Luk 6:27-44

²⁷Yesus ayo asuk bokola ko: Kibi nami weng bokoyi kaa, weng sanokomup disa yo kalbip disa; ibi weng sanip kemin, kamala nami weng bakayokomi kaa, talalu weng san bom-ilipla! Kanola kipni waasi kii mok inayin-bam ale, unang tunum kawanta ipni itam-suunbip iyo, tambal-kup ma kamayin-bam kemalip kayi!

²⁸Kemin, kanola kipkal ti, God ami bakaan-bilipla, ata taba-lom kipni yokoop ukayin tunum iyo dong dakaayin-bam ale, kawanta kasen-faka-bam tituleng kaa kipni bakayin-bilip, ilmi aket ayo talal-yim-bam kemak o, kala-somla ko.

²⁹Dok kanolin tunum ata, kapni akalap malii kaali, tang afap dabaa-lom tela namti, ati kuno malii so fal-siki kolapla telak o. Kemin, ultap o. Kanola dok kanolin tunum kaata, kapni ilim saket ayo dildaa kuluula namti, kuno kenbap-kup, yak kapni siyot ayo dil dolan o.

³⁰Dok kanolin tunum ata tal kapni mafek mafek sang ma dik-daala namti, kuno kolan aa! Aa, dok kanolin ata kapni mafek mafek kulii-unse namti, ayo dukum-kup bokola-lomdap: Asuk kup-nan aa! kemin daa yo.

³¹Kuno ti kapni aket fukunin ayo, nami nak-tunum kusal ita kukup tambal kukaap-nam-biliwa, yaap tambal-kup ilon o, kemap namti, kamosinim kawu kapsiik kanolin kukup tangbal kaata kukaayim-balawa yo, kala-somla ko.

³²Kanola kabi tunum kusnum kayak kayak iyo kamboya-lomdap kapni aket ayo kaptum kusal imi aket kapni kup-tambip kaata-kup imi kuyap namti, kuuta dong dokop-tokomu disa. Kaa dok ata naa kalolip: God ami lak duulin disa kikal imi aket kaa ilmi aptum kusal kiita-kup imi kukaayila-yaabip kemin, kiimi kukup kaa kulaak banule, kapni kukup kaata uta uta ke-lokomu dinim te! Kapso, iso, ipni kukup kaa maakup kemin, kuuta dong dokoyokomu dinim o.

³³Kanola kabi kayak kayak iyo kamboya kaltapni unang tunum imi kukup tambal kamap-tambip kiita-kup, tambal-kup kuyap namti, kuuta dong dokop-tokomu disa; le God ami lak duulin disa tunum unang yakal ti kanun-umbip o!

³⁴Kanola kabi mafek mafek ma kuluu kaptum kusal kiita-kup imi kuyale, aket fukunap yi, Salaya asiik maan tiip-nak o, kalap namti, kukup kanolap kulaa yaap lale, kuuta dong dokop-tokomu disa; God ami lak duulin disa yakal ti, kanola mafek mafek ayo ma kuluu aptum kusal imi kuyinbip-kup ale, ayo aket fanang daa, Ayo salaya asiik maan tiip-nokomip o, kem-tabasip kiiso imi dokoyokomu disa. Kemin, kiimi kukup kuu kabaak banula, kapni kukup kuuta uta uta ke-lokomu dinim.

³⁵Kemin, God ali unang tunum iyo God ami lak duulin disa isole, aa tunum unang iyo mafek mafek kuluubip-kup yaap ke yo kalin dinim so, kiili ti mok inayin-bamda aket bilili-kalin kaata ti kukaayila-tabasa. Kemin, God ami lak duulin disa imi kukup kaata kabaak banu nami kukup kaata uta uta kemon o, kalap namti, waasi iyo mok inayimbap-kup ale, kukup tambal-kup kamayim-bamdaple, mafek mafek kaptum kusal kuyale, boko-lomdap: Nak-tunum kusal kipsiik kuluulip, salala, kipsiik maan-tiip-nin o, kemin disa; keman o, kala-somla ko. Kanumin-kup ke-mokomap kaata, dong dokop-tulula, fan God akal maan dukum tiip-ta-lomda kukup tambal-kup kup-tale, kulaali kabi Sakbaalim Dukum God ami man ke-bom ilokomap o.

³⁶Kapso, unang tunum alik iso, iyo ban kemin unang tunum kemin God ayo ipni yam kot baan diim tii-lomda yam-mafak-daka-mokoma. Lale, kapni Kaalap God ali mok inap-tim-bam aket bilili-kalin kukaap-tam-bam kem-tabasa. Kemin ale, ultap o. Asuk kapkal unang tunum iyo mok inayin-bam, aket bilili-kalin kukaayin-bam keman o, kala Yesus ayo kanum bakayila ko.

