Luku 22:12-31

¹²Dokopa baame anda namba pyoo petae ketae mendenya toko akipi dupa singi palo andake mende laitaka pyaapomona, dokonya depa laapape,” lea-pyaa.

¹³Dopa lateamopa dolapome pao Jisasame leamoli pyoo kandatala Napinya Kayamo Nee doko depa leambi-pyaa.

¹⁴Napinya Kayamo Nee napenge gii doko ipateamopa, Jisasapi baanya aposele dupa-pipa awapa nee nalanya tokonya peteami-pyaa.

¹⁵Peteaminopa baame dokaita lamaiyoo, “Namba tanda andake nalanya pituu wambao nyakama-pipa Napinya Kayamo Gii dakenya nee dake etete napuma laka lao masoo katapu.

¹⁶Tenda nambame nee dake mee etete nala naenya Goteme isala ipao pituu Napinya Kayamo Nee dokonya tenge angi doko panasetatamopa nambame Napinya Kayamo Nee dakenya etete napengena lao nyakama langilyona,” lea-pyaa.

¹⁷Dopa latala baame kapo penge mende nyepala Gote lao yaka pilino latala dokaita lamaiyoo, “Dake nyakamame nyepala kapa kapa lao mokosoo nalapa.

¹⁸Nambame getepe ipange dake indupa nanawaka katao Goteme isala ipatamo gii dokopa natona lao nyakama langilyona,” lea-pyaa.

¹⁹Dopa latala baame betesa mende nyepala Gote lao yaka pilino latala konjia-pyaa. Konjepala dokaita maiyoo pituu, “Dake nambanya yonge doko nyakama lao masetala Gote kundi mailyona, nyakamame namba masoo dopa pyoo kalyepapena,” lea-pyaa.

²⁰Napinya Kayamo Nee doko napeaminopa baame kapo penge doko nyepala dopaka pyoo nyakama maiyoo pituu, “Nambanya taiyoko kapo penge dakenya nyakamanya kai lekelyo dokome Goteme pii enenge lao setekelyamona,” lea-pyaa.

²¹“Anematupa! Namba kandao yandapipi jingima akali dupa namba laitaka pitamo akali doko nambapa awapa nee nao toko dakenya pilyamo.

²²Kini, Endakalinya Ikiningi dokome Gotenya makande seteamo kaita dokonyaka watao minilyamo. Dopaka doko, enge nyilyamo akali doko baa koyata iki lamo!” lea-pyaa.

²³Dopa lateamopa dokaitame nyakamalapo lao pituu, “Naimanya akali apimi mana doko minalanya pilyape?” leami-pyaa.

²⁴Dokopa disaipele dupame naimanya mende api alyasale joo kalyamape lao pii yanda pyoloo piami-pyaa.

²⁵Dopa piaminopa Jisasame dokaita lamaiyoo, “Endakali tata dupanya kiŋi kalyamino dupame endakali dupanya alyasale joo katengema. Dee endakali dupame tangenya isingi akali dupa kandao akali epena lao lalyingima.

²⁶Dopaka doko, nyakamame dopa napinya, nyakamanya akali andake joo katenge doko anasale joo katapenge. Dee nyakamanya isingi akali dokome nisingi akali joo katapengeaka.

²⁷Api alyasale joo kalyape?’ Nee nao petenge akali doko alyasalepe, pande baanya nee yangao setakamaiyoo nisingi akali doko alyasalepe? Nee nao petenge akali doko alyasale joo katenge daape! Dopaka doko, namba nyakama-pipa katao nisingi akali joo kalyo.

²⁸“Namba-kisa makande pingi koo dupa ipata pilyamopa nyakamame namba mona setao awapa katengema.

²⁹Dopana, nambanya takange dokome namba kiŋi joo isoo katape leamoli pyoo, nambame nyakama kiŋi joo kalyepape langilyo.

³⁰Nyakamame nambanya isingi panda dokonyaka katao nambanya nee nao petenge toko dokonya pitipala neepi endakipi nao pititami. Dee nyakamame kiŋi dupanya petenge toko dupanya pitipala Isataele tata kingi ita-kisa dee lapoma dupanya pii tolasakamaitamina,” lea-pyaa.

³¹Jisasame Saimone kandao, “Saimone! Saimone! Kandeleno! Ee pokenge endakali dupame wiisa angi imbupi yapengemali pyoo Satane dokome nyakama pitaka makande pyaanya anali latelyamo.