Luka 6:27-44

²⁷“A vaćerava tumenđe so šunena: 'Mangen tumare dušmanjen! Ćeren šukaripe okolenđe so mrzinena tumen!

²⁸Vaćeren šukaripe okolenđe so dena tumen armanja! Molinen e Devle okolenđe so ćerena tumenđe bišukaripe!

²⁹Okolese kova khuvela tut ki čham, irin hem aver čham. Okolese kova lela to fostani, ma zabranin hem o gad.

³⁰De đijekhese kova rodela tutar, hem ma rode palal okolestar kova lela tutar.

³¹I sar so mangena avera te ćeren tumenđe, ađahar ćeren tumen olenđe.

³²Te mangljen samo okolen kola tumen mangena, ko ka vaćeri tumenđe hvala? Adalese so hem o grešnici mangena okolen kola olen mangena.

³³Ađahar da, te ćerđen šukaripe okolenđe kola tumenđe ćerena šukaripe, ko ka vaćeri tumenđe hvala? Hem o grešnici ćerena ađahar.

³⁴Te dinđen ko zajam love okolenđe kastar adžićerena te irinen tumenđe, ko ka vaćeri tumenđe hvala? Hem o grešnici dena ko zajam jekh averese te šaj irini pe lenđe edobor.

³⁵Nego, mangen tumare dušmanjen, ćeren lenđe šukaripe hem den len ko zajam bizo nisavo adžićeriba te irini pe tumenđe adava! I o Devel ka vaćeri tumenđe bari hvala. I ka oven čhave e Najbaresere, adalese soi ov šukar hem premalo nezahvalna hem premalo okola kola nane šukar.

³⁶Oven milosrdna sar soi milosrdno tumaro Dad kovai ano nebo!”

³⁷Ma sudinen hem čače na ka sudini pe tumenđe! I ma osudinen hem čače na ka oven osudime! Oprostinen hem ka oprostini pe tumenđe!

³⁸Den hem ka del pe tumenđe: mera šukar, pritiskime, tresime hem prepherdi ka čhivel pe tumenđe ki angali. Adalese so sava meraja merinena, esavkaja ka merini pe tumenđe.”

³⁹I vaćerđa lenđe akaja uporedba: “Šaj li o kororo te legari e korore? Na li soduj ka peren ki rupa?

⁴⁰Nane o učeniko upreder o učitelj. I đijekh kovai sikavdo sa, ka ovel sar plo učitelj.

⁴¹A sose dikheja i trunka ani jakh te phralesiri, a i greda ani ti jakh na primetineja?

⁴²Sar šaj te phene te phralese: 'Phrala, aš te ikalavtar i trunka oti jakh', a korkoro na dikheja i greda ani ti jakh? Dujemujengereja, ikal angleder i greda oti ti jakh i tegani šukar ka dikhe te ikale i trunka oti jakh te phralesiri.

⁴³Nane šukar kaš savo bijani bišukar bijandipe, sar so nane bišukar kaš savo bijani šukar bijandipe.

⁴⁴Adalese so đijekh kaš pendžari pe palo lesoro bijandipe. Sar so džanen, o smokve na čedena pe oto kare ni o drakha na čedena pe oti kupina.