³⁷Yesus ayo asuk boko-lomda: Kabi God ami abiin ayo kuluu-lomdap ami okok keba kaali nasiik kuluu-lom, okok kemon o, kemin disa; kabi kap-tunum kusal aye, malo ma kaa bom-bilip kii yam kot baan diim daa-lom bokoya-lomdap: Ibi kukup mafak nuubip o, kemin daa. Kanumin kukup kaali kelap namti, God akal mafak kamap-tam-bam bokop-ta-lomda: Yi, kabi kukup mafak kebap o, tokokoma dinim te! Aa kanola kapkal utamapla, Kap-tum kusal aye, malo ma kaa bom-bilip, iyo ban kelip o, kalokomap kaa boko-lomdap: God alta umi du kaali, tiiyale, angtiil yol kaali, kuyak aa! kemin disa yo. Uyo kuno kelap namti, God akal du tii-lomda angtiil yol ayo kup-tokoma disa. Kemin, kanola kaptum ami ban ayo takan-telap dinimnuk o, kanolap namti, God akal ti kapni uluum ayo takan-tiip-ta, atin ti dinim-nokomu.

³⁸Kabi kaltapni mafek mafek ayo kaptum kusal aye, malo ma kaa bom-bilip, kii masiim kukaayokomap kaata, God akal mafek mafek uyo kuno masiim kukaap-tokoma. Kemin, God ami mafek mafek tambal kukaayin kaali, men ima waan abuumin ultap kemin, akal dukum-kup abuu-lomda, dibiila daak nek kalule, asuk maso ma kulii yak abuulala, donga-lom sekela tabu kala, kala-lomda kukaayokoma. Kemin, God ami mafek mafek kukaayokoma kaali, God akal kaptum kusal aye, malo ma kaa bom-bilip, imi mafek mafek kukaaya-laabap akal kano ulmi maan-kup tiip-ta-lomda kukaap-tokoma. Kemin, God ayo kukup tambal kup-ton o, keba kemin, aa ultap kapkal kukup tangbal uyo kaptum kusal aye, malo ma kaa bom-bilip, imi kukaayim-balawa yo, kala Yesus ayo kanum bokoya ko.

³⁹Kulaa faldak-tiimin weng ma bokoyila ko: Tunum tiin fiim ma ata aptum tiin fiim ma ami liip kaa kukola unokoma nema? Disa kawi! Kanu-mokoma namti, alep maakup kulii afun tem unokomip.

⁴⁰Kemin, man katip katip kiili, sukul kukuyin mafek mafek kaali, talalu ma atabip disa; kemin, ilmi tiin molin o, kala kukuyin tunum kiita, talalu utamsip kemin, ita kukuyin-biliwa, man katip katip iyo utam dik-daa kuluu-yaabip. Kemin, bom bii man katip katip yakal utamiwa yi, Nokol dik-daa kuluulup kala, kalbip-kup, yakal ilmi kukuyin tunum iltap ke-lokomip.

⁴¹Kap-tunum kusal imi kukup mafak katip katip kuuli, sung ilol tal aba yak tiin tem uneba tap ale, kapni kukup mafak sakbaalim dukum kanuubap kaata, as daang ta tiin fuk-duup-ta-yaaba tap. La, kabi kap-tunum ami bokola-lomdap: Naktum kapyo, tiin sung tal aba yak unan o! Ken-umbap. Katale, aket fukun-ilom as daang tiin faka-tanip-na kulaa laap bombu kemin, am ma daanula disa ke-lokomu no. Kemin, aket uluum kep-nokomu disa yo, kem-laabap. Kemin, kabi kaltapni kap-tunum kusal imi kukup mafak katip katip kulaa utamsap. Katale, kaltapni kukup mafak awak sakbaalkan dukum kanuubap kabak-ali kabi utabap e? disa?

⁴²Kanimin o, kalalapla kap-tunum kaa bokola-lomdap: Nak-tunum kapyo, dong dokop-ta-lomdi tiin sung ayo kukan-tiip-ton o, kalbap i? Daa! As daang ta tiin faka-tanip-ta tiin bokol ke-salap kalaali, dok kano-somdawa dong dokolokomap i? Kabi kukup alep fukumin tunum kapya! Kamosinim as daang uyo kaltapni tiin diim bombe kaali, kukan-tii-somdawa kawu, yak kap-tunum ami tiin sung uyo talalu utam-ilomdap kukan-telamap ko.

⁴³Yesus ami weng faldak-tiimin weng ma bakaya-lomda: As tambal kaali, as lap mafak ma abuulokomu disa; ale as mafak ayo ma as lap tambal abuulokomu disa.

⁴⁴Kemin, nokol utamupla, Kanolin as lap uyo abuubu no, kalup namti, utam, Awu, kanolin as kaali ti tambalim aa, yak kanolin as kaata mafak o, kalokomup. Uyo kanolin kemin, nuli as tiyup miit tem yang-ilomdup as fik lap uyo ma duk-duu inam-nokomup disa; ti tiyup lap ulmi-kup abuu-laamin o. Ultap kemin, nuli yang sok masiil ami diim kawu dalap ayo abuuba no, kalalup duk-duulokomup disa.