Luka 22:12-31

¹²Ebu aniꞌa ne hitagano bazuni neḡa boro ꞌahoga ihoziꞌuma zu ruhibe teateꞌe ḡauḡa horoniꞌuma. Deꞌea ogomufe ruhibe toꞌi!”

¹³Ze iḡunadu onamiro, ebu Iesuꞌa ziroteꞌe ḡauḡa niduꞌa horoniro. ꞌOugadu Iḡine Modeꞌeteꞌe Muiḡa ruhibe tiro.

¹⁴Madaḡaniꞌa feurirotene, Iḡine Modeꞌeteꞌe Muiḡa afine, Iesu ani apostolo azaḡa teite eꞌe neḡa zamaḡano ehoriro.

¹⁵Ebu aniꞌa ziro, raenaꞌa, “E izema aduga hidogano, zae teite Iḡine Modeꞌeteꞌe Muiḡa ꞌahi anoga hubehune uratiro.

¹⁶Mazaḡa eḡeꞌa ziꞌohe, eꞌe Muiḡa ꞌahiꞌe mene bare aꞌuma onamo Badiꞌaꞌa ibitohauꞌeteꞌe madaḡano Iḡine Modeꞌeteꞌe Muiḡa huganiꞌa hubehune hudaꞌuma.”

¹⁷Ebu ani vaini vuḡa bioḡa madu Badiꞌa mazao kuranadu ziro, raenaꞌa, “ꞌAhi madu zae zuni tahitahe gagoꞌi!

¹⁸Mazaḡa eḡeꞌa ziꞌohe, eꞌe vaini vuḡa mene bare gagiꞌuma, onamo Badiꞌaꞌa ibitohauꞌeteꞌe habaꞌa madaḡaniꞌa onaiꞌuma.”

¹⁹ꞌOugadu ani beredi meiro, zu Badiꞌa mazao kuranadu vahege tahitahadu ziniro. Ebu zinaꞌa, “Beredi ꞌadiꞌe eḡe ahiri. Zae ziniꞌohe. Eḡe zamaroga radu haḡaiḡa ꞌadi haḡaoꞌi!”

²⁰Ḡorava ogomuḡa enogano ani vaini vuḡa bioḡa madu ziro, raenaꞌa, “Bioḡa ꞌadi zamaḡanoꞌe eḡe ru. Eḡeꞌa zae uꞌano rudanadu ruheꞌa beꞌutiꞌuma, aꞌe ḡoitore iziga raꞌohe.

²¹Rehano ḡianoꞌi! Eḡe revoniꞌuma vazeḡaꞌe emeḡe teite ogau tiburuꞌohe.

²²Eḡe, Vaze Ubugaꞌe Badiꞌa urao rudaꞌuma. Rehano eḡe revoniꞌuma vazeḡaꞌe aduga hune hidiꞌuma.”

²³ꞌOugadu ze bare ḡadimutitiro, raenaꞌa, “Emeḡe boꞌaḡano iniuꞌa ꞌouge haḡaiꞌuma?”

²⁴Ebu Iesu tahiꞌatahiꞌa boꞌaḡano iniuꞌe niḡa boro raenaꞌa zeḡeꞌa bare taꞌirotitiro.

²⁵Iesuꞌa zinaꞌa, “Avoꞌa kiniḡakiniḡaniꞌa zeḡe haba azaḡa zuhiꞌaziꞌohe, ebu gigiꞌazeta azaḡaniꞌe haba azaḡaniꞌa 'Duꞌu vazeḡa' rae huzeꞌohe.

²⁶Rehano zaꞌe ze teige ago ꞌougoꞌi! Zae boꞌaḡano iniuꞌa niḡa boro reihi reine, aniꞌe vaze niḡa komeꞌa heuḡa rae reꞌuma. Ebu iniuꞌe zuhiꞌa reihi reine, tuḡure vazeḡa heuḡa rae reꞌuma.

²⁷Iniuꞌe niḡa boro? Ehore ogauꞌeteꞌe vazeḡa ga tuḡure vazeḡa? Aꞌe ehore ogauꞌeteꞌe vazeḡa. Rehano eꞌe zae boꞌaḡano tuḡure vazeḡa heuḡa.

²⁸Eḡeꞌa aduga hide onainuteꞌe zamaḡano zaꞌe eḡe teite radiu onaeha.

²⁹Eꞌanoꞌo eḡe Mamaꞌa vaze niduꞌa ibitoziniꞌeteꞌe gigiꞌaḡa iniroteꞌe teige, e zae zuni eꞌe gigiꞌaḡa ziniꞌohe.

³⁰Ebu eḡeꞌa ibitohauꞌeteꞌe habaꞌano zaꞌe eḡe teite ogaꞌuma, zu kiniꞌa ehoreꞌeteꞌe habaꞌano ehoradu Isaraela azaḡa, 12 urabo, ibitoziniꞌuma.”

³¹Ebu Iesuꞌa Simona niro, raenaꞌa, “Simona, Simona! ꞌAdi egoꞌi! Sataniꞌa, vuiti zuizuineꞌeteꞌe teige, zae zama tuhunoga veize Badiꞌa umineha.