Luku 22:12-31

¹²A kpɛdiakↄ̃a kpɛa zↄ̃ↄ pↄ́ wa kɛ̀kɛ ↄlↄɛ́, í pↄblea yã́ kɛkɛ we.

¹³Kɛ́ aa gɛ̀, aa è lá Yesu ònɛ́wa, ↄ̃ aa Gɛ̃amusu blɛ sↄukɛ̀ we.

¹⁴Kɛ́ a gↄↄ kà, Yesu mↄ̀ zↄ̃̀lɛ we ń a zĩnaↄ sãnu.

¹⁵Ɔ̃ a ònɛ́: Gɛ̃amusu blɛɛ bee bleaánↄ ni ma dɛ maamaa e màↄ gɛ́ taasikɛi,

¹⁶asa málɛ oɛ́, má ble lↄo e kpala pↄ́ bↄ̀ Lua kĩ́i gɛ bↄò gupuau, dikpɛ sĩana i mↄ́.

¹⁷Kɛ́ à imibↄ sɛ̀, à sáaukpà, ↄ̃ à mɛ̀: À si dↄdↄkↄ̃ɛ,

¹⁸asa málɛ oɛ́, za tia má vɛ̃ɛbɛ'i mi lↄo e kpala pↄ́ bↄ̀ Lua kĩ́i gɛ bↄò gupuau.

¹⁹Kɛ́ à kàa sɛ̀, ↄ̃ à sáaukpà a ɛ kpàmá à mɛ̀: Kɛ́ beeá ma mɛ pↄ́ málɛ kpá á yã́iɛ. Àliↄ bee kɛ ma yã́ dↄaágu yã́i.

²⁰Kɛ́ aa pↄblè aa làa, à imibↄpi sɛ̀ màa lↄ à mɛ̀: Íɛ beeá ma au pↄ́ lɛ́ bↄlɛɛ́ɛ. Lua bàa kua ń gbɛ̃́ↄ tia auɛ.

²¹Ma ↄ ku ta doũ ń ma bↄnkpɛdeoɛ,

²²asa Gbɛ̃nazĩn Nɛ́ a kpagui lá Lua dìlɛɛwaɛ. Waiyoo gbɛ̃́ pↄ́ a aà kpámápi.

²³Ɔ̃ aa nà kↄ̃ lalaawa aa mɛ̀: Wá démɛ a yã́ bee kɛi?

²⁴Ɔ̃ lɛkpaa fɛ̀lɛ ń guu, kɛ́ aa ye dↄ̃ ń gbɛ̃́ pↄ́ dɛńla.

²⁵Ɔ̃ Yesu ònɛ́: Bùsu kíaↄ ì ikokɛmá mɛ́ gbãadeↄ ì ńzĩa tↄbↄ,

²⁶ãma ásu kɛ màao. À kũ̀ á gbɛ̃zↄ̃ↄ aàↄ dɛ gbɛ̃́ pↄ́ kɛ̃́sãaázi ũɛ. À kũ̀ á dↄaana aàↄ dɛ á zĩkɛna ũɛ.

²⁷Blɛblena ń blɛzĩkɛnao, an démɛ zↄ̃ↄi? Blɛblena nolo? Mapi sↄ̃ má kú á guu lán gbɛ̃́ pↄ́ lɛ́ zĩkɛɛ́wa.

²⁸Gbɛ̃́ pↄ́ zɛ̀manↄ ma taasikɛa guuↄn á ũ.

²⁹Lá ma Mae ma kpa kpalau, má á kpá kpalau màa sↄ̃,

³⁰í blɛblemanↄ ma kpalau, íↄ zↄ̃lɛzↄ̃lɛa báawa àↄ yã́kpalɛkɛ ń Isaili bui kuɛplaↄ.

³¹Simↄↄ, Simↄↄ, ma. Setãu gbɛ̀a à á ká íu lá wì pↄ́wɛna ká íu wà gwawa.