa è nɛ́ zaaa iro, lí zaaa è nɛ́ maaa iro.

⁴⁴Wè lí píngi dↄ̃ a nɛ́amɛ. Wè kãkãa bo lɛ̀ líaro, wè geepi e gyantoaro